اقتباس المشاركة الأصلية كتبت بواسطة ibrahiiimooo مشاهدة المشاركة
و الله العظيم و الله العظيم انا كاتب المشاركة دي على عينى علشان اكتر حاجة انا بكرها ان الواحد يمجد في العربية اللي هو راكبها لمجرد انها معاه بس برده بيصعب على الواحد ان يتقال كلام عن العربية (اي عربية ) من غير معرفة لمجرد انه "بيسمع" حاجات عن العربية
باشمهندس احمد
اولا انا معرفش منين حضرتك جبت ان سعر جوز الكبالن للفوكس 1 5000 جنية لان سعر الكبالن الاصلي للفوكس 2012 اقل من الرقم ده بكتيير و ده رابط لاسعار قطع غيار الفوكس 2012 من التوكيل
http://www.nilemotors.net/nile/309717-2012.html
و برضه ده لو رقم صحيح فيل ربت حضرتك تقولي اسعار الكبالن الاصلي من التوكيل للبروتون و السيراتو و السيات التوليدو و الانسر و غيرها من التوكيل, يكفي اقول لحضرتك اني مركب كوبلن خارجي شمال صيني معفن ب 140 جنيه بقاله 3 سنين مكحش
العربية ليها قطع غيار جديدة الماني و ايطالي و تركي و صيني برخص التراب و بالمناسبة الكوبلن الاصلي عليه ضمان مدي الحياة طول ما تعمل صيانة منتظمة و بينبص على الكاوتشة بتاعة الكوبلن
البوجيهات الاصلي ب 110 جنيه اللي ب 240 دي البلاتينيوم اللي بتعد 40 الف كم
ما عرفش ايه هو مسمار الكاتينة لان اللي بيغير كاتينة بيغير سير و بلية الشداد بتاع الكاتينة و بيتتباع طقم على بعضة عمرنا ما غيرنا "مسمار كاتينة"
قطع الغيار مالية الدنيا في كل حتة و اسال اي حد راكب عربية فورد بيتعب في انه يجيب قطع الغيار و لا لأ (يا ما لفينا الحرفيين على قطع غيار البروتون الجين 2)
التكييف ضعيف ازاي؟؟؟ الا لو العربية اللي حضرتك ركبتها كان فيها تسريب فريون
قطع الغيار اللى قلتها هى للفورد فوكس سيارة زميلى فى العمل موديل 2006

أنا كاتب المشاركة اساسا علشان موضوع تمجيد كل واحد لعربيته و هو مش عارف ان دى شهادة ممكن بسببها غيره يضيع تحويشة عمر بسبب كلمتين

أنا بسمع كلام عن العربية ...لأ.....أنا كنت بروح معاه اشترى قطع الغيار

لما قال لى زوج الكبالن ب 5000 آلاف الاصلى ما صدقتش الرقم اساسا و قلت اجيبهم لك باقل من كدة عن طريق النت و آخد الفارق مهما كان وافق (هو اكبر منى ب بحاجة و عشرين سنة) دخلت فعلا لقيت العملية تقربا بعد الشحن و العمولات محصلة بعضها

البوجيهات الاصلية للموديل دا مكتوب على العلبة فورد من محل عند بتاع المبردات فى شارع الجلاء ظهر جمعية الشبان المسلمين

حضرتك بقول عمرك ما سمعت عن مسمار كاتينة بس دا كلام زميلى المسمار بيقفل على رجلاش للبلية و العامل معانا فى المكتب بيشهد على ثمنه و العربية ما فيهاش ضبط تقسيمة ساعة تغيير السير و لو فكيت المسمار دا بيتلف و دا السر فى سعره المبالغ فيه زى بقية قطع الغيار المولعة

للاسف كلامك فكرنى ببقية قطع الغيار اللى اضطر يغيرها
زيت فتيس ب 1200 جنيه (للبيجو ال 406 2000 سى سى 500 جنيه و للرينو 120 جنيه نفس موديل هذه السنين ) الفتيس له فلتر بيتغير و متركب مغناطيس تحت علشان الرايش

طلمبة بنزين اصلية ب 2500 جنيه و استيراد 1800

بادج الفورد ب 250 جنيه اللى على الشنطة

جوز مرايات أجناب ب 2500 جنيه او 3000 مش فاكر - صينى بغماز جانبى الجوز ب 1200

مقبض الباب مالقهوش جديد

عقربة فتيس (حتة كارتة كمبيوتر) عند اكرم جروب لما كان ماسك التوكيل ب 4000 آلاف جنيه

قطع الغيار عند بدروسيان فى التوفيقية و محل فى مصر الجديدة و اكرم دا كان شماط

تيل امامى اصلى مش فاكر ب 600 او 850 جنيه

ليه يعنى كل دا لعربية موديل 2006

لما نزل اعلان للعربية 3 اتصلو بيه

انا لما قيمت العربية ذكرت نقاط القوة فيها بجانب نقاط الضعف و دا اللى حبيته يكون فى رد حضرتك

و اخيرا زميلى بعد ما جاب جوك 2014 بيتحسر على الفورد دى لمتانتها و بيتمنى لو كان لحق عروض الفطيم الوكيل الجديد على العربية