اى حد اشترى رينو ستيب واى 2015 الاوتو الجديدة؟؟؟ برجاء الافادة

**goodboy12340** · 25-04-2015 10:37 PM

السلام عليكم
يا جماعة انا تقريبا خلاص قررت اشترى عربية ستيب واى الجديدة الاوتوماتيك يا ريت اى حد اشتراها او جربها يفيدنى عنها
سمعت ان العربية نازلة من غير جنوط و كمان مفيهاش سى دى !!!!!!
و فيه ناس كانت بتشتكى من نتشة فى الفتيس الاوتو بتاع اللوجان و السانديرو فهل المشكلة دى لسة موجودة
و ايه مميزات و عيوب العربية عامة

و شكرا مقدما يا رب حد يفيدنى

**scientist9508** · 25-04-2015 11:49 PM

اضم صوتى لصوتك وانتظر معك الاجابات

**unl0veable** · 26-04-2015 01:11 AM

متابع

**Member 18** · 26-04-2015 01:20 AM

وانا كمان متابع
الناس كلها متابعين ومحدش بيجاوب :)))

**mohamed hatem** · 26-04-2015 01:35 PM

بص يا ريس ... انا كنت في نفس مكانك ... بس غيرت للوجان هاي لاين اوتوماتيك ... لانها اعلى في المواصفات عن الستيب واي وارخص منها ..كل الفرق في علو العربيه و مقاس الجنط و قصة الهاتش باك .. اما من حيث الكماليات اللوجان اكتر
و فعلا الجنط اللي فيها حديد بطاسه على نفس الشكل ومفيهاش تكييف تاتش و لا باركينج سينسور ولا جنوط .. وسعرها اغلى من اللوجان الهاي لاين بحوالي 5000 جنيه
راجع الموضوع ده
http://www.nilemotors.net/Nile/464053-2015.html

**goodboy12340** · 26-04-2015 04:11 PM

المشاركة الأصلية كتبت بواسطة mohamed hatem

بص يا ريس ... انا كنت في نفس مكانك ... بس غيرت للوجان هاي لاين اوتوماتيك ... لانها اعلى في المواصفات عن الستيب واي وارخص منها ..كل الفرق في علو العربيه و مقاس الجنط و قصة الهاتش باك .. اما من حيث الكماليات اللوجان اكتر
و فعلا الجنط اللي فيها حديد بطاسه على نفس الشكل ومفيهاش تكييف تاتش و لا باركينج سينسور ولا جنوط .. وسعرها اغلى من اللوجان الهاي لاين بحوالي 5000 جنيه
راجع الموضوع ده
http://www.nilemotors.net/nile/464053-2015.html

اولا الف مبروك عالعربية و شكرا على ردك

هى الفكرة انى عاوز عربية هاتشباك عشان تكون صغيرة نسبيا و سهلة فى الحركة و الركنة فعشان كدا فكرت فى الستيب واى
بس بعد ماعرفت ان ناقصها الحاجات الكتير دى بفكر اجيب سانديرو هاى لين

**mohamed hatem** · 27-04-2015 03:38 PM

الله يبارك فيك وعقبالك انشاء الله ... و السنديرو عربيه حلوة فعلا ادام انت غاوي هاتشباك ... وربنا يوفقك

**dony_mdandesh** · 28-04-2015 02:19 PM

أنا جبتها الحمد لله

**mado-301** · 28-04-2015 03:21 PM

العربية شكلها جامد جدا بس يعبها نقص الكماليات ... غالبا ممكن ينزل منها موديل هاي لاين لان على كلام ناس ان الكماليات دي كانت موجودة في المانيوال فمش منطقي الاوتو تكون اقل

غالبا هي نظريات تسويق لحد ما العربية تثبت وجود وينزلو منها فئة تاني .... زي ما في الاول كانو بيقولو مش ح ينزل منها اوتو .... مجرد اجتهاد شخصي ووجهة نظر

**goodboy12340** · 28-04-2015 04:19 PM

بعد بحث لاقيت جروب عالفيس و فيه عضو محترم اسمه "هيثم احمد" مجمع مزايا و عيوب العربية الستيب واى 2015 اوتو و دا كلامه بالنص

السلام عليكم ..بخصوص سانديرو ستب واى : انا مش من الملاك لسه لكن متابع العربيه كويس جدا وبقرأ أي كلمه عنها في أي صفحه أو أي موقع .. انا ان شاء الله نويت أشتريها بس حبيت أكتب لكم ملخص فكرتى عن السياره ,ارجو من الملاك انهم يراجعونى في اى حاجه خطأ .. وزى ماقلت ده مش من تجربه لكن ملخص لتجارب حضراتكم مجمعه في بوست واحد . اليكم التقرير:
أولا المميزات:
بدون جمارك - فتيس استبترونيك- الاوتو 110 حصان و 16 صباب- موتور 1600 cc و على حسب اوتو او مانيوال الموتور بيفرق فى عدد الاحصنه و الصبابات - كمبيوتر رحلات - 2 ايرباج - مرايات كهربا بس مش فتح وغلق - جنوط حديد اسود 16 بوصه معها طاسات بلاستيكيه نظيفه جدا - نافيجيتور مع سرعات الطرق ايضا - شاشه تاتش lg مقاس 7 بوصه - كاسيت ويو اس بى - بلوتوث - جى بى اس - السياره مرتفعه على الارض و لا مطب يخبط بيها - مثبت سرعه و محدد سرعه - التحكم فى الكاسيت بالكامل من خلال دراع خلف المقود - التحكم في ارتفاع عجلة القيادة - التحكم في ارتفاع وانخفاض كرسي السائق - تزويد السرعه و تقللها من خلال طاره الدركسيون اثناء تشغيل نظام مثبت السرعه - داى لايت نور اصفر - فوانيس فوجات - اشارات جانبيه فى المرايات - عدد 2 مفتاح مشفرين بنظام ايموبلايزر لمنع سرقه السياره - سخانات فى المرايات الجانبيه والزجاج الخلفى- 4 زجاج كهرباء مع خاصيه الاتو فى زجاج السائق فقط - نظام الاوتولوك على سرعة 10 تقريبا و الريلوك لو مافتحتش الباب لحوالى دقيقه او اتنين - نظام abs+bas لانطمه امان الفرامل على الطريق - ثابته في السرعات العاليه - نور فى الشنطه الخلفيه - مصفحة من تحت.
ثانيا العيوب:
تكييف عادى مش تاتش - مفيش باركنج سنسور بس موجود فى التوكيل ب 550 جنيه - مفيش سى دى -مفيش جنوط طاسات بس - مفيش زينون - مفيش لوك داخلي للأبواب بس فى زر امان للاطفال فى الباب -تنك البنزين ملهوش مفتاح اوتوماتيك لازم يفتح بالمفتاح من برا - الشنطه كمان بتفتح من برا - مكان الكلاكس مش حلو - صوته مش حلو - البكر بتاع ميل ظهر الكرسى الأمامى مزنوق شويه - المقابض الخارجيه مش قيمه ومش لون السياره - مفيش انذار -الشنطه 320 لتر صغيره زى الدايو تقريبا - الصالون اطول من الداخل تقريبا فى اللوجان عن استب واى بحوالي 4 سم - قطع غيار متوسطة السعر ومتوسطة الانتشار- تقفيل متوسط من الداخل ممكن نقول جيد الى حد ما -مش اقتصاديه أوى فى البنزين - التكييف ضعيف نسبيا يعنى الكنبه الورانيه مش بيوصلها تكييف أوى - الكنبه اللى ورا ضيقه شويا - باور هيدروليك مش كهربا - رعشه فى باور الدركسيون فى اخر الدوران وباور تقيل نسبيا - سحب ضعيف نسبيا قبل الصيانه - صوت الماتور عالي نسبيا - أحيانا شكوى من سخونه تحت رجلك وانت سايق (عيب فردى)
ده ملخص معظم لتقارير عن السياره استب واى اتوماتيك في معظم الصفحات .. العيوب ليست عيوب جسيمه والمميزات كتير جدا .. وانا شايف ان العربيه هيا افضل عربيه في فئتها السعريه ... وبكرر انا مش من الملاك وارجو مراحعة التقرير من الملاك وتعديل أي حاجه من تجربتهم للعربيه .. وجزاكم الله خيرا