تجربتي مع رينو فلوانس 2015

**mario maged** · 14-04-2015 05:46 PM

مبدئيآ انا حابب اشكر كل واحد في قسم رينو و على رأسهم المهندس هاني لانهم اللي لفتوا نظري للفلوانس و مواضعهم مفيدة جدااا و كافية انك تاخد فرارك
اولا انا كنت خلاص هجيب الشارك 2015 بس قبل ما اشتريها جيت ركبتها حسيت اني مش منبهر قوي بشكلها من جوة و ماكنتش مقتنع بيها 100% بس واحد صاحبي قاللي شوف الفلوانس فدخلت على الموقع هنا و بحثت و قريت و بعد كده شوفتها على الطبيعة وبدأت المقارنة بينها و بين الشارك اللي اتحسمت للفلوانس بسرعة جدااا (بجد مافيش وجه مقارنة و بنظلم الفلوانس بالمقارنة دي)
انا جبت الفئة e3 لون رمادي كان عليها خصم 5000 جبتها من التوكيل في المنيا
مميزات العربية ناس كتير اتكلموا عنها و عن الاوبشنز العالية اللي فيها
بس انا حابب اتكلم عن نقطة معينة و هي ثبات و هدوء العربية على السرعات العالية زي 160 مثلا بجد العربية مريحة جداااا في السواقة..صاحبي معاه النترا 2013 كان اصحابي يركبوا العربيتين يحسوا فعلا بالفرق الشاسع في الثبات و الهدوء و عدم الاحساس بسرعة العربية و الدركسيون اللي بيتقل لدرجة ان كان في ملف جامد و اخدته على سرعتي 130 صاحبي قعد يبص في العداد مش متخيل اني علسرعة دي اخدت الملف من غير اي مشاكل !!
واحد تاني صاحبي معاه فوكس 2013 عجبه جدااا سوافة العربية الفلوانس و ثباتها و قاللي كده بالحرف(انا كنت بحترم الرينو بس بعد ماسوقتها احترمتها اكتر و اكتر)بجد انا بالنسبة لي الثبات ده و الراحة في السواقة اكتر حاجة عجباني
طبعا الشكل من جوه فخم جداا بالذات شغل النيكل اللي فيها و العدادات الديجيتال و الخامات الغنية اللي فيها
الشكل من برة حلو بس متضخمة من الاجناب بس ملمومة بردو في السواقة
الكاسيت و السماعات نقي جدااا و فوق المنتاز بعد ماكان فيها زنة طلعت عيب من وصلة ال aux و لما شغلت فلاشة الصوت كان حلو جداااا و بعتذر للفلوانس قدام كل الناس اني ظلمتها في الاول بس طلع العيب في الوصلة
بجد صوت الموتور ناعم جدااا و امبارح حصل معايا كده بالظبط راكب معايا واحد صاحبي وشغلت العربية و صاحبي ماخدش باله و سايبها تسخن قاللي ماتشغل العربية قولتله مشغلها ماكنش مصدق عشان ماكنش سامع صوت خاااالص!! بجد الزيت بتاع التوكيل انا شايفه حلو جداا و مش معلس صوت الموتور و هكمل بيه
طبعا العربية واسعة من جوة و مريحة و الشنطة واسعة
اداء الموتور مرضي جداااا و قوي و اقتصادية في البنزين
بس العربية عاملة لحد دلوقتي800 كيلو بس امبارح ال rpm كان بيعلى مني ل 4 و نص كده فيه مشكلة عشان لسه ماكملتش ال 1000 ولا عادي؟
بجد عربية فوق الممتاز و انا مبسوط بيها جدااااا و لحد دلوقتي مش متخيل ازاي كنت بقارنها بالشارك كل ما افتكر كده اضحك او حتى اللي بيقارنها مع الكوري النترا او سيراتو بجد في فرق واضح جداااا بينهم لصالح الفلوانس
ملحوظة انا معايا قبلها نيسان صني موديل 2000 بس لسه مخليها معايا و مش هبيعها

في النهاية بحب اشكركم و اسف على الاطالة و يارب تكون تجربتي افادتكم

**mmsobhi** · 14-04-2015 07:13 PM

الف مبروك ..ربنا يباركلك فيها ويكفيك شرها..السياره جميله وانتشارها بقي ملحوظ جدا

**drcobra** · 14-04-2015 08:06 PM

ربنا يباركلك فيها
وعقبالنا نستلم قريب يا رب
وشكرا لنقل التجربة

**Hany Saad** · 14-04-2015 08:48 PM

الف مبروك أستاذ mario maged و شكراً على نقل تجربتك لينا و على التقرير الجميل ده
ملحوظتين لفتوا نظرى فى تقرير حضرتك حابب الفت نظرك ليهم
١- تسخين العربية
العربيات الحديثة كلها مش محتاجة تسخين زى زمان بل على العكس التسخين الكتير ممكن يتعب علبة البيئة فى الشكمان او يقصر عمرها....حضرتك دور العربية صباحاً و استنى عليها حاجة زى ٣٠ ثانية او دقيقة كحد اقصى ثم ابدأ التحرك ببطء دون شد او قرص او تعلية لعدد اللفات حتى يصل الموتور لدرجة حرارته الطبيعية ( نصف المؤشر) و بعدها انطلق كما شئت

٢- التليين
طبعاً العربية جاية متلينة من المصنع و لكن للأمان متزودش عدد لفات الموتور عن 3500 لفة و لا سرعة العربية عن ١٣٠ كم/ساعة و ده اول ١٠٠٠ كم فقط

الف مبروك مرة اخرى و سعداء جداً انك مبسوط بالعربية و ان مشكلة الكاسيت اتحلت
تحت امرك دايماً

تحياتى

**ahmed eltaib** · 15-04-2015 01:31 AM

الحمد لله حجزت الفلوينس امس من معرض الطارق ، و بصراحه قسم الرينو هنا كان عامل اساسي في حسم الاختيار ، بس كان عندي استفسار ، فيه زميل قالي لما استلم اخد بالي من ان فيه شبكه لشنطة العربية عشان تثبيت الحاجات اللي في الشنطه
حد عنده تأكيد و توضيح ... و شكرا

**marsguy** · 15-04-2015 04:34 PM

السلام عليكم ورحمة الله وبركاته،،،

الشبكه مش بتيجي مع العربيه

مكانها موجود بس مش بتيجي مع العربيه ببلاش

خلي بالك بردو العربيه مش بيجي معاها دواسات. لازم إنت تشتريلها

**ahmed eltaib** · 15-04-2015 08:38 PM

المشاركة الأصلية كتبت بواسطة marsguy

السلام عليكم ورحمة الله وبركاته،،،

الشبكه مش بتيجي مع العربيه

مكانها موجود بس مش بتيجي مع العربيه ببلاش

خلي بالك بردو العربيه مش بيجي معاها دواسات. لازم إنت تشتريلها

1000 شكر لحضرتك

**mario maged** · 15-04-2015 10:40 PM

المشاركة الأصلية كتبت بواسطة Hany Saad

الف مبروك أستاذ mario maged و شكراً على نقل تجربتك لينا و على التقرير الجميل ده
ملحوظتين لفتوا نظرى فى تقرير حضرتك حابب الفت نظرك ليهم
١- تسخين العربية
العربيات الحديثة كلها مش محتاجة تسخين زى زمان بل على العكس التسخين الكتير ممكن يتعب علبة البيئة فى الشكمان او يقصر عمرها....حضرتك دور العربية صباحاً و استنى عليها حاجة زى ٣٠ ثانية او دقيقة كحد اقصى ثم ابدأ التحرك ببطء دون شد او قرص او تعلية لعدد اللفات حتى يصل الموتور لدرجة حرارته الطبيعية ( نصف المؤشر) و بعدها انطلق كما شئت

٢- التليين
طبعاً العربية جاية متلينة من المصنع و لكن للأمان متزودش عدد لفات الموتور عن 3500 لفة و لا سرعة العربية عن ١٣٠ كم/ساعة و ده اول ١٠٠٠ كم فقط

الف مبروك مرة اخرى و سعداء جداً انك مبسوط بالعربية و ان مشكلة الكاسيت اتحلت
تحت امرك دايماً

تحياتى

شكرا يا استاذ هاني و بجد انا بحترم حضرتك جدااا و بشكرك على تعبك مع كل الاعضاء
بس انا في نقطة التليين انا كنت بجيب 160 و ال rpm كان بيعلى مني ساعات ل 4 و نص كده ممكن يكون في مشكلة للموتور ولا ده مجرد زيادة امان؟

**Hany Saad** · 15-04-2015 11:24 PM

ان شاء الله مفيش اى حاجة هتكون حصلت و الموضوع فعلاً للأمان، يُفضل تاخد بالك من النقطة دى فى الفترة المقبلة و حتى بلوغ ١٠٠٠ كم و بعد كده طبعاً سوق براحتك

تحياتى

-

الموضوع: تجربتي مع رينو فلوانس 2015

LinkBack

أدوات الموضوع

عرض

-

-

-

المواضيع المتشابهه

فلوانس 2015 (عيوب الفلوانس) (استفسار لملاك رينو فلوانس)

رينو فلوانس 2015 ولا سكودا رابيد 2015 ولا شارك 2015

أفيدوني أفادكم الله....لانسر شارك 2015 خليجي ولا رينو فلوانس الفئة الثانية 2015؟

رينو فلوانس 2015 ام كيا سيراتو 2015 مع اعتبار ان الفئتين المقارن بينهم ب 165 الف

رينو فلوانس 2015 ولا تويوتا كورولا 2015؟ و ليه؟

الكلمات الدلالية لهذا الموضوع

المفضلات

المفضلات

ضوابط المشاركة