أشكر حضرتك على مجهودك وتعبك معايا واسمحى لما استلمها اكيد هاوجع دماغك تانى بأسئلة أكتر هههههه
عرض للطباعة
الف مبروك ، ربنا يديك خيرها و يكفيك شرها و يحفظهالك
انا حاليا في نفس مشكلتك .... تقريبا
انا استقريت على فتحة السقف نظرا للامكانيات المادية ، بس محتار جدا جدا في اللون ، انا شخصيا معجب بالاوف وايت قوي و حاسس انه لذيذ عليها ، لكن كل اللي حواليا سواء اصدقاء العمل او اخواتي مش معجبين باللون ده ، و فيه اللي بيقترح عليا الشامبين او الفيراني
بصراحه الموضوع ده عاملي حيره شديده قوي
كويس انى لاقيت حد زيى انا كنت فاكر انها مشكلة هايفة وانا اللى مكبرها بس فعلا لون العربية ده حاجة مهمة بيحببك اكتر فالعربية وانا كنت زيك بالظبط هاموت على الأوف وايت بس للأسف كان موجود فى ال e3 بس ومش موجود فى الهاى لاين وعلى اخر لحظة كان عندى استعداد اضحى بالأوبشن الزيادة علشان اخد اللون اللى انا عايزه بس النصيب بقى لكن انا لو مكانك اكيد مش هاخد الشامبين علشان ده اكثر الألوان انتشارا فى الفلوانس من يوم ماطلعت وتحس ان مصر كلها راكبة الشامبين واى لون غيره هوه والأسود هايبقى حلو فالعربية
طب بالمره بقى استفسار يا جماعه ، انا بالنسبه لي كان جزء اساسي في اختياري للفلوانس ان العربية تبقى آمنة ضد السرقه ، و ده راجع لسرقة عربيتي السابقة الالنترا ، بس فيه زميل قاللي ان مفيش حاجه اسمها عربيه ضد السرقة و ان اي عربية سهل سرقتها
بحكم خبرتكم ايه رأيكم في الكلام ده
حد يطمني :120146b
اعلى نظام امان موجود فى الفلوينس و الميجان قبلها . بلا منازع .العربيه ما لهاش مفتاح من اصله بتشتغل بكارت كمبيوتر العربيه بيتعرف عليه و اسمه رينو كارد . يكفى انه اقول لك اللى بيفكر يسرقها على الاقل يفضل قاعد جنب العربيه اسبوع بالكمبيوتر علشان يفك شفرة العربيه .
الكارت ده لا يقلد و اذا اتقلد و العربيه اشتغلت بالتقليد بعد 100 متر الكمبيوتر هايحس بالكارت و هاتقف بو هاتقطع بنزين .
التوكيل هنا نفسه مش معاه شفرة العربيات المباعه و لو رحت تطلع كارت جديد لو اللى معاك باظ بتنتظر اسبوع حتى يتم ارساله من فرنسا و تكلفته 2000 جنيه . يعنى من ناحية الامان اتطمن . انا عن نفسي عمرى ماسمعت عن سرقت عربيه ميجان برغم انتشارها الكبير فى القاهره و اسكندريه . للاسف الكورى اللى بتنضرب شفرته و ربنا يسترها مع الجميع .
أخيرا بقيت فلونساوى هههههههههههه
انا استلمت العربية النهارده ومشيت بيها من المصرية لحد بيت ونزلت بالليل لفيت بيها شوية صغيرين علشان انا لسه مارخصتش ولا ركبت نمر وبشكل عام العربية اكثر من رائعة
طبعا انا نازل من نيسان صنى سوبر صالون الشكل القديم يعنى أكيد متأثر بيها وبالتالى الفلوانس الهاى لاين بالنسبة لى وهمية واكيد انا محتاج وقت ومحتاج امشى اكتر ومسافة علشان احس العربية واقدر اقيمها ومش كده بس انا محتاج افهم حاجات كتيير اوى فيها علشان بجد حاسس انى تايه ومش عارف مين بتاع ايه
المهم مبدئيا العربية لونها موكا اللى هوه لا تعرف له هوه اسود ولا رمادى ولا فيرانى ولا بنى ولا ايه وبيتغير على حسب الأضاءة وعلى حسب الزاوية اللى انت بتشوف منها العربية
موضوع الرينو كارد ده تاعبنى جدااا بجد ومن غير تريئة ملخبطنى جدااااااااااا ,, انا جربت ابعد عن العربية لاقيت العربية قفلت فعلا لكن كنت واقف جنبها وبحاول افتحها مافتحتش ومش عارف ده صح ولا غلط ولا انا اكيد اللى مش فاهم ,,, الحاجة التانية بجد والمهمة اوى بالنسبة لى وياريت حدي يفيدنى فيها ,,, عايز اعرف ايه الوضع اللى شبه الكونتاكت فالعربيات اللى بمفتاح او بمعنى اصح (أول تكة فالمفتاح قبل ماتدور العربية) بمعنى انى عايز العربية تبقى واصلة كهربا من غير ماتدور بحيث مثلا افتح الزجاج او اشغل الكاسيت او اجرب الأنوار ومن غير ما اضطر اشغل الموتور او احط الكارت ,, بجد الكارت ملخبطنى جدا جدا
عايز كمان اعرف هوه السينسور خلفى وامامى ولا خلفى بس ,,, علشان وانا بركن عمل صوت لما قربت من الخلف لكن لما قربت من الأمام ولا عمل اى صوت؟؟؟
معلش استحملونى بس انا قلت انى هاوجع دماغكوا شوية
الف مبروك العربية و اللون الموكا تحفة عليها
معلش حضرتك نقلت نقلة تكنولوجية ضخمة من نيسان سوبر صالون الى فلوانس هاى لاين، فيه فرق أجيال بين العربيتين فهتحتاج وقت بسيط و بعدين هيبقى الموضوع ولا أسهل
الفلوانس فيها حساسات خلفية فقط و مفهاش أمامية
انت مش محتاج تفتح الكونتاكت علشان تشغل الفوانيس او الكاسيت...الاتنين دول بيشتغلوا بدون فتح كونتاكت
بس الازاز الكهربا و فتحة السقف هما اللى محتاجين فتح كونتاكت و ده بيتم عن طريق الضغط على زر الأستارت بدون الضغط على بدال الفرامل
لما تبعد عن العربية العربية بتقفل لوحدها
لما بتقرب لازم تضغط على الزر الأسود اللى فى أكرة الباب علشان تفتح السنترلوك بتاعها...يعنى مش بتفتح لوحدها لما تقرب
ممكن كمان تقفل العربية من نفس الزر الأسود: دوسة يفتح السنتر و دوسة أخرى يقفل السنتر
دوستين متتاليتين ورا بعض يقفل السنتر و يرفع الأزاز المفتوح كله و يغلق قتحة السقف
تحت امرك فى اى استفسار
تحياتى
اهدى بس و خد الثقه مع العربيه و ابعادها و سواقتها ده الاهم :) . لان العربيه كبيره نسبيا و عاليه من ورا . و كل حاجه هاتعرفها . ده احنا يا راجل لغاية فتره قريبه كنا لسه بنكتشف فيها حاجات مع المهندس هانى . هاتحتاج تقرا الكتالوج و تنزل تذاكر شويه فيها .هههه .و الف مبروك و ربنا يبارك لك فيه .
وضع الكونتاكت فيها انك تحط الكارت فى ال slot بتاعه من غير ما تدوس على زرار الستارت . كده العربيه اشتغلت كنتاكت فقط .
الكارت ده بقا تحافظ عليه كويس . يعنى تحاول ما تخرجوش من جيبك او تمشى به فى ايدك زى المفاتيح العاديه للعربيات التانيه . لانه حساس و غالى و روح العربيه كلها فيه و ما بيتعملش عليه بره . و من اعلى انظمة تشغيل العربيات و له اكتر من استخدام .
أستاذ أحمد .. موضوع اللون صعب شوية وعايز صبر
أنا بعد ما شفت ألوانها كلها (وده كلفني المرور على كل الموزعين والمعارض المتاحة) قررت إختيار اللون العاجي أو ما يطلق عليه أوف وايت ، وده ما ماكانش متوفر .
مندوب المبيعات حاول معايا في اللون الأسود والفضي والأحمر (استلام فورى) ولكنني كنت ولهان باللون العاجي وقلت له سأنتظر حتى يتم توفره ، فلما وجدني مصرا على اللون سأل ودور لحد ما وجد في اللوط اللي موجود في الميناء واحدة .. قلت له السيارة دي بتاعتي إن شاء الله .. بس ماكانش ممكن تخرج لوحدها ، فانتظرت حتي تم التخليص عليها مع لوط للوكيل .. الموضوع ده كلفني إنتظار شهرين بالتمام والكمال
ربنا يوفقك لما فيه الخير
وتقبل تحياتي ،،،