السلام عليكم و رحمة الله و بركاته

الحمد لله استلمت العربية E3S رمادى اول امبارح بعد معانة مع التوكيل فى ابو رواش لإن البيه بتاع المبيعات بتاع فرع الدقى مكانش مجهز الورق و معرفهم انى جى استلم رغم انه مأكد عليا من قبلها بيوم، وانا اللى جريت ورا الورق لحد ما جبت رقم الشاسية و الموتور و دفعت و جبت الإفراج الجمركى بالفاكس لإنهم ماكنوش مجهزينه عشان مش عارفين انى جى.

المهم ان التوكيل يبقى احسن من كده فى المستقبل و حعتبر ده عيب مبيعات مش اكتر لأنى سامع ان سمعة التوكيل كويسة و عندى حوالى 6 من اصدقائى اشتروا نفس العربية و بيشكروا فيها اوى

النطباع الاول عن العربية ان السواقة ناعمة جداً بالمقارنة ب عربيتى السابقة اوبل استرا انجوى 2008 رغم ان طبعاً مفيش مقارنة فى التسارع و عارف ان الرينو مش للجرى ولكن للسواقة الهادية وتوفيرها للبنزين ممتاز مقارنة بالسيارات التانية فى نفس الفئة و للحق العربية تحس انها فخمة من اول لحظة بتحط رجلك فيها.

كنت عايز اسأل ايه احسن فرع للصيانة هل العبور (اقرب واحد ليا) ولا ابو رواش ولا حد تانى؟

و موضوع الزيت هل لو تنحت معاهم حيغيروه ل 5w30 ولا حيسخفوا والمتور بره الضمان. لأنى مش مقتنع ده فى الأخر زيت ايه اللى حيبوظه فى الموتور؟ لأنى بفكر اغيره على 1000 كم.

و اخيرا احب اشكر كل اعضاء اسرة رينو فى المنتدى على ذوقهم و موضوعاتهم المهمة و اخص بالشكر الأستاذ ياسر و الأستاذ هانى على معلوماتهم اللى مش بيبخلوا بيها على اى حد و مشاركتهم المهمة جداً