الموضوع: تجربتي مع اللوجان اتوماتيك هاي لاين 2015

السلام عليكم و رحمة الله يا شباب الرينو ...

انا عضو جديد في عالم الرينو و الاوربي عامتا .. الحمدلله بقى معايا لوجان اتوماتيك هاي لاين وكان معايا قبلها صني الشكل القديم ex الكامله ... ومش عارف اقول انا نزلت منها او عليت عنها ... بس بصراحه هو كان اختيار احمد الله عليه واشكر فضله ... المهم

الموضوع ابتدي ان الصني عدت ال 100 الف كيلو معايا وعفشتها نشفت اكتر من الاول و اطفالي كبروا و القاعده ورا الضيقه بانت عيوبها وبقيت بتاكل بنزين اكتر من الاول وابتديت تفتح بقها في العفشه و الطنابير ..فكان القرار التغيير ... وكان حدود المبلغ 120 الف المتاح ... وكان فيه مقارنه بين حاجه كسر زيرو في الريو او امثالها ..او اني اركب زيرو ودايما انا برشح ده .. المهم كانت المقارنه بين اللوجان الاوتوماتيك و السياز و الشارك اول فئه ... وبصراحه لقيت اللوجان بانتشارها و كماليتها و ماتورها الجديد و توكيلها ده غير فرق السعر كمان حسمت الموقف

انا دلوقت وصلت لي ال 1000 كيلو ويعتبر يعني جربت العربيه شويه في السفر و كمان جوه المدينه .. طبعا كان في فرق واضح في العفشة و اد ايه هي انعم بكتير من الصني .. وكمان الباور و الهاندلينج وكمان الوسع الداخلي للصالون و الشنطه اما عن المميزات الاخرى المحسوسه كالاتي :
- السوند سيستم و النافيجيتور تعتبر اضافه عاليه فعلا
- مثبت السرعه حاجه فعلا مريحه مع الاوتوماتيك بس طبعا لو الطريق مفتوح زي الصحراوي او المحور
- التكييف الاتوماتيك قوي وميزه حلوة جدا و فارق
- البلوتوث و الكنترول بتاعه اللي في الدريكسيون ..مع ان يتهيألك ان مكانه صعب بس طلع سهل التحكم منه
- العلو بتاع العربيه يخليك تسوق في الشوارع وسط المطبات و البلعات من غير خوف
- كمبيوتر الرحلات و معدل استهلاك البنزين فعلا مفيد جدا
- الستيترونيك في الفتيس مفيد للناس اللي بتحب تجيب اخر النقله
- التقفيل مقارنة بالمصري فارق طبعا
- الاوتو لوك للابواب بمجرد التحرك بالسياره
- الباركينج سينسور مفيد طبعا ..و انا الحمدلله كان معيا في الصني والحمدلله كان متواجد في اللوجان
- فتح الكنبة لتوسيع التخزين الخلفي للشنطه
- تعليه كرسي السائق بصوره جيده جدا بتحسن الرؤيه
- مانع السرقه (الايمبولايزر )
- الصالون ككراسي و كنبه خاماته و تصميمه جميل
- الكابوت بمسند هيدروليك
- تعديل وضع اضاءة المصابيح حسب التحميل
- ABS EBD
- 2 ايرباج امامي مع امكانيه غلق الايرباج الخاص بالراكب لامان الاطفال

اما من حيث العيوب المتواجده وهتفضل معاك طول الاقتناء في السياره :
- الخامات المتوسطه من البلاستيك وخلافه في التابلوه و الابواب
- وضع مفاتيح الزجاج للنوافذ الخلفيه
- قلة اماكن التخزين في السياره
- عدم وجود درجات سرعه للمساحات
- فتح تانك البنزين من الخارج
- عدم وجود مؤشر حرارة ..مجرد لمبه عشان لقدر الله لو في حاجه بتنور
- ارجاع ظهر الكرسي بالبكر يدوي وليس بيد هيدروليك

اما من حيث الاداء واستهلاك البنزين .. فانا مش هقدر اقرر قوي دلوقت لان حسب الملاك وحسب الزيرو عامتا مش بيبان قوي الا بعد ال 5000 كيلو ... بس اقدر اقول ان كان استهلاك البنزين في الاول 11 لتر كل 100 كيلو متر .. ودلوقت وصل الى 9 لتر .. و المفترض انه هيقل تاني بعد 5000 كيلو
اما من حيث تجميع الفتيس الاتوماتيك بصراح انا لحظت ان الاول و التاني بطئ اول ما استلمت وابتدى يتحسن تدريجيا مقارنة بالنيسان ... لكن عامتا بعد الثالث العربيه سحبها بيبقى حلو قوي .. و اما سحبها مع التكييف فيعتبر كويس جدا بالنسبه لمرحلة التليين الاولى
وطبعا الثبات اللي كل الناس بتسأل عليه ... انا بصراحه مجرتش قوي بالعربيه و كان اخري 120 130 وعلى السرعه دي كانت العربيه متماسكه و عارف اتحكم فيها واخد غرز .. وربنا يسترها علينا و عليكم ويكفينا شر العين ... على فكره العربيه اتخبطت اول ما استلمت و ميكروباص دخل في الاكصدام من ورا وشرخ الفانوس قبل ما اعلق حتى نمر ... الحمدلله الحمدلله .. ربنا يبعد عنا و عنكم كل شر

مجملا ... عربية بالكماليات دي وموتورها و تقفيلها المقبول نسبيا وادائها العالي وانتشارها اللي هيؤدي الى توافر قطع الغيار جوه وبره الوكيل و بسعر تحت 120 الف .. تعتبر عربيه بالنسبه ليا مقبوله كيفا و كما الحمدلله

شكرا ليكم و اسف على الاطاله واني اكون نسيت حاجه ويارب اكون افدتكم

المشاركة الأصلية كتبت بواسطة hany saad

الف مبروك العربية و بنشكر حضرتك جداً على التقرير الهايل ده
ان شاء الله بعد ال ٣٠٠٠ كم هتنبسط منها اكتر و طبعاً مفيش عربية خالية من العيوب و لكن اللوجان مميزاتها و سعرها يفوقوا عيوبها بمراحل و هى قيمة عالية مقابل السعر
ربنا يبارك لك فيها و يكفيك شرها

تحياتى

الله يباركلك ويبارك فيكم و الله المنتدي وقسم الرينو ساعدني كتير في قراري ... و الحمدلله هي عربيه تستاهل سعرها ... و الف مبروك عليكم انكم تكونوا افضل قسم .. ويارب تفضلوا دايما في المقدمه .. ودايما تفيدوا الناس