طيب بص خلينى اقولك حاجه كويسه مبدأ خده فى حياتك زى مفى ناس فى الغرب نجحت سواء فى الثراء او فى المجتمع او فى تكوين اسر محترمه فى مصر فى ناس كتير برضه حققت ثراء ونجاح بس الفرق انك تعيش بمبادئ مجتمعك بمعنى ان اللى نجح اكيد شكل فكره وتعامل مع الوضع بالمتاح فى البلد
وخللى بالك ان ممكن اللى انت بتشوفه سئ يكون فرصه بشكل مختلف بمعنى ان فى الغرب النظام جميل وحلو مفيش كلام ولكن النظام ده مش موجود فى بلد زى مصر تفتكر ده شئ سئ لو جاوبت بنعم يبقى انت عندك حق 100*100 ولكن لو انت شخص تانى حتشوف فى عدم النظام ده فرصه كبيره جدا يتمناها الغربي ازاى اقولك انت فى مصر ممكن موظف بنكله يعملك ورق الوزير ميقدرش يعمله "بس تعرف الدخله منين" وفى مصر ممكن تشتغل 5 سنين من غير ورق رسمى "لا ضرايب ولا يحزنون " ومحدش يعملك حاجه بعكس بره الناس بتلطم من الضرايب
وعلشان نكون واقعيين كلنا بنتمنى البلد تتغير ويبقى فيها نظام بس لحد مده يحصل استفيد باللى موجود علشان لو معملتش كده حتشوف الدنيا ضلمه
بنفس القياس شوف كل حاجه
وبرضه علشان اكون صريح معاك مش كل رجال الاعمال فى مصر حراميه ونصابين بس فى مبدأ فى البيزنس ان المليون يجيب اتنين فى ايد اللى يعرف يشغله "وحط تحت اللى يعرف يشغله دى عشرين خط" لانك علشان تعرف تشغلهم لازم يكون عندك خبره وذكاء ومجهود جبار ففى رجال اعمال وتجار "مع الفارق" عاملين ثروات بالحلال .
ولكن السؤال المنطقى دلوقتى اجيب منين الفلوس اللى اشتغل بيها علشان مضيعش وقتك فى فكره موجوده فى كتاب حتفيدك فى الموضوع ده "كتاب اغنى رجل فى بابل" لو فهمتها وطبقتها حتقدر تعمل راس مالك او نواه شغلك وانت بتاخد الخبره الازمه لتشغيله
السؤال اشتغل ايه اولا انسي شهادتك لو كنت واخد شهاده زى اغلب الناس "كليه نظريه بتقدير متوسط" لانك لو اتوظفت انسي انك تكون مختلف عن باقى الموظفين شوف انت بتحب ايه واعمله وانسي كلام الناس
ولك ان تعلم ان اقل صنايعى فى اى مهنه بياخد فلوس اكتر من مدير حكومى ولكن مفيش حد فيهم"ولا المدير ولا الصنايعى" بيعمل ثروه لانه بيخاف عارف ليه علشان يا عنده مسؤليه يا بيعمل لنفسه مسؤليه عارف ايه المسؤليه القاتله دى "الاسره" فرصتك تعمل نواه شغلك قبل متكون اسره لانك لو كونت اسره انسي انك تقدر تشتغل بقلب ميت او انك تدخل صفقه وانت عارف انك ممكن تخسر فلوسك
حاول تبنى نفسك وتخللى العجله تلف قبل متكون اسرتك "دى حاجه صعبه وليها استثناءات بس دى وجهه نظرى الشخصيه"
اخيرا حاول تعمل الحاجه اللى انت عايزها بمعنى انك لو عايز تكون ثروه اشتغل الشغل اللى يكسبك فلوس اكتر بالحلال لو عايز تكون مبدع فى مجال ما اشتغل ولو من غير فلوس علشان تقدر تلم بالموضوع ويبقى عندك فرصه للابداع لو حلمك تكون اسره محترمه"ودى مش حاجه سهله خاصه تربيه الاولاد" اعمل اسره فى اقرب وقت وخللى هدفك انك تربي اولاد ينفعوا الاجيال اللى جايه .
بلاش تيأس مهما كانت الدنيا ضلمه حاول تشوف الفرص وتستغلها.
تحياتى.
المفضلات