أنا بقى من الناس اللي هقولك متصرفش عليها ..ليه ؟؟هقولك أنا ليه ..عشان دي عربيه ليها سن معين ..اللي هو موديل 87..عشان كده أنا بقول توفر فلوسك ومتصرفش عليها غير عشان تمشي وتحس وإنت ماشي بيها بالأمان ..يعني هديك مثال بيا أنا مثلا ..أنا كان معايا 128 موديل 87 برضه ..وكنت خايف قوي من موضوع فتح الشاسيه ..وإن مفيش 128 فيكي يا مصر إلا والشاسيه بتاعها فاتح ..وكنت عاوز أعمل شدادات وبارات وأصب رصاص وأعمل مساعدين وأغير سوست ..وكانت عندي فوبيا وحالة نفسيه من شاسيه ال 128 ..لدرجة إني كنت كل ما آخد مطب أقول لنفسي أكيد المطب ده فتح الشاسيه معايا ..لغاية ما في مره رحت لحداد عفشه وقلتله عايز أركب شدادات وبارات للشاسيه ..قالي ليه ..قلتله عشان الشاسيه ما يفتحش ..المهم بص تحت العربية كده وقالي طيب ما شدادات الفبريكه راكبه عندك ..إنت عاوز تركب إيه تاني ..المهم بصيت أتاري في شدادين فعلا راكبين وجايين من عند القنطره اللي قدام بالعرض وواصلين لغاية الصدر من تحت العربية ..والشدادات دي فبريكه ..قالي هي دي شدادات العربيه الأصلية..وبعدين بص على المساعدين وقالي المساعدين عندك قدام مش وحشين ..والسوست كويسه ..وقالي ما تحاولش تجيب سوست عربيه تانيه ..عشان ممكن تبقى ناشفه تكسر معاك في الشاسيه ..خليك على سوست الفبريكه ..أو السوست بتاعتها أصلا ..وبرضه المساعدين ..اللي عاوز أقوله في النهاية ..إنك لما هتجيب العربيه هتلاقي كده أو كده حاجات عاوزه تتضبط ..وده بحكم الإستعمال ..يعني مثلا ...لما تجيبها راجع على العفشه كلها ..وأي حاجه عايزه تتغير غيرها علطول ..شوف عندك كبالن فيها مشكلة .عندك كاوتش عجل قديم ..عندك مش عارف إيه ..غير بس في الحاجه الأصلية بتاعة العربية ..وبعدين هتحط تابلوه كورسا ليه .؟؟يعني هو تابلوه الكورسا هيخليها تمشي على 190 والتابلوه بتاعها أخره 100 مثلا يعني ..ما بدل ما تصرف على تابلوه وسوست ومساعدين كورسا ..هات حاجتها ..صدقني عربية أصيلة ..قعدت معايا سنة ونص .ده أنا مرة غيرت تيل فرامل بدشمة الفرامل بعلبة الزيت بالمصنعية بسبعين جنيه بس ..والكلام ده كان في 2011 ...يعني ليس منا ببعيد ..رأي ..الشاسيه ما دام سليم ..لا تعمل بارات ولا تعمل صب رصاص .طيب هقولك على حاجه ..أنا سمعت إن البارات اللي بتتعمل فوق دي ممكن تخلي الشاسيه يفتح من تحت ..عشان ما بتخليش الشاسيه ياخد ويدي معاك في المطبات من فوق ..وعشان البارات اللي فوق دي بتلجم الشاسيه من فوق فعشان كده بتفتح من تحت ..بص هو أهم حاجه ..تكون الشدادات بتاعة الفبريكه راكبه ..ويكون الشاسيه سليم ..وبعدين في الآخر بقى ..لو تعرف تطلع بالمبلغ دي وتخليه ربع جنيه هيكون أفضل ..نسيت أقولك ..كانت معايا وكنت بروح بيها من إسكندرية للقاهرة رايح جاي ..ومقلتش آي ..وكنت بغير الزيت على تلات تلاف كمان مش الفين
المفضلات