السيارة مشدودة صاج يعنى ايه و مدى تأثيره على سعرها ؟

**فارس الواحة** · 18-05-2015 09:12 PM

السلام عليكم :
شفت عربية لادا 92 موديل 2105 على 14000 ألف ، بس شكلها كان فى الضياع صدا فى الابواب و الاجناب و مفيش اكر فى الباب و الطبلوه متأكل خالص ، الميكانيكى اللى معايا مع العلم انه ثقه ، قالى ان موتورها كويس وكل ده مجرد شغل سمكرة و دهان هيخش فى الفين يعنى هتقف كلها على 16000 ، لكن انا خايف من شكلها اللى سد نفسى عنها ، و خايف الالفين دول وقت الجد يبقوا اكتر طبعا ، ايه رأيكم ؟
حاجه كمان مهمة جداااا : لقيته جايب معاها صاج للأبواب وقالى ده هتخده معاها ، هل الصاج ده معناه ان العربية مشدودة صاج ؟ وهل ده يأثر على سعرها ؟ ومعنى كدا ان فيه فرق بين العربية اللى رشه نظافة وبين العربية المشدودة صاج لأنه كدا ممكن ده مش يكون صاج العربية الأصلى لأنه أمتن طبعا من الصاج اللى هيركب ؟
و ازاى اعرف ان ده صاج العربية الأصلى ولا العربية دى مشدودة ؟
رجاء بارك الله فيكم رد شامل وافى لأخوكم :) .

**Ramy_2R** · 18-05-2015 09:20 PM

خلي سمكري يبص على الصاج مش ميكانيكي عشان انت بتككلم على صدأ
و أعتقد الموضع عشان يتعمل صح حيخش أكتر من 2000 بشويه حلوين

**Zing0** · 19-05-2015 12:17 AM

و أنا من رأى الأستاذ رامى
الحسبة هتزيد عن الـ 2000, لازم تعمل حسابك لحد 5000 مثلاً لو الأساسيات كلها سليمة و الموضوع شكل فقط
يعنى سمكرة و دوكو و فرش و تابلوه مع شوية تضبيط للأبواب و الكوالين و الكهرباء و الصوت مش أقل من كده.

أعانك الله

**A3SAR** · 19-05-2015 01:11 AM

فيه عربيات حالتها كويسه لادا 2107 موديلات 2000 فوق ال عشرين الف بحاجه بسيطه وسليمه هاتها احسن بكتير

**فارس الواحة** · 19-05-2015 01:22 AM

المشاركة الأصلية كتبت بواسطة a3sar

فيه عربيات حالتها كويسه لادا 2107 موديلات 2000 فوق ال عشرين الف بحاجه بسيطه وسليمه هاتها احسن بكتير

بس المشكلة يا أخى ان الميزانية بتحكمك و أنا اخرى 20000 ، وبعدين انا مش هروح مشاوير بعيده فشايف ان 2105 هتوفر فى البنزين عشان مكنتها اصغر و عموما هيا روسى برضو

طيب انا قدامى واحدة على 19000 نفس الموديل 2105 و سنة صنع احدث 95
بس عاوز اعرف صاج العربية دى الاصلى ولا مشدودة ، ولو مش الاصلى بس فبريكة دواخل يبقى ده يأثر على سعرها ؟

**A3SAR** · 19-05-2015 01:51 AM

شوف اى سمكري شاطر ممكن يعرف العربيه كويس حتي لو اللى عاملها معلم ..
وبشكل عام اتأكد من فوقات الكبوت من ادام مضبوطه ولا واسعه من ناحيه عن التانيه
نفس الموضوع في فروقات الابواب .. وركز في قوايم العربيه ومن شكل اى لحام غريب
افتح الكبوت بص كويس جدا علي الشنب من ادام ومن وجود اى عضعضه من جوه
وفيه طريقه بس ممكن متعرفش تعملها لانها ممكن تسببلك احراج شويه لو بتشوف العربيه ادام صاحبها
بتجيب متر سنتيمترات .. وتقيس الجانب الايمين والايسر للسياره كلا علي حدا .. ولو فيه فروق في المقاس اكتر من 3 سم اعرف ان العربيه دي فيها مشاكل في الصاج ومش مضبوطة
وفي الاخر ريح نفسك وادي العيش لخبازة وخد سمكري ثقه وخلاص وهو هيقولك

**Abo_Mazen** · 19-05-2015 09:21 AM

ما تصرفش على عربيه ..مش هتعرف تعمل اللي بيعمله التاجر اللي شغلته أصلا ياخد العربيات ويشدها ...هتصرف ..وهتقرف من الصنايعية ووقفتهم ..بالله عليك خد حاجه تركب وتمشي