تعمل إيه لو إبنك خبط حد و إتحبس ؟

**fahd_628** · 10-11-2008 12:42 AM

لو هوة غلطان يبقى يتحمل النتيجة ( يعنى لو بيجرى او كدة )

لكن لو ماشى فى امان الله و لقى واحد اتزرع قدامة لا بية ولا علية و خبطة يبقى اكيد حطلعة

انا بفكر فى الموضوع دة كتيير لأنى لما بسوق على البحر بجد حاجة تقرف كل شوية ناس بتعدى و المشكلة ان النفق بيبقى جمبهم مفيش 5 متر و كمان اكتر غباء شفتة انهم بيعدو من بعد الأوتوبيس :( يعنى مفيش اذكى من كدة ) انا ابقى ماشى ورا الأوتوبيس و الاقى واحد فى وشى مكنتش شايفة :( اعمل اية انا و هوة الى غلطان مش انا ! و على فكرة انا كذا مرة كنت حدوس ناس بسبب الموضوع دة بس ربنا بيسترها

**muslimah_dentist** · 10-11-2008 11:36 AM

سؤال صعب جداً

احنا ممكن كل واحد فينا دلوقتى يتخيل هيعمل ايه بس الله أعلم لو حصل الموقف ده معانا الله أعلم هنعمل ايه

مشاعر أى أب و أم بتبقى قوية جداً و فياضة للغاية و متهيألى محدش يرضى أن ابنه يتعرض لسؤ حتى لو كان غلطان

أرجو أنه مايتفهمش من كلامى انى بأشجع على الغلط (أبداً و الله) أنا ضد التسيب و الاستهتار و الاستهانة بروح الآخرين.

بس ممكن نبص للموضوع من وجهة نظر أخرى

هو أنا هأسيب ابنى لغاية أما يعمل مصيبة و أربيه بعدها أنا مفروض أحرص على تربيته تربية صالحة من البداية علشان يكون فعلاً ليا السند و العضد بس ابن مستهتر و ضايع ده حمل عليا مش ليا.

المشكلة يا جماعة دلوقى بقت ان الأب و الأم مابقوش يربوا ، فاكرين انى أما بألبى كل طلبات ابنى المادية يبقى أنا كدة أب تمام و ده أبعد ما يكون عن الصحة .

التربية الصحيحة انى أربى ابنى من البداية على الصح و الغلط و أعلمه دينه و أقربه من ربه ، أعلمه أنه يحترم البنى آدم و يُقدس أى روح ماشية على الطريق ، نغرس فى أولادنا احترام الآخرين ، مادام أنا أسست ده فيه يبقى استحالة هيغلط .

انما ابن مستهتر و بعد كدة أقول اربيه يبقى ساعتها احنا محتاجين نربى أبوه و أمه معاه لأنهم أكيد استهانوا فى تربيته من الأول.

**D . a .\ AYMAN** · 15-11-2008 11:51 PM

برغم ان آرائكم جميعا تقبل الصحة من الجانبين

لأن :

- لو سيبته يترمي في السجن عقابا له على ما فعله ... نرجع ونقول ان السجون المصرية وأي سجون عموما ما هي الا أداة لخلق المجرم المحترف الناقم على المجتمع أكثر من ذي قبل (وأسالوني انا عن السجون المصرية بالذات) .... يبقى كده فعلا الواد ضاع أكتر ماهو ضايع ... الأول كان ممكن يتربى بعد كده خلاص مافيش فيه فايدة

- لو طلعته بالسلطة والنفوذ يبقى انا كده خالفت ضميري وخالفت قول رسول الله الكريم (ص) {لو أن فاطمة بنت محمد سرقت لقطع محمد يدها .. إن ما أهلك الأمم قبلكم أنهم إذا سرق فيهم القوي تركوه وإذا سرق فيهم الضعيف أقاموا عليه الحد} أو كما قال ... وليس لي إلا ان أنتظر عقاب الله بعد ذلك

لكن أحب أوضح شيء غير منطقي شوية في الموضوع

- لو فرضنا ان أنا أب ملتزم وأسرة تحاول أن تكون في رضوان الله (اللهم إجعلنا جميعا كذلك) مش هايحصل ان ابني يطلع بهذا الشكل اللا مبالي والمستهتر لأنه أكيد هايكون نال قسط وافر من التربية الجيدة والإحساس بالمسؤلية

- ولو فرضنا اني أب من اللا مباليين بالمجتمع من حولي وكل اللى يهمني أنا وبس وفلوسي وعيالي يبقى ساعتها عادي جدا لما ابني يطلع بايظ لأني ماربتوش أصلا وعادي لما الواد يعمل كده وعادي لما أجري انا واطلعه من القضية وطظ في المجتمع

- طب لو حصل موقف زي ده لأسرة طيبة وتراعي الله في تربيتها لأولادها (لكن الموقف حصل قدر الله بقى) .... ساعتها هايكون كلي يقين أن الله سيوفق أهل المصاب وأهل الجاني لما يرضاه هو جل وعلا عما سواه وبصورة ترضي الطرفين بإذن الله ... وأكيد أهل الجاني بإذن الله هايرجعوا يربوا الواد ده من أول وجديد لأنهم ناس في الأصل محترمين

أنا لم أصوت على الإستطلاع لأني مش قادر أختار دي ولا دي لأن للاسف بلدنا بايظة وماينفعش معاها لا دي ولا دي

وربنا يحفظنا من أننا نتحط في موقف مشابه