يا جماعة و لا حلقات ولا حاجة
أنا بس عاوز أشوف حد حيهتم و ألا لا , لأن المنتدى غير متخصص و أنا عارف إن الناس هنا إهتمامها الأول و التاني و التالت بالعربيات

المهم

كلمت أقرب مركز خدمة ليا وهو بتاع (بولكلي) اسمهم مودرن على ما أذكر
كلمتهم قولتهلم أول سؤال , أنتوا بتيجوا البيت ؟
قالولي إحنا ما بنعملش غير إننا نروح البيوت
فاستبشرت خيراً

اديتلهم العنوان , تاني يوم على طول أدوني ميعاد وجم بعد منه بثلاث ساعات ( مش مهم دي مصر برضه أنتوا فاكرين نفسكوا عايشيين في استوكهولم ؟)

جاه الباشمهندس ومعاه فني
دخل وأنا كنت مشغل التليفزيون
أول ما شافه ما اتكلمش و لا كشف عليه و لا أي حاجة
قالي ده "تغيير" وطلع دفتر كتب في وصل كتب شوية حاجات و مضاني واداني الصورة وقاللي كلمنا خلال يومين و تابع بالتليفون
قلت بس يبقى الفخ حيكون في اليومين دول حيطولوا لشهرين أو سنيت أو قرنين ألمهم أنهم نقطتين

المهم

يومين و كلمتهم قالولي إحنا بعتنا الفاكس لمصر فممكن تتابع مع مصر أو معانا هنا ففي اسكندرية

قلت دي بداية البعتة

المفاجأة هي إن صباح اليوم التالي جالي مكالمة من انسانة مهذبة جداً قالتلي أنا نهى من فرع العباسية , حضرتك ليك تغيير جهاز عندنا بس في مشكلة
- خير ؟
- الجهاز ده المخزون منه صفر و قدامنا شهر علشان يطلع الإنتاج الجديد , حضرتك تحب تستنا وألا نبدلهولك بالـ Iq وهو نفس السعر ونفس الشاشة (إنما ضخم جداً جداً من ورا)

قلتلها لا ده و لا ده أنا عاوز نفس الجهاز فورا يا إما فلوسي أنا جايب الجهاز ده مخصوص علشان رفيع خالص (عمقه حوالي 20 سم وهو 29 بوصة) فمش معقول تدوني جاهز وأنا مش عاوزه
ده غير إني مقدرش أدفع 2500 جنية و أتفرج على التليفزيون بعد شهرين !!!

قالتلي طيب حقولك على حل حلو

- اتفضلي !

- حنديلك الـ Iq مؤقتاً لحد ما ننتج الـslim

-قلت أه يبقى حتبعتيلي جهاز أي كلام صغير ومستعمل , صح ؟؟

-قالتلي لا يا افندم حبعتلك جهاز على الزيرو بكارتونته و 29 بوصة كمان !

- قلتلها والله يبقى خير

واتفقنا وخلاص

قلت يبقى حينسوني و دمتم

المفاجأة
بعديها بيومين بعتولي الجهاز فعلا .... والله حاجة غريبة ! أنا أول مرة أتعامل معاملة كده في مصر ! كأني في أوروبا يا جدعان !!!

قلت يبقى الفخ أنهم حينسوني لما ينتجوا التاني و حيلبسولي الـ Iq عافية بعد ما كنت رفضه , لبسته بصنعة لطافة

الغريبة بقى إنه جالي عربية من مصر بعدها بأسبوع وفيها جهاز زي بتاعي فعلا

يا عالم !!! هي دي مصر اللي إحنا عارفنا ؟؟؟؟
في ناس رجعت تصدق أقوالها أفعالها تاني ؟؟؟

أنا باحلم ؟؟؟؟

إيه الناس دي ؟

هما ليه مش بيدوا العملاء بالجازمة زي كل الناس ؟؟؟
إزاي بيروحوا بيتهم من غير ما يظلموا حد و لا يطلعوا عين حد !!

أنا باعيط يا جدعان , أنا باسافر كل فترة برة علشان أحس بأدميتي شوية و أرجع
أعتقد السنة دي مش محتاج للسفر كفاية موقف شركة توشيبا العربي عليا

اللهم دمها نعمة و أحفظها من الزوال يا رب