الموضوع: لادا 2105 1200سى سى

اهلا ببيك اخونا وائل في المنتدى
و باذن الله اللى عنده معلومة يفيد حضرتك

اهلا بيك يا استاذ وائل
بالنسبة للمبلغ معقول بس ممكن يحتاج يزيد حاجات بسيطة الف او اتنين
بالنسبة لموضوع الكشف دا بينقسم لكشفين
اول حاجة الكشف المبدئي : ودا بيكون انت وبتستعين من حد من الاصدقاء او الاقارب اللي عندهم خبرة فى موضوع العربيات وبيكون الكشف على
1- الصاج لو محتاج شغل سمكرة او بويا او لو فيه بارومة ودي فى الاغلب بتكون موجودة فى باب العربية من تحت وفى الشنطة ( وطبعا تبتعد كل البعد عن العربيات اللي مغيرة نص او مغيرة ربع لان كدا الشاسية بيكون ملحوم وما بيقاش متين ) طبعا بتحط ايدك على السقف وتضغط ضغطة متوسطة وتشوف الصاج ماسك نفسه ولا هيريح معاك الحالة التانية مش كويسة طبعا
2- الرش من الداخل واللي بيقال عليها فابريكة دواخل اذا كانت مش راشة من جوا ودا بتبص عليها فى الكابوت وفى الشنطة وفى قوايم العربية من جوا ( المناطق اللي بيمسك فيها الابواب )
3- الكاوتش اذا كان ممسوح او حالته كويسة
4- العفشة اذا كان احد المساعدين فى مشاكل ولا حاجة ودا بتكشف عليها بانك بتيجي عند كل طرف عربية وتضغط عليها من فوق وتشوف ماسكة نفسها ولا بتنزل لتحت بزيادة طبعا الحالة التانية دا بتبقى رايحة فى داهية والمساعدين محتاجة تتغير بتهز الدركسيون يمين وشمال بعنف شوية لو سمعت صوت طقطقة يبقى فى بيضة عايزة تتغير
5- الماكينة بتدورها وتشوف اذا كانت بتتطول فى الدوارة ولا بتدور من اول او تاني مرة طبعا لو بتتطول يبقى حالتها مش كويسة :)

طبعا اي حاجة من الحاجات دي لو ظهرت بتنزل من سعر العربية لو انت مستريحلها نفسيا


تاني كشف ودا بيكون بمعرفة المختص ( الميكانيكي ) ودا لانه فى الاغلب بيكون فاهم فى كل حاجة من ميكانيكا وسمكرة وعفشة وكاوتش

وبيكسف هنا على حالة الماكينة ويقولك اذا كانت خفيفة ( محتاجة عمرة ) او حالتها كويسة ولازم تسمع منه الماكينة حالتها كام فى المية 70 او 80 كدا تعتبر كويس هو تقريبا بياخد من 50 ل 100 جنية فى موضوع الكشف دا بس بتكون متطمن ساعتها على كل حاجة وعارف الشغل اللي فيها قد اية

اتهييئلي النقاط دي تغطى موضوع الكشف وربنا يوفقك ويرزقك بحاجة كويسة ان شاء الله

كلام الأستاذ عمرو كفى و وفى
بس أحب أضيف حاجة صغيرة

فى اللادا مش مهم المساعدين أوى, الجوز أستيراد من 150 - 175 جنية مش حوار يعنى
المهم أساسيات اللادا
1- البارومة و الدواخل طبعاً و تنزل تحت العربية مش عيب, أنت هتدفع فلوس.
2- المكنه و حالتها إيه, بتطلع بخار زيت و لا لأ, و لو تخلى الميكانيكى يفك بوجيه و يشوف حالته يبقى تمام
3- الفتيس و الكارونة و ده لازم تجرب العربية على سرعة فوق الـ 80, تشوف فيها نقلات الفتيس كلها تمام و فيه صوت (ون) من الكارونة و لا لأ و العربية بتسحب و لا متكتفه بعد الـ 80 (علشان حالة الكربراتير بالمرة)
4- و هيا العربية واقفة جيب الدركسيون يمين عالآخر و شوف هيلف معاك كام لفه و بعدين إعدل الكاوتش و إرجع لف الدركسيون شمال و شوف نفس عدد اللفات و لا لأ, و البوش فيه أد إيه (البوش جزء الدركسيون بيلف فيه من غير ما العجل يتحرك, المفروض يكون أقل ما يمكن)
5- فى شارع مدقدق و تمشى على 20-25 كم/س و تشوف فيه تخبيط فى العفشة و لا لأ. هو طبيعى يكون فيه بس مش أصوات عالية و تحس إن العربية مفكوكة.
6- حالة الدبرياج بالمرة, و دى هتبان فى أى مطلع (كوبرى مثلاً) هتحس بسحب العربية.
بعد كده تشوف البطارية و الكاوتش و الفرش و الذى منه. لو اللى فوق تمام يبقى الباقى سهل إن شاء الله

اعانك الله

السلام عليكم ورحمة الله وبركاته
أشكرك جدا يا أستاذ mif وأكيد أشكر الأستاذ عمرو وأيضا الأستاذ zing0 كثيرا جدا على إفادتى والنصح لى ولو سمحتوا ممكن أعرف الضريبة والترخيص للادا 2105 1200 سى سى والنيفا 1600 سى سى سنويا كام وكمان الفرق بينهم فى استهلاك الوقود وهل الفرق كبير لانى موظف ؟ وتنصحونى بإيه ؟ وشكرا جدا على اهتمام حضراتكم

متابع

متابع