انا انضحك عليا جامد

**Polar Star** · 23-05-2015 06:12 AM

بسم الله الرحمن الرحيم
السلام عليكم ورحمة الله وبركاته
يا رجاله المنتدي ..النهاردة اشتريت مرسيدس 200 موديل 1978
فبريكة دواخل رشه برة عاللحم
موتور 2000 سي سي جنوط خرشوفه كاوتش تيوبلس
زجاج كهرباء
عفشه جديدة من يومين وبطاريه جديده من شهر
حاسس اني انضحك عليا من التاجر لاني لما روحت بيها وجدت الاتي :
مفيش سنتر زي ما هو قال
الزجاج الكهرباء سقط لتحت ومطلعش تاني الباب اللي جنب السائق
الكرسي اللي جنب السائق تنجيده ضعيف اوي وبيهبط جدا
مؤشر البنزين والحرارة مش شغالين !!!!
العربيه بطلت عالدايري واضطريت اخلي واحد يقطرني وأخد 100 جنيه !! ولما وصلنا البنزينه اكتشفنا ان المشكله مش بنزين خلصان لكن كان سلك الموبينه مقطوع ووصلناه هناك !!
نور الصالون مش بينور لما افتح الابواب ونور الكابيه الامامي اللي فوق السائق بيلمس!
المشكله اني كنت واخد معايا اتنين المفروض انهم خبرة واحد سواق والتاني ميكانيكي
العربيه اتفصلت ب 40 الف دفعت 37 النهاردة وبقيت 3 لما يسجل لي العقد شهر عقاري بعد كم يوم
من ساعه ما روحت وانا حاسس اني مش مبسوووووووط وانضحك عليا لان الاتنين اللي معايا لا طلعوا بالعربيه يجربوها ولا رفعها في بنزينه بحجه ان حرام تدفع 200 جنيه واحنا خلاص شفناها وموتورها اللهم صلي عالنبي !
المهم العقد فيه شرط جزائي 2000 جنيه
دلوقتي ارجع في البيعه وربنا يعوض عليا في الشرط الجزائي ولا اخليها واشدها تنجيد وكهرباء واصلح العدادات البايظة ؟
اسف للاطاله وارجو الافادة لاني بصراحه من ساعه رجوعي من مشوار سوق السيارات ده وانا بقالي 12 ساعه متعكنن ومش مبسوط وحاسس اني انضحك عليا ضحك السنين
ملحوظة: انا مبتديء سواقة ومعنديش اي خبره بالسيارات والميكانيكا ولسه بتعلم في مركز تعليم قيادة
وشكرا

**Polar Star** · 23-05-2015 06:26 AM

بصراحه احقاقا للحق يعني العربيه قبل ما تبطل مننا عالدايري كانت ماشيه علي سرعه 140 زي الفل وحش عالطريق وثباتها عالي لان العفشه جديدة...بس انطفت فرحتي من لحظه ما بطلت مننا والدنيا باظت اكتر لما روحت تحت البيت وفحصت اكتر واكتشفت العيوب اللي قلتلكم عليها دي
افيدوني افادكم الله ...اخليها واشدها ولا ارجعها ومش مهم الشرط الجزائي ؟

**د.محمود صلاح** · 23-05-2015 07:54 AM

الحاجات اللي حضرتك ذكرتها تتصلح ووتتعالج بسهولة على مدار الأيام والعشرة معاك ومع العربية ... بس هل المكيف شغال ؟

المشكلة هي ان لو نفسك وقفت منها يبقى ارجع في كلامك ،،

**A.Saad** · 23-05-2015 08:37 AM

هو موضوع عدم الرفع ده خطأ طبعا

المشاكل الباقية بسيطة واغلبها كهربا بس عايزة صبر عليها

بس لو عندك ميكانيكى نضيف يشوف الموتور والشاسيه كويس

**Polar Star** · 23-05-2015 11:44 AM

المشاركة الأصلية كتبت بواسطة د.محمود صلاح

الحاجات اللي حضرتك ذكرتها تتصلح ووتتعالج بسهولة على مدار الأيام والعشرة معاك ومع العربية ... بس هل المكيف شغال ؟

المشكلة هي ان لو نفسك وقفت منها يبقى ارجع في كلامك ،،

د.محمود اشكرك علي الرد ..لا المكيف مش شغال ومحتاجه تكييف يتكلف حوالي 2500 جنيه
والغريبه ان نفسي مقفلتش منها برغم كل اللي قلته وحسيت بالراحه في قعدة كرسي السائق اكتر بكتير من الرينو الميجان اللي اتحشرت فيها وانا بحاول اقعد عالطارة لان انا طويل شوية

**Polar Star** · 23-05-2015 11:49 AM

المشاركة الأصلية كتبت بواسطة ENG.MaRk

الحاجات اللي انت بتتكلم عليها مش هتكلفك أكتر من 2000 جنيه و العربية كلها هتتظبط ... أهم حاجة في العربية هي mechanically سليمة ولا لا و مش مهم الكماليات تكون شغالة properly و بدل ماترجع في العقد و تدفع الشرط الجزائي و يروح عليك اصرفه علي العربية :) ... بالتوفيق

ENG.MaRk اشكرك جدا علي التعليق
العربيه موتورها كويس جدا وبتدور في ثانية ولا فيها تقطيع ولا تبطيل
صاجها كويس جدا ونضيفة بس كهربتها واضح انها مهمله من فترة
انا محتاج فوق ال2000 جنيه دول تكييف ب 2500 جنيه يعني بحسبه بسيطه هتتكلف 5000 اجمالي عشان تتشد وتتظبط كويس.....هل كده يبقا كتير زيادة عن اللزوم ولا عادي؟

**Polar Star** · 23-05-2015 11:50 AM

المشاركة الأصلية كتبت بواسطة rotanamasoud

انزل اكشف عليها فى بنزينه للاطمانان وجربها تانى وتالت وتاكد ان الاساسيات سليمه100% وراجع نفسك لاقت انك لسه قافل رجعها حسيت ان اللى فيها يتعمل توكل على الله

rotanamasoud اشكرك جدا علي النصيحه وهنفذها ان شاء الله النهاردة واشوف النتيجة واقول لحضرتك اللي حصل

**pepo2011** · 23-05-2015 12:07 PM

باشا عندك حلين لازم تعملهم ضروري تاخد العربية وتكشف عليها برة تاني وعند ميكانيكي مرسيدس بيفهم وتشوف كهربائي وتحسب تكلفة التصليح كلها كام وتحط 500 زيادة كمان تحت الحساب وتقرر انت بعد كده
المشاكل اللي حكيتها بسيطة كلها لكن المهم الاساسيات والمكنة دول مفيهومش هزار والعربية دي حاجتها رخيصة وموجودة كتير