تجربتي ف مركز "المتحدة" لتغيير جوان وش السلندر لإسبرانزا 516
السلام عليكم ورحمة الله وبركاته
إلحاقاً للموضوعين السابقين http://www.nilemotors.net/Nile/463127-a516.html و http://www.nilemotors.net/Nile/463643-a.html قررت التوجه لمركز "المتحدة" لصيانة السيارات بناء ع تجارب أعضاء المنتدى .. دخلت المركز يوم الخميس 16 ابريل حوالي الساعة 2 الضهر وإستقبلوني هناك وأول شئ عملناه هو كشف بالكومبيوتر وطبعاً الأخطاء اللى لقيناها ملهاش علاقة بمشكلة السخونة ... ولكن تحت ضوء الشمس لفت إنتباهنا وجود اثار بيضاء غالباً "ملح" من "تنشيع" مياه على يمين الموتور ف الجزء المتواجد فيه "جوان وش السلندر" وكانت دي العلامة الأكيدة اللى بتدل على إن الجوان ضرب بالفعل .. قررنا نفتح الموتور ونعمل الجوان وتغيير "الريداتير" لإنه حسب كلام الفنيين هناك هو السبب الرئيسي ف المشكلة ... بدأنا فك وش الموتور الساعة 4 العصر تقريباً ... ولما إنتهينا من الفك لقينا "الجوان" فى حالة صعبة وكان بالفعل ضارب خالص وشكله يسد النفس .... وبعد كده تم كشط وصنفرة الوش من أثار الجوان القديم وتم قياس درجة الإعوجاج وللأسف لقينا إن البلوك السفلي فيه إعوجاج وبالتالي مش هينفع نركب جوان "صاج" إلا إذا البلوك راح للخراط وعمل كشط وحوار هياخد 4 ايام عمل زيادة وتكلفة تصل إلى 1500 جنيه بمصنعيات المركز ... قررت اللجوء للحل التقليدي وهو تركيب جوان "جنجريد" والمركز حسبه عليا بـ55 جنيه مع العلم إنه ف اى محل بـ35 بس مش مشكلة ... المهم إن اليوم الأول إنتهى بتركيب الجوان وقولتلهم ف المركز انى عاوز اكشف ع "طلمبة المياه" فبدأنا نفك الجنب اليمين من الموتور اللى طلع ف النهاية هو اصعب بكتير من عملية تغيير الجوان بمراحل ... و لقينا إن "طلمبة المياه" الفايظ بتاعها بينقط وكفائتها ف التقليب مش اوي ... ولقيت ان قاعدة الموتور اليمين جابت أخرها برضو ... وأولسيهات الكامة والكرنك بتجيب زيت ... وسير الكاتينة عليه زيت وشكله بصراحة مكانش عاجبني خالص ... وقررت انى اجيب كل قطع الغيار من بره المركز بمعرفتي انا والعربية باتت ف المركز ... تاني يوم روحت "شركة الجيزة" ف شارع المطبعة ف فيصل قبل صلاة الجمعة واشتريت من عندهم الأتي : ريداتير بـ350 جنيه طلمبة مياه بـ150 جنيه سير كاتينة بـ170 جنيه قاعدة موتور يمين بـ135 جنيه أولسيهات (2 كامة و 1 كرنك) بـ15 جنيه الواحد جوان تاكيهات بـ35 جنيه وطلعت بعد كده ع المركز وبدأنا الشغل بعد صلاة الجمعة مباشرة .... قفلنا وش الموتور بالكامل وبعد كده ركبنا الطلمبة والأولسيهات ولقيت إن (البلية المتحركة) بتاعة الكاتينة حالتها زفت خالص وقربت تتقطم خلاص وللأسف كنا فتحنا سير الكاتينة اللى اشتريته والمركز رفض يبيع ليا طقم بلي كاتينة من غير السير وعاوزين يحسبوه عليا بـ560 جنيه بدون ضمان .... المهم وصلنا لحل يرضى كل الاطراف وهو انهم جابوا بلية "مستعملة" من عندهم وحالتها كويسة وركبناها وتم تدارك الموقف .... وبعد ما خلصنا كل الشغل مكانش فاضل غير تركيب "الريداتير" ... وبالفعل ركبناه وبعد كده أثناء التجربة واحد من الصنايعية شد الخرطوم اللى بنطلع منه الهوا بتاع الريداتير وللأسف كسر "البوز" البلاستيك بتاع الريداتير اللى لسه راكب من دقايق .... انا بصراحة كتمت غيظي وقولت لما أشوف هيتصرفوا ازاي ف المصيبة دي .... جابوا مادة لحام كده قعدوا يلزقوها وبتاع وبعد كده جربناها ولقينا "تسريب" منها .... فبصراحة مدير المركز مشكوراااااا أداني حق الريداتير ومفتاح عربيته الخاصة وقالي أطلع هات واحد تاني ع حسابنا ... وبالفعل طلعت بعربيته جبت واحد تاني ورجعنا ركبناه وكل شئ تمام وكشفنا بالكومبيوتر وتمت العملية على خير .... فاتورة المركز : البلية المستعملة 100 جنيه الجوان وشوية كاوتش وحاجات كده 90 جنيه مصنعية جوان وش السلندر + فك وتركيب طلمبة المياه + فك وتركيب قاعدة الموتور + فك وتركيب الريداتير + فك وتركيب سير الكاتينة والبلية + كشف الكومبيوتر أكتر من مرة = بعد الخصم والجدال 450 جنيه تقديري للمعاملة ف المركز = 8 من 10 مهارة الصنايعية = 9 من 10 أسعار المصنعيات وقطع الغيار ف المركز = 6 من 10