الموضوع: ارجو سرعه الرد ...الفحص بكره

يا باشا ما هو خد الرخصه عشان منتهية ..وسابلك شهادة البيانات دي مكان الرخصه في إنهاء الإجراءات بتاعة التجديد ..حضرتك هتروح بكره المرور وتقف في طابور الفحص عادي جدا من بدري ..ودي مشاركة ليا كنت كاتب فيها كل إجراءات تجديد الرخصة ..طبعا حضرتك هتعمل كل حاجه أنا كاتبها بإستثناء الجزء بتاع النيابه وشهادة المخالفات والجزء الأخير بتاع الضريبه عشان حضرتك دافعها وكل كلمة ..رخصه.. وردت في المشاركة هتشيلها وهتحط مكانها شهادة البيانات اللي معاك


بص أنا هقولك على اللي حصل معايا والكلام ده في مرور طوسون في منطقة المنتزه بالإسكندرية وبصراحه كان معايا واحد صاحبي جري معايا في الموضوع ده
1- أخدت معايا العقد مسجل بالشهر العقاري وماضي في مشتري
2- أخدت معايا اصل بطاقتي وأصل الرخصه
3- كنت واقف على باب المرور الساعة سبعة الصبح ولقيت قدامي تلات عربيات ..واضح إنهم من المنطقة أو مبيتين عربياتهم قدام المرور
4- اول ما الباب ما فتح دخلت وقفت عربيتي في طابور الفحص وطلعت جري جري دفعت التأمين وخصوصا إن مهندس الفحص جه على الساعة 9 ..وأول ناس بيشتغلوا بتوع التأمين ..وفي الغالب عشان دي شركات خاصة فيهمهم قوي إنهم يشتغلوا بدري
5- رحت إشتريت ورق فحص وتجديد ونقل ملكية ..وأنا سايب العربيه في طابور الفحص
6- لقيت بتاع الطفايات جه روحت وريته الطفايه ودفعت اللي فيه النصيب وختمت وصل الطفاية
7- كان صاحبي جه إديته مفاتيح العربية وقلتله العربيه واقفه أهو في طابور الفحص ..شوف شغلك وإديته الورق اللي أنا أشتريته بتاع الفحص والتجديد ونقل الملكية وأنا رحت على النيابه عشان أطلع شهادة المخالفات وكان معايا أصل بطاقتي وأصل الرخصه وأصل عقد البيع لنفسي وأصل التوكيل..المرور اللي أنا تبعه النيابه بتاعته في المرور نفسه
8- رحت طلعت الرقم القديم من شباك كده بس مش تبع النيابه هو جوه المرور بس مش تبع النيابه ورحت عشان أقف في طابور قدام النيابة أسلم الرخصه وانتظر عشان أستلم الشهادة
9- ربنا يسر الحال ودخلت النيابه أستلم شهادة المخالفات عشان لو فيه حاجه لا قدر الله أدفعها ولو مفيش تدفع خمسة جنيه وتستلم شهادتك
10- لسه الموظفه بتطبع الشهاده من على الكمبيوتر ..يعني لسه هتتختم وهتتمضى من وكيل النيابه ..لقيت صاحبي بيتصل بيا على الموبايل بيقولي هات الرخصه وتعالى حالا أنا واقف قدام المهندس ..قلت للموظفه هاخد الرخصه في غمضة عين هوريها للمهندس بتاع الفحص وجاي علطول وآدي بطاقتي معاكي أهي عشان تضمني إني راجع تاني ..وقد كان ..جريت على صاحبي في طابور الفحص والمهندس شاف الرخصه وقام مالي الورق بتاعه وإداني الرخصه تاني وطلعت جري على النبابه تاني
11- في النيابه قالولونا إطلعوا بره لغاية الشهادات ما تتمضى من وكيل النيابه ..وأدونا بطاقاتنا ورخصنا
12- كان صاحبي خلص العربيه وطلعها ركنها جمب المرور بره
13- رحت إشتريت شنطة إسعافات ومثلث وإتختم الوصل بتاعهم ..الست بتاعة الشنطه والمثلث مكانتش جات الصبح لما خلصت في الطفاية
14- رجعت جري على النيابة عشان بدأوى يندهوا على أصحاب شهادات المخالفات وإستلمت شهادة المخالفات ..بصرف النظر عن إن هما ضيعوا الرخصه وقعدت أدور عليها وظرفت الوله المخبر عشره جنيه عشان يدور عليها ..بس المهم إستلمت شهادة المخالفات في الآخر
15- خدت بقى شهادة المخالفات والورق اللي أنا شاريه اللي هو ورق التجديد والفحص ونقل الملكية وطلعت عدل على مدير الوحده .البيه الضابط عشان يمضيلي على الورق ده كله
16- رحت دخلت جوه وشفت النطاق بتاع نمر عربيتي مع أنهي موظف ..عشان النمر بتاعة العربيات اللي تابعه للمرور مقسمه على بتاع خمسة أو عشرة موظفين ..كل موظف معاه جزء
17- حددت الموظف اللي نمر عربيتي في تبعه و قمت رايح شايف عسكري عشان يجيبلي ملف العربية من الأرشيف عشان يديه للموظف اللي أنا تابع له في نطاق الأرقام وطبعا إديت الرخصه للعسكري اللي جابلي الملف من الأرشيف
18- بعد كده بتجيب عسكري تاني غير العسكري الأولاني ..لإن العسكري الأولاني شغله جوه المبنى بس ما بيطعلش بره عند المهندس ..المهم بتجيب عسكري تاني عشان ياخد الملف من الموظف ..الملف اللي العسكري جابه من الأرشيف والملف الجديد اللي إنت إشتريته واللي فيه ورق الطفاية وورق الشنطة وورق المثلث ووصل التأمين وفيه برضه ورق التجديد والفحص ونقل الملكية ..ويقوم العسكري ده بقى اللي إنت جبته يطلع ياخد الملفين ويروح بيه لمهندس الفحص عشان يطابق البيانات ويقوم ماضي
19- الملف بيرجع تاني للموظف اللي قاعد جوه تقف قدامه بقى عشان تقدر الضريبه
20- الموظف يقدرلك الضريبه تقوم واخد ورقة التقدير دي وتطلع على الخزنه عشان تدفع الضريبه
21- بعد ما تدفع الضريبة تقوم راجع تاني للموظف بوصل الخزنه إنك دفعت الضريبه
22- بعد كده يقولك روح شباك الكمبيوتر إستلم رخصتك
24- تروح تقف قدام شباك الكمبيوتر وتستلم رخصتك وبعد ما تستلمها تراجع بيانتها كويس قوييييييييييي..ويكون معاك صورة من الرخصه القديمه اللي مكانتش بإسمك عشان تطابق أرقام الموتور والشاسيه ليكون فيه حاجه مكتوبه غلط ..وتراجع برضه على تاريخ الفحص اللي جاي إنه بعد تلات سنين وتاريخ الضريبة لو دافع سنه أو سنتين أو تلاتة
25- بعد كده تروح تنام بقى عشان تريح أعصابك من اليوم العويص ده