نداء الى كل راجل فى المنتدى
معلش اصل انا دمى محروق اوووى
عملت كومنت على خبر فى صفحه اليوم السابع عبرت فيه عن رأيي بشئ من السخريه بس مشتمتش حد
جالى ١١ reply على الكومنت كلهم طبعا تريقه واستهزاء بس كومنت منهم كان صعب اوى
واحد شتم شتايم بشعه والله بشعه مش قادرة اتخيل ان ممكن راجل محترم يشتمها
ايا كان تعليقى وايا كان انتمائى السياسي ده مايسمحلكش انك تغلط فيا بالشكل ده لان ببساطة الرجولة مش لسان الرجولة ادب واخلاق واحترام لرأى الغير خصوصا لو كان اللى قدامك ست مش شاب زيك
ياريت يا جماعه لما تلاقي صاحبك بيعمل كومنت فيه شتايم بالمنظر ده ماتفرحش بيه وتعمل له لايك
انصحه وقوله عييييب
عيب علشان انت مكتوب فى بطاقتك ذكر وحاول ترقي شويه علشان تبقي راجل
فكرنى بمرة كنت معديه بالعربيه ولاقيت سواق تاكسي واقف عمال يزعق و يخبط على عربيه اللى وراه ويشتم يشتم واللى وراه كانت واحدة بنت وغالبا خبطته بس ياعينى من صدمتها واسلوب الراجل قاعده كمشانه فى الكرسي و عماله تعيط
اهو ده نفس عينه الذكر اللى فوق
نفسي قبل ما نطلب من ربنا يوفقنا نغير من نفسنا الاول ونحترم بعض
اسفه على الاطاله