الموضوع: خدمه ما بعد البيع لسيارات شنجان

المشاركة الأصلية كتبت بواسطة khalifa836

شكرا لرد حضرتك
بس عاوز اعرف انت أتعاملت مع توكيل مودرن موتورز مباشرة ولا عرفت المعلومات دي عنهم منين

أنا بتعامل مع مودرن موتورز فرع القباري في إسكندرية ..اللي هو جنب الموقف الجديد ..وبروح عشان أعمل شغل خارج الضمان ..يعني بفلوسي ..يعني مش رايح أرمي جته وأقولهم الحته دي باظت منكم ..الحته دي عيب تصنيع ..لأ ..أنا ببقى رايح وعارف أنا عايز أعمل إيه ..مشكلتهم معايا أنا كانت في الوقت ..عندهم عدم تقدير لوقت العميل بطريقة غريبه ..يعني لما عربيه تدخل عشان تغير طقم بوجيهات تقعد عندهم ست ساعات ..لما أبقى رايح أركب ثرموستات كوع برضه العربيه تقعد ست ساعات ..وست ساعات دي يعني اليوم كامل ..يعني بروح بالعربيه الساعة 8 الصبح ..على ما يستلمها منك تكون الساعة جت إتناشر إتناشر ونص تطلع من عندهم الساعة تلاتة ونص ..طيب ده كلام يرضي حد ؟؟..ده غير اللي بشوفه هناك بقى قدام عيني ..واحد رايح بماروتي وعنده صوت حفه كده أو حكه بس بصوت حفيف ..طلعت في الآخر الطنابير ..قالوله الطنابير ما ينفعش تتغير ..ليه ..هي الطنابير مش جوه الضمان ..آه جوه الضمان بس مش هو ده العيب اللي يخلينا نغير الطنبور ..بص ..كفاية إنك تبقى واقف في توكيل بتاع عربيات سوزوكي فان ..اللي بنسميها عندنا في إسكندرية ..تونايه ..طيب أقولك على حاجه ..رحت غيرت عندهم جوان غطا تاكيهات الفني اللي بيشتغل بعد ما خلص قالي لو الجوان ده جاب زيت تاني إبقى غير الغطا كله عشان مقفع ..الجوان جاب زيت ..رحت لميكانيكي بره فك الجوان حط سليكون وقفل ..الغطا الله أكبر ..قطع زيت ..بس لهفو مني في التوكيل 75 جنيه مصنعيه ..والميكانيكي تلاتين جنيه مصنعيه ...

شوف إنت بقى ..إيه رأيك في التوكيل؟؟ ..بس انا قلتلك في الأول ..كله زفت ..فهي كده شبه بعضها ..آه نسيت أقولك ..في الفرع اللي أنا بروحه مفيش حجز في التليفون ..بس في ميزه بصراحه وسط كل العتمه دي ..إنك بتسأل عن قطعة الغيار اللي إنت عايزها بالتليفون قبل ما تروح موجوده ولا لأ ..وبكام ..ومصنعية تركيبها كام ..معلش ملحوظه أخيره ..نسيت أقولك إنك ممكن تروح وبعد ما تقف تلات ساعات ..يقولك أخ ..معلش ..أصل الكهربائي مجاش النهارده ..وطبعا حضرتك بتكون رايح تعمل شغل كهربا ..فبعد اليوم ما ضاع والوقفه ..يقولك أخ ..الكهربائي مجاش ..قالوها لواحد كان رايح يركب كاسيت في ماورتي بعد ما وقف من الساعة تسعة لغاية الساعة واحده إلا ربع ..صاحب الماروتي قال للمهندس بتاع الإستقبال بعد ما قاله الكهربائي مجاش النهارده إلهي يكهربوك في دماغك يا شيخ ..مقولتش ليه من أول اليوم عشان أغور أمشي بدل اللطعه دي ..طبعا تاخد منهم إعتذارات صفرا ..وتحس وهو بيعتذرلك إنه عايز يقولك وأنا أعملك إيه يعني ..أروح أجيب الكهربائي من بيته ..فواضح إن مشكلة عدم تقدير الوقت دي عامه بالنسبه ليهم

شفت بقى مودرن موتورز جميل إزاي

المشاركة الأصلية كتبت بواسطة khalifa836

شكرا لإهتمام حضرتك بتوضيح تجربتك مع التوكيل بس الحمد لله إن المشاركه اللي بعد حضرتك كانت للأستاذ /أحمد وهو يمتلك سيارة شانجان وأوضح أن توكيل شانجان منفصل عن توكيل سوزوكي وشكر فيه جدا والحمد لله طمني
وشكرا لتعب حضرتك وطبعا انا عارف ان حضرتك بتنقل تجربتك الشخصيه ويا رب توكيل سوزوكي يبقي ذي توكيل شانجان

يا باشا ما هو حضرتك عندنا في اسكندريه الشانجان بيعمل الصيانه بتاعته في مودرن موتورز ..ممكن بقى في القاهره يكون الشانجان ليه مراكز منفصله وده هيكون من حسن حظ مالكي الشانجان مش أكتر ..