الموضوع: باركولى اولا على الفليشيا ، و ساعدونى فى استفسار فى : السلانسية - الحرارة - الكهرباء

الســـــــلام عليكم و رحمة الله وبركاته

الاخوة الكرام ،،

أولا انا لسه جديد لانج عليكم هنا ، لسه جايب فليشيا 96 طازة امبارح ،، بس محتاجة تظبيطات كتير و عاوزكم تساعدونى فيها

اول ما جبناها روحنا غيرنا زيت و فلاتر و الذى منه ، بس الميكانيكى لاحظ ان العربية صوتها عالى جدا و كدا هاتاكل بنزين
فتقريبا خفف مسمار السلانسيه شوية علشان توطى ، مش عارف إذا كان السلانسية ولا البنزين تفيدونى انتوا بقى فى النقطة دى

لكن المشكلة بعدها ان واحنا ماشيين بالعربية لو شيلت رجلى من على البنزين العربية تبطل !
لو و هو واقفة و بعد ما دورتها شيلت رجلى من ع البنزين برضه تبطل

فكدا ايه الحل علشان اظبطها تانى ؟ مسمار السلانسية برضه ولا حاجة تانية ؟


-----------------------------------
التابلوه فيه حاجات كتير مش شغالة ، و احيانا تشتغل ولا احيانا لأ ( لمبات الاشارات فى التابلوه )
و الكاسيت واقف ،، و المساحات برضه مش شغالة ( تسمع زنة الموتور بتاعها و رعشة فيها بس هى مابتتحركش )
المشكلة الاكبر ان عداد التانك برضه مش شغال ، و اللمبة على طول منورة حتى بعد التفويل .. و لمبة الزيت و البطارية بيرعشوا فى التابلوه طول ما العربية ماشية !

الراجل اللى اشتريناها منه قال انه كان اداها لواحد ينضف العربية و تقريبا رش مية فى حتة غلط و من بعدها و هى بتعمل كدا ... و انه حاول يصلحها و راح لواحد فك التابلوه و قاله ان التابلوه توصيلاته سليمة و المشكلة مش منه

فكدا المشكلة ممكن تكون من ايه ؟ و الفيوزات ليها دخل بالموضوع ؟ ولا دى حاجات كتير اتحرقت و هاتنفخ فى تغييرها :) !؟

-----------------------------------

الحرارة ،، الغربية انى مش هاشتكى انها عالية ،، لأ
الحرارة على العداد بتاعها فى التابلوه ناااادرا لما بتعدى 90 !! مع العلم اننا ماشيين بيها العصر مشوار طويل بتاع 150 كيلو و برضه على الحال ده .
كنت قلبها بسأل صاحب العربية على ظروف الحرارة قالى انه غير دورة التبريد كاملة و مظبطها ع الآخر و مظبط المروحة انها تشتغل على 70-80 .. فكدا معنى كلامه انها شغالة طول ما العربية ماشية ؟؟

و بعدين انا سمعت من المنتدى ان الحرارة المثلى ليها 90 علشان دورة الزيت تكتمل فى الموتور و يبقى سحبها و حرقها مظبوط ، الكلام دا صح ؟

و لو صح ايه التغييرات اللى انا محتاجها علشان اظبط الحرارة على 90 .. و لو مش صح ايه الطريقة اللى اعرف بيها ان عداد الحرارة فعلا بيقرأ صح ؟

و ربنا يقدرنا على فعل الخير