الموضوع: برجاء المساعدة فى هذا العطل الغريب والمفاجىء

نزلت الصبح شغلت العربية اشتغلت علطول من غير ماتغيب ومن اول مرة بس إتأخرت 3 ثوانى ودارت
ده يبقى ايه معناه ( وساخة فى الدورة ولا مشلكة فى الموبينة )
وبردوا ها تابع اللى بيحصل اول بأول وأقولكم والعربية دلوقتى مركونة من ساعة ماجيت الشغل الساعة 8 ص هاشوف اللى هايحصل لما امشى الساعة 4 م وتفيدونى ده معناة ايه
تاعبكم معايا بس علشان نستفيد

المشاركة الأصلية كتبت بواسطة m_m_sh_a

مقولتليش ..الموبينه اللي فيها كهربا ولا

بص ياباشا الموبينة الكترونى شكلها عبارة عن مجموعة مستطيلة متوزعة عليها خرج البوجيهات وبها حساس مع المجموعة

اللى حصل النهاردة
نزلت اشغل العربية بردوا غابت فى الدوارة
قولت ان شاء الله اروح للميكانيكى والكهرباءي يشوفوا المشكلة
قابلنى الكهرباءي الاول
كشف على العربية وقالى الموبينة كويسة والكتاوت والفيوز تمام
وقالى روح شوف الميكانيكى قلتله يعنى مافيش حاجة قالى اللى عندك مش فى الكهرباء قالى اكشف على البوجيهات او طلمبة البنزين
روحت للميكانيكى
مسك العربية من اول البوابة وراجع على كل الشغل اللى عمله من اسبوعين ورحت جبت بوجيهات تانى جديدة وركب ودور العربية وبردوا مش عجباه دوارة العربية
قالى انا راجعت على كل الشغل اللى يخصنى فى الميكانيكا وطلب منى اروح اكشف على العربية بالجهاز لأنى شاكك فى حساس الكرنك والايدل
روحت لواحد عنده جهاز كشف والنور كان قاطع ف المنطقة
قولته الموضوع من اوله
قام بص على العربية وشغل العربية وبص على ال rbm لقاه ثابت ومظبوط قالى شغل التكييف شغلت ال rbm مبقاش ثابت يجى على 10 وينزل على اقل من 8 قالى المشلة بشكل كبير من الأيدل قالى لازم نفكه ونظفه ونحط العربية على الجهاز قلتله وده يأخر الدوارة فى الصبح قالى طبعا
و النور مجاش قلتله هاعدى عليك بكرة
مشيت والسحب اخلتف بعد تغير البوجيهات زاد لدرجة انى مشيت على سرعة 120 كم وانا رايح القاهرة الجديدة وصوت الموتور بقى ناعم
ايه رأيكم فى اللى قلته

النهاردة بقى يوم العجب
نزلت بعد صلاة الجمعة اجيب العربية من الجراج
ومعايا الولاد
بشغل العربية مرضيتش تدور خالص والبطارية نامت وحلفت ماتدور
جه واحد فى الجراج وندى على اتنين كمان ذقوا العربية ابداً مفيش دوارة
الرجل المحترم فك بطارية عربيته وركبها عندى دارت
روحت كشفت عليها قالى الله يرحمها عمرها ماهاتشغل الصبح لازم واحده جديدة قلتله ماشى
نزلت علشان أعيد على امى بشبرا عديت على محل معرفة قولتله بص على البطارية قالى خلاص انتهت
اشتريت واحده جديدة والحمد لله وقدر الله وماشاء فعله
وعلى قد كل االى حصل بردوا اكسنت حبيبتى وتستاهل يتغيرلها كل اللى عايزاه
انا كنت بستاشيركم علشان الاشتغالات من الصنيعية
هل تفتكرم المشكلة من الاول كانت بطارية

الحمد لله نزلت الصبح شغلت العربية

الحمد لله اشتغلت علطول بعد شراء البطارية
واضح ان المشكلة كانت فى البطارية
الحمد لله على كل شىء

المشاركة الأصلية كتبت بواسطة pepo2011

اولا مبروك البطارية الجديدة وثانيا اسف لتاخري في الرد لاني كنت غير متابع
والاهم انك برضو لازم تتابع الايدول وتنضفة وتشوف او تغيرة لو مظبطش

مفيش اسف ولا حاجة انا بشكرك على المشاركة
الموضوع شكله مش فى البطارية ( هى البطارية كانت فعلا انتهت ) بس السبب الحقيقي لسه موجود وبصراحة انا خايف افتح على نفسى فتحة انظف الايدول او اغيره يطلع مش هو
بس ظهر حاجة غريبة لو العربية مادارتش من اول مرة اجى ادور تانى مرة تضرب مدفع كهرباء والتالتة تدور الكلام ده الصبح وخصوصا لو نزلت بعد الاجازة اسيب العربية فى الجراج يومين
ايه رأيكم تنصحونى بإيه