المشاركة الأصلية كتبت بواسطة eslamrace
حضرتك فى حاجه مش واخد بالك منها ان انت مش مطلوب منك تطالب بتغيير الاداره انما لو فى دليل على فساد مش مطلوب غير انك تكشف الموضوع بال3 طرق اللى انا ذكرتهم شكوى اداريه او قضائيه واقل حاجه اعلاميا "ويندرج تحت اعلاميا نشر الموضوع فى مواقع التواصل " على الاقل تكون عملت حاجه انما انت شايف ان المنظومه كلها فاسده وشايف ان كل التروس من اكبرها لاصغرها فاسد وسايب الوضع على هذا الاساس ومش عايز تغيره يبقى حتى "لو انت مش بتقوم بعمل فاسد" انت مشارك فى الفساد برضاك بالوضع وحتى لو غيرنا الترس الكبير "زى محصل قبل كده" حتفضل باقى التروس مش عايزه تتغير
وزى محضرتك فكرتنى بايام ما بعد ثوره 25 يناير وان الناس كانت على استعداد للتغيير تفتكر ليه الوضع متغيرش فى ولا شركه موجوده فى فتره ما بعد الثوره اقولك لان الناس كلها افتكرت زى حضرتك كده ان بتغيير الترس الكبير المنظومه تتصلح لوحدها وده مش صح لان المفترض ان التغيير يحصل من تحت لفوق لان كل انسان مفترض يبدأ بنفسه وبعدين باسرته وبعدين فى مجتمعه الصغير لحد ميوصل للقمه لان لازم تعرف ان اى مسؤل هو واحد من المصريين فلو هو فاسد فده لانه اصلا كان موظف صغير فاسد ومحدش حاسبه ولو اداره فاسده فده لان الاداره دى لما كانت صغيره كانت فاسده ومحدش حاسبها وبالتالى كل جيل حيشتغل فى المنظومه حتى "لو زى مانت بتقول مش فاسد" حيتحول طالما سايب نفسه لفاسد ويكبر لحد ميكون رئيس الاداره وساعتها يفضل برضه الموظف الصغير مستنى انه الاداره اللى تتغير وميعرفش ان حتى لو الاداره اتغيرت حييجى من زمايله برضه فاسد تانى
حضرتك شايف ان فى ظل الوضع الحالى صعب تغيير الاداره بلاش تغير الاداره بس لما تشوف موظف فاسد معاك حاول تتحرك انما غير كده يبقى خلاص خللى الوضع يبقى على ما هو عليه ومنستناش تغيير
اسهل حاجه انك تغير رأس الهرم "سواء بفعل او بقضاء من الله"ولكن التغيير ده "كما اثبتت لى الايام" مش بيصلح مجتمع اصلاح المجتمع بيبدأ بالفرد فالاسره فالمجتمع .
اخيرا حضرتك بتقول انك تتمنى انى اسكت وده انا مش قابله تماما لانه مش منطقى ان اى حد بيقول حاجه مش عاجباك يبقى تقوله اسكت والا اقبل برضه ان غيري يحجر عليك ويسكتك ويا ريت تامل كلمه حضرتك دى وانت حتعرف ليه اى اداره لو انت اتكلمت حتعاقبك لانك انت شخصيا مش قابل حد يخالفك فلو بقيت مدير فى يوم ما اظن برضه انك مش حتقبل حد يشتكيك او حتى يختلف معاك .
حضرتك انا حتوقف عند المشاركه دى فى مناقشه حضرتك طالما دى رغبتك ولكن حتابع الموضوع وحتكلم فيه بشكل عام لطرح وجهه نظرى الشخصيه .
تحياتى .
إزاي حضرتك بتقول مش مطلوب مني أطالب بتغيير الإدارة وبعدين تقولي بعدها علطول مش مطلوب منك غير الكشف على الفساد ...طيب خد عندك بقى ..
أنا شغال في شركة حكومة ..يرأسها واحد من خير أجناد الأرض ..لوا جيش يعني ..السرقة عندنا أزكمت الأنوف ..ورؤساؤه عارفين وهقولك في الكلام اللي جاي هما عارفين إزاي ..المهم .الفساد أزكم الأنوف ..والمصيبه بقى ..إن إحنا كعمال معانا ورق يثبت الفساد ده ..زي مثلا فلوس الوزراة صدقت عليها كان المفروض تتصرف للعمال ومفيش حاجه إتصرفت .زي مثلا فلوس بتتصرف للبهوات أعضاء مجالس الإدارة بدون أي بند ..وحاجات من كده ..طالبنا بحقنا ..محدش سمعنا ..عملنا وقفه ..يعني وقفنا لصاحب العمل ...صاحب العمل بما إنه من خير أجناد الأرض إتصل بالشرطة العسكرية ..وبدون الدخول في تفاصيل تم توجيه تهمة الإساءة للجيش المصري وإهانة أحد أفراده ..وتم توجيه الإتهام طبقا للدستور الجديد ..طبعا تم نقل ال 18 عامل إلى مقر النيابة ا لعسكرية..ودول ال18 اللي معروف عنهم إنهم بتوع حق وبتوع لا يضيع حق ووراءه مطالب وكشف الفساد والكلام اللي حضرتك بتقوله دي ..وتم التحفظ عليهم في أحد الأماكن اللي هما نفسها معيرفوهاش ...أتحبسوا 15 يوم بأمر عسكري من النيابة ...آه ..في التحقيق معاهم في النيابة العسكرية لما كانوا بيسألو العمال إنتوا ليه وقفتوا وإنتوا كده أسأتوا للجيش المصري ..كان العامل بيطلع الورق اللي فيه الهبل والفلوس اللي بتتصرف بدون أي وجه حق ..كان المحقق ..وكان مقدم أو نقيب تقريبا ..كان يقولهم أنا مليش دعوه بالكلام ده ..أنا عندي هنا إتهام معين أنا بحقق فيه ..البيه المحقق كان بيحقق من طرف واحد
واحد زميلنا هنا كان بيعمل زي ما إنت عايزني أعمل ...وكان بينشر حاجات على الفيس بوك عن الفساد اللي موجود في أجهزة الدولة ..وكان طبعا من ضمن الأجهزة اللي فيها فساد ..الجيش المصري العظيم ..واحد زميلنا تاني ..من اللي بنسميهم في سوق اليومين دول ..أمنجي...بلغ عنه إدارة الشركة ..ولولا إن زميلنا اللي بيحارب الفساد عبر الفيس بوك ده ليه واحد في المخابرات ...كان إتعمل علية حفلة السنين ...وكان راح مع اللي راحوا ..
أنا مثلا ...بحارب على النت ..وشغال نشر في صورة واحده في الشهر العقاري بتقشر كوسه ..وواحد موظف فاتح درجه عشان ياخد رشوه ..والمشاكل اللي حاصله في موضوع قناة السويس الجديده ..ومشكلة سد النهضة ..ما كله فساد ..ومع إني مش كاتب إسمي الحقيقي على الفيس بوك ..ومع إني خافي معلوماتي من على الفيس بوك ..إلا إني بلاقي ناس صحابي أنا ضايفهم بيحذروني من الكلام ده ..وبيقولوا لي خلي بالك ..وده اللي خلاني أعمل حساب تاني على الفيس بوك عشان لو لاقدر الله وقفت في كمين وإتسألت على الموبايل يبقى وقتها اللي مفتوح الحساب الوهمي
هنا مثلا في المشاركة اللي أنا بكتبها دي ..لو حضرتك طلبت مني أي بيانات تخصني ..زي مثلا رقم تليفوني أو عنواني ..أكيد هرفض إني أتواصل مع حضرتك ..لإني مضمنش بعد الكلام اللي أنا كتبته ده ..ممكن يحصل معايا إيه ..
قبل ما أنسى ..حضرتك بتحاول تبسط الموضوع ...وبتحاول تقنعنا إن هي مشكلة فساد وبس خلاص ..وكأن في أجهزة في الدولة هتقدر تكشف الفساد ده ..رغم إنك في تاني مشاركة ليك بتقول المفروض يبقى المطلب تغيير الإدارة ..وبعدين رجعت قلت إنت مش مطلوب منك تغير الإدارة ..حضرتك ذات نفسك شايف إن الموضوع كبير ..بس عمال تجيبها من الأول شوية ومن الآخر شوية ..وأنا قلتلك ..هي بادئة بترس كبير ..منتهية بترس صغير ..اللي هو الموظف اللي فاتح درجه ...وبعدين حضرتك بتتكلم كأن في حساب في البلد دي وكان الفاسد بيتحاسب بجد ..والله العظيم أنا شفت واحد ممسوك في قضية إتجار في حبوب مخدره وواحد تاني إخوان ..سابو اللي متهم في قضية حبوب مخدره وطلع بكفالة 1000 جنيه ..وحبسوا الإخوان ..وبعدين عايز تتكلم ..عندك الفيس بوك ..عندك الشارع ..أقعد كده مع الناس وكلمهم عن فساد الإدارة وعن فساد الدولة ...بس إبقى خلي بالك لحد يبلغ عنك
المفضلات