كوارث فى الفليشيا عايز اولع فيها,,,أرجو النصيحة

**NEW2014** · 25-04-2015 05:35 PM

الأخوة الأفاضل بالقسم أنا خلاص عايز اولع فى العربية بجد

المشاكل تتابعها كالتالى :

1 _ العربية وأنا ماشى وقع سير الدينمو وطرمبة المية النتيجة طبعا معروفة درجة حرار 110 جوان وش سلندر ضرب,,,العربية بقيت عمالة تنتش طبعا حتى بعد ماركبتة والطحينة ظهرت فى الزيت والقربة والحل كان طبعا تغيير الجوان فك ياعم الميكانيكى اكتشف ان الوش كان مخروط قبل كدة كذا مرة وواخد معجون روحنا المخرطة واحد مارضيش وواحد تانى قال فى حل يزودة بانة يسيح علية ألمونيا وبعد كدة يخرطة وبالفعل أتعمل المطلوب وجبناة تمام ركبة الميكانيكى واعربية جبتلها 2 جوان وش سلندر أصلى 1.8 مم وخدت الجوانين مع بعض بعد كدة خدت العربية تمام وزى الفل والميكانيكى ظبط الكهرباء والتاكيهات على 15 والعربية بقيت خرافة قولت بقى اظبطها وأروق عليها واعملها دورة غسيل للتبريد المهم بتاع الريدياتير فك الخراطيم وحط خرطوم مية كدة وشغل مية عادية من غير دفع ولا حاجة وقالى هات جيركن مياة خضراء أسمة ماستر بــ 17 جنية وحطة وقفل العربية فى دقايق ومشيت روحت عشان اغير زيت كمان وغيرت زيت وفلتر وكلة زى الفل...الكارثة الاولى طلعت من البنزينة كام متر ولقيت الحرارة بتجرى روحت راكن فورا أنزل أبص لقيت قربة المية فاضية ومافيش مية ولا أى حاجة أستنيت العربية بردت وبالعافية وصلت للميكانيكى تانى لأن القربة ترست ومش راضية تفتح ازود,,,المهم الميكانيكى لقى الزيت طحن والسحب مافيش وكل حاجة ظهرت تانى المهم فتح يحرق على جوان وش السلندر لقى المية الخضارء ضاربة فى الموتور قالى بتاع الريدياتر ماداهاش هواء طيب ياعم الحل أية قالى نغير الجوان تانى

2_ تانى يوم روحنا نغير الجوان تانى وجبت 2 جوان أصلى جديد ورايح اغير ونمشى البية وهو بيفك أكتشف ان فى طابات فى الماتور مشروخة هى اللى ضربت مية فى الماتور طيب ياعم الحل اية قالى نخرط زيهم ماشى ياعم خرطنا جديد وركبهم وقولت عشان مش ناقصة لن وش السلندر مش مستحمل غلطة تانى هيضرب فخليها على الجوان عشان أبقى مطمن ان الحرارة مابوظتهوش وغيرنا الجوان وكلة تمام قالى ماتغيرش بقى زيت أستنى تعالى كمان كام يوم احرقلك على الوش ونظبط التاكيهات عشان مش متظبطة والعربية فعلا بقيت بطيئة جدا فى السحب خصوصا السرعات الأولى تنزل من المطب تحس نفسك زحلفة والعربيات بتطير من جنبك المهم قولت مش مشكلة المهم أن الطحين اختفى فعلا من الزيت دة عبقرى والمية فى القربة ما بتنقص خالص وكلة تمام كدة,,,روحتلة بعد كام يوم يحرق على الوش ويظبط تاكيهات المهم البية وهو بيحرق على الوشط شرخ البلوك وماخدش بالة وبعد ما ظبط كل حاجة والتاكيهات وكل حاجة وجربنا العربية بقيت تمام قوى وانا ماشى قالى أستنى لقينا مياة تحت العربية جت منين بنبص لقينا شرخ جنب بصمة الماتور جايبة حنفية مية,,,أية دة ياعم الحاج يقولى معرفش مش منى مسكت فية والخلاصة صاحب الورشة قال نفك الماتور كلة عشان مش هينفع يلحم الشرخ عشان البصمة هتروح والعربية داخلة فحص ولما نفكة ممكن نغير فارغة وخلاص لما فكينا لقينا الفارغة مش هتنفع راح الميكانيكى أخترع نلحم المنطقة من جوة عشان البصمة وفعلا أتفور الماتور كلة وراحت المخرطة لحم من جوة الأمونيوم وحط كمان فوق اللحام أمبوبتين حديد وجنب البصمة حط كمان حاجة بسيطة بس بعيد عن الأرقام,,,المهم جبنا جوانات للمرة الثالثة أصلية وزيت جديد وكلة وكانت المفاجأة ودى الكارثة الثانية وهى أن الماتور طلع كان ملحوم قبل كدة أصلأ ألومنيوم من حتة مش باينة تحت كدة وكمان أسطوانة الدبرياج قالى دى معمولة عمولة مش بتاعتها ولأنى طبعا قرفان قولتلة قفلها مش هجيب حاجة وبعد كدة خلص الشغل وقفل كل حاجة,,,طبعا وهو شغال مش طايق نفسة ولقيتة بيحط فى الكربراتير بنزين وهو بيقفل مش إسبراى والعربية سامع فيها صوت سكسكة كدة قولتلة دة أية قالى دة الزيت لسة ماسخنش وهيروح لوحدة وفعلا راح بعد شوية بس بردة سامع أصوات فى المكنة ومش ناعمة زى الاول قولتلة انت ظبط تاكيهات قالى أة بس خليتها على 20 عشان 15 هتبقى محملة قولتلة ما انت عملتها 3 مرات 15 قالى عشان السحب يبقى كويس والبنزين أستهلاكة يبقى أأقل قولتلة طيب الصوت دة من أية قالى هيروح لوحدة عشان غسلت ببنزين,,,المهم لاحظت الشوكمان بيجيب مية لونها أسود تنقيط وكمان دخنة سوداء وساعات بيضاء قولتلة دة أية قالى دة تعريق الماتور ما شاء الله كويس بيعرق قولتلة طيب والدخنة قالى دة عشان الجوانات بتحمص ,,,المهم خدت العربية وحسيت أن العربية عمالة تنتش جامد ومثلا لو هديت وجيت تغذى بنزين تحس العربية بتخبط وتقعد تنتش ولو هديت قوى عشان مطب او أى حاجة العربية تبطل,,,المهم فجأة وأنا فى طريقى لقيت المؤشر اتحرك بتاع الحرارة والمروحة ما أشتغلتش روحت واقف العربية وصلت 90 والمروحة واقفة بردة مع إنها بتشتغل عندى على 70 عشان متركب ثيرموستات فيات ولما سألتة وإحنا فى الورشة قالى الثرموستات علية زيت عشان كدة بتعلق,,,المهم بعد كدة لقيت المروحة شغالة روحت مدور ومشيت لحد البيت عمالة ترجرج وتخبط وصوت التاكيهات وشخللة فى المكنة وقرف روحت راميها تحت البيت,,,بعدها بيومين جيت نازل لقيت المية قلت بس حاجة بسيطة قولت أشوف الزيت حسيت نزل بس فرق بسيط قوى يعنى بقى فى 2/3 المنطقة بين العلامتين يعنى,,,جيت بدور العربية بقيت عمالة تبطل ولازم أفضل مغذى بنزين عشان تفضل دايرة ولو رفعت رجلى من الدواسة بتاعت البنزين تبطل مع انى سامع صوت المارش لكن الماتور مش بيلقط روحت مقفلها وسايبها وخدت قرار البييييييييييييييييييع

أسف جدا للإطالة بس حبيت أحكى كل حاجة لوحوش المنتدى عشان حد يقولى أعمل أية خصوصا أن ماليش نفس أبص حتى عليها ولا ألمس مفتاحها وكفاية مصاريف لحد كدة و15 يوم مرمطة مع الصنايعية وفكرة الإستيراد وتسقيط ماتور بردة هتبقى انت وحظك وهيبقى نفس المشكلة وهى يجى ميكانيكى يغلط غلطة بسيطة فى الماتور الجديد ( دة على إفتراض أن الإستيراد طلع كويس مش فية نصيبة ومش باين ) هلبس الماتور الجديد كمان وهبقى عمال أرمى فلوس فى الأرض والعربية مش هتجيب حتى ثمنها الأولى

ياترى الوضع كدة أية والنظام أية عشان الواحد ندم ندم حياتة أنة فكر فى المستعمل؟؟؟

**adhmmaamon** · 25-04-2015 08:49 PM

لاحول ولاقوه الا بالله ..
اولا ربنا يعوض عليك فى القرف والمصاريف اللى انت صرفتها .. وواضح انك وقعت فى صنايعى واخد الشغلانه بالعافيه .. وللاسف معظم اللى فى السوق كده عفيجيه مش صنايعيه ..
ثانيا مفيش قدامك الا حل واحد حتى لو ناوى تبيع (علشان لو بعت بالشكل ده هاتخسر كتير ) لازم تسقط مكنه استيراد (شورت بلوك ) بتبقى موتور بدون ادوات تغذيه .. يعنى من غير فتيس ولا كربراتير ولادينامو .
وده هايعمل فى حدود 2000الى 2200 جنيه كمان هايبقى موديل حديث 2001 كمان مفيش حاجه اسمها بختك يابو بخيت (انت هاتاخد الموتور على التجربه من اسبوعين ل شهر ومش هاتدفع كل الفلوس الا بعد التجربه واستلام اوراق الافراج الجمركى وكويس انك داخل على فحص علشان تثبته على الرخصه )
وهاتخلى الموتور اللى عندك سبير تاخد منه اى حاجه على سبيل المثال ممكن قدام جدا تاخد منه طقم العمره كامل شمايز وبساتم وكمان وش السلندرممكن تستعمله .. مفيش قدامك الا الحل ده وان شاء المولى هاتعرف اد ايه العربيه دى جميله بس اقل غلطه من حمار فاكر نفسه ميكانيكى بتبهدلها ..
مره تانيه ربنا يعوض عليك

**Abo_Mazen** · 25-04-2015 10:27 PM

برضه مش هقدر أقولك غير ..سقط مكنه ..على فكره ..أنا أعرف ناس سقطت مكن ..وكان تعاملهم مع تجار من نوعية ..تجار زي الدهب ..يعني ممكن تروح لتاجر أغلى ب 300 أو 400 جنيه ..بس تاجر صح ..تاخد منه الحاجه وإنت مطمن إن عنده ضمان فعلا ..وإنه مش هينصب عليك ..ناس كتير إتنصب عليها ..وناس كتير سقطت مكن ومحصلش حاجه ..أهم حاجه يكون تاجر نضيف ..بلاش موضوع بورسعيد ده الله يرضى عليك ..يكون كويس قوي إن التاجر من نفس بلدك ..يعني من القاهره لو إنت من القاهره ..عشان لو فيه حاجه في المكنه ترجعله في يوميها ...بصراحه كده ..إنت عارف كويس إن الحل في تسقيط مكنه ..المكنه اللي عندك إتلعب فيها البخت

**ali ashraf** · 25-04-2015 10:39 PM

ربنا يعوض عليك....فعلا هناك مثل بريطانى ...عرض على بريطانى شراء سيارة مستعملة , قال ليه هو انا غنى....المهم انا مع كلام الاستاذ ادهم حضرتك لو بعت العربية كده مش هتجيب اى مبلغ و اللى هيشتريها هيجبها علشان يسقط فيها محرك جديد ....حضرتك ادى نفسك فترة تريح اعصابك و جهدك شوية ثم ادرس موضوع استيراد الموتور ( و هناك نصب كتير خلى بالك) و ركبه فى العربية و توفر تمن عربية او تبيعها بسعر معقول.

**tasaka** · 25-04-2015 10:50 PM

اولا ابعد عن الميكانيكى اللى معاك

ثانيا اعرض للبيع على وضعها و اخصم 2000 جم للشارى و هو يسقط مكنه على مزاجه و ترتاح من الدوشه

لو ما جبتش سعر كويس ( يعنى فرق كبير ) .. يبقى امرك لله انك تسقط الماكينه بنفسك قبل البيع .. و تشترى من تاجر مضمون و من نفس بلدك

.. اما لو خساره الف و الفين تانى فوق خصم الالفين جنيه لتسقيط الماكينه يبقى بيع و اشترى دماغك لان العربيه قرفتها وحشه .. و واضح انها متدمره من المالك السابق و ما تعرفشى ايه المصايب اللى فيها غير اللى ظهر

و ربنا يعوضك خير فى عربيه جديده تعوض خسارتك

**أحمد جودة** · 25-04-2015 11:11 PM

الاول لازم اعرف انتا اشتريت العربية بكام ومين كان معاك وفحصهالك.... ربنا يعوض عليك. بالخير انصحك تاخد كام يوم تهدي. اعصابك وامرك لله سقط ماكينة واعمل حسابك علي 3500 علشان تجيب مكنة كويسة بضمان التجربة هتبقي جزء من تمنها لحين التجربة واستخراج الافراج الجمركي والمكن الاستيرا بيكون تمام لو من حد مضمون
هتابع معاك الموضوع واحدة واحدة ومعلش عاوز اللوم عليك لن شكللك استرخصت ووقعت في عربية وقيع انا كان عندي تشتري بالغالي بس حالة كويسة افضل من عربية متهاودة في سعرها والنتيجة البهدلة والمصاريف

**tasaka** · 26-04-2015 03:41 AM

بص زى ما قلت لك .. اعرضها على كده .. و موش ها تخسر غير اى حاجه غير رد على بعض التليفونات
اعرض العربيه و وضح للشارى العيب .. و اديله خصم يعمل بيه العطل .. و انتهينا

مثلا لو جابت 29 .. طبت ما انت كنت حا تسقط موتور ب 3000 و تبيعها على احسن الاحوال ب 32 ( و ممكن اقل ) .. يعنى هى هى .. بس من غير مغامره و لا مشاكل اضافيه .. و لا ال 3000 تلاقيهم على ما تخلص بقوا 5000 ( و العربيه مفتوحه .. يعنى امر واقع و حضطر تعمل المطلوب ) .. و تلاقى العربيه بعد البهدله جايبه 30 مثلا ( يعنى كأنك بايع ب 25 )

و بعدين صاحب العربيه اللى يعمل المصايب دى .. معناها ان ده كان اسلوبه فى صيانه كل حاجه فى العربيه .. يعنى انك تتوقع المزيد كل يوم
و بعدين انا كنت قلت لك ابعد عن الميكانيكى .. اضيف على ذلك ابعد عن السمسار اللى جاب لك العربيه دى و ابعد كمان عن الميكانيكى اللى كشف عليها

و ربنا يوفقك و ان شاء الله يعوض لك الخساره فى الشروه الجديده .. و تيجى معاك بسعر مريح يعوض الخساره

**sami_ahmed_17** · 26-04-2015 05:43 AM

ربنا يعوض عليك بس انا وجهه نظرى بيع على الحال ده احسن ما تكلف نفسك فى عربيه فتحت بقها

**أحمد جودة** · 26-04-2015 06:55 AM

ربنا يعوض عليك وانا مستغرب الناس اللي معندهاش ضمير والله انا كنت عارض عربيتي للببع من فترة بسيطة وكنت عارض علي 30 وحالة عربيتي ممتازة باستثناء علبة الدريكسيون كان فيها بوش وبعد مارجعت عن فكرة البيع غيرتلها سكاترا استيراد والحمد لله اني مفقدش العربية...... اسف علي. الاطالة انصحك تعمل الاتي ودة اللي هعملة لو انا مكان حضرتك.. . اولا هتبيع هتخسر ولما تيجي تشتري هتشتري بزيادة ويا عالم العربية اللي هتجيبها مستخبي فيها اية.. ... انتا تروح لسمكري او ميكانيكي بيفهم ويقيم ويكشف علي العربية من اول وجديد وشوف لو الحالة طلعت تمام من شاسية وصاج ومفيش مشاكل يبقي قدامك مشكلة الموتور بس وخساررة بخسارة اشتري ماكينة من تاجر مضمون واوعدك هتلاقي نظرتك اختلفت. وهتحب العربية لما تعمل بيها كام مشوار من اللي قلبك يحبهم.. ....... اما انك تبيع بعيبها كل اللي هيفكر يشتري هيموتهالك واللي عرفتة احسن من اللي لسة هتكتشفه كلامي طبعا لو حالة العربية طلعت كويسة وربنا يعوض عليك بالخير ولو تقدر ترفعلنا صورها يبقي تمام