و عليكم السلام و رحمة الله و بركاته ... وانت بخير يا باشا :)
بص يا باشا ...
أنا هقولك رأيي الشخصي و اللي انا مقتنع بيه جدا ...
مبدأياً لازم تعرف ان عربية الوكيل الرسمي هي خليجي أصلاً .... يعني مواصفات خليجية ... و ده مكتوب عليها على قايم الباب .... لأن مصر ملهاش مواصفات ... و الاستيراد لازم تقول عايز العربية بأنهي مواصفات ... فمصر بتقول عايزين مواصفات خليجي ... وده مكتوب عليها زي ما بقولك ....
و بالتالي فكلمة خليجي لوصف العربيات اللي مش وكيل كلمة مضلله و تعطي معنى غير صحيح ... المفروض تكون اسمها عربيات بدون ضمان اليابان !!!
ثانياً ... نيجي بقى للفرق بينهم .... الفرق ببساطة ان عربيات الوكيل الرسمي مضمونة من ميتسوبيشي اليابان رسمياً 100 الف كم أو 3 سنين ....
و ده معناه ان لو ظهر عندك أي مشكلة في العربية ليست سوء استخدام ... هتتصلح مجاناً و لو مشكلة كبيرة ممكن توصل انه ميتسوبيشي تغيرلك العربية كلها ....
لكن اللي من غير ضمان الوكيل الرسمي ( اللي بيطلق عليها التجار خليجي ) دي يا باشا لو لا قدر الله واحد اكتشف مشكلة في العربية .... من الآخر هيلبسها ... أيا كانت التكلفة ... وميقدرش يفتح بقه لأنه شاريها من غير ضمان الوكيل اللي ميتسوبيشي اليابان قالت عليه ...
طبعا في شركات بتقول انها بتبيع لك ضمان ... بس سؤال ... هو يعني ايه ضمان أصلا ؟؟!! ... هل لو اكتشفت مشكلة عيب صناعة في الموتور مثلا أو العفشة هيغيرهالك مجاناً ؟؟!! .... طبعا مستحيل .. لأن اليابان مش هتديله قطعة الغيار مجاناً لأنها مش ضامنة العربيات دي و متعرفش حصل فيها ايه ...
و طبعا العربيات الغير مضمونة ( الخليجي ) بيضيفولها في المعارض ( لك ان تتخيل ) كماليات صيني للصبح زي ماهم عايزين بقى و ارفع في السعر يا باشا .... و الكماليات دي كلها تقدر تركبها انت في مشوار لشارع دمشق ب 6000 جنيه بال dvd بالكاميرا بالسبويلر بكل حاجة .... طبعا هو مركبهم و بيزود سعر العربية 20 الف مثلا !!!
و طبعاً في نوع تالت بيسموه شرق أوسط ... وده ينطبق عليه نفس الكلام ... من غير ضمان ...
فأنا رأيي الشخصي اللي أنصحك بيه أمام الله .... انك خليك في الوكيل ... انت دافع مئات الآلاف ... مينفعش تجيب حاجة مش مضمونة .... افرض احتمال 1 % لقيت عيب صناعة ... حرام تلبسه ... ده اللي بيشتري تلاجة بيسأل عالضمان يا راجل !! .... انا مرة اشتريت تابلت سامسونج من السعودية و مكنش له ضمان في مصر ... بعد ما شغلته بيوم واحد جاب بورده والله العظيم .... طبعا الحمد لله كان معاه ضمان سعودي و رجعته السعودية وجالي واحد تاني .... لكن تخيل بقى لو مكنش معاه ضمان ... كنت لبست ال 3500 جنيه دول !!!
دي نصيحتي ليك ... و ربنا يوفقك :)
المفضلات