الموضوع: 250000 تجيب سياره ايه بس محتاجة تفكير كويس..انا محتار

المشاركة الأصلية كتبت بواسطة a7med ezz 20

بص مفيش مشاكل غير فالفتيس dsg . ابعد عنه وخلاص . لو هتجيب زيرو يبقي قدامك ال 508 افضل اختيار الصراحة وهم ، لو استعمال يبقي c180 او 316i مثلا كسر زيرو 2014 . ومش هتحس بفرق عن الزيرو .

شكرا بس انا لسه محتار لسه لانى كنت بسأل عن c250 و 523

المشاركة الأصلية كتبت بواسطة eng.mark

ال508 أكبر منافس للانسيجنيا و أنا قبل ما أشتريها كنت محتار نفس حيرة حضرتك و لما نزلت ركبت الاتنين عجبتني أكتر ال508 و الحمد لله قربت أكمل بيها 26000 كم و ماشفتش منها أي مشاكل بعكس الانسيجنيا اللي عضو فاضل هنا في قسم أوبل كان كاتب تقرير عنها و ظهرت معاه مشاكل ف مش منطقي إني أجيب عربية بالسعر ده و قبل صيانة ال10000 تظهر معايا مشاكل مش مميتة لكن هتخليك تتضايق من دفع المبلغ ده كله في عربية فيها مشاكل لأن اللي عنده استعداد يدفع المبلغ ده في مصر في عربية يبقي أكيد عايز يشتري راحة باله ... نقطة كمان في صالح البيجو و هي إنها مش بتقول لا لل92 لكن الانسيجنيا حساسة شوية لموضوع ال95 ده و ممكن يعملها مشاكل مع العلم إني مشيت بال92 في البيجو فترة مش قليلة و ماظهرش مشاكل الحمد لله ... اقرا أكتر عن العربيتين و انزل اتفرج عليهم و اللي تعجبك اشتريها و لو ماعندكش مانع في موضوع ال95 يبقي اشتري انسيجنيا لربما تطلع أحسن من ال508 زي ماقالوا الناس بس احسبها كويس علشان ماتندمش بعد كدة لأن ممكن المشاكل اللي حصلت مع العضو الفاضل اللي كان كاتب تقرير صيانة عن الانسيجنيا تكون مشاكل فردية مش للموديل كله و الله أعلم ... ربنا يوفقك لما فيه الخير إن شاء الله و نباركلك قريب :)

متشكر على الرد
ممكن اعرف ابه المشاكل اللى حصلت للانسيجنا؟
وعايز اعرف انى لو حطيت بنزين 92 حيفرق ايه عن 95
للاسف لسه محتار ومحدش اقنعنى

المشاركة الأصلية كتبت بواسطة sherif 007

متشكر على الرد
ممكن اعرف ابه المشاكل اللى حصلت للانسيجنا؟
وعايز اعرف انى لو حطيت بنزين 92 حيفرق ايه عن 95
للاسف لسه محتار ومحدش اقنعنى

المشاكل ماحصلتش للانسيجنيا بسبب ال92 ديه أول نقطة أحب أوضحها ثانياً اللي بيفرق مع اختلاف نوع البنزين هو ارتفاع صوت الموتور نسبياً و تأثر السحب قليلاً لكن فروقات ملحوظة ثالثاً اعمل موضوع جديد اسأل فيه عن عيوب الانسيجنيا لأني مش لاقي الموضوع في قسم أوبل و مش فاكر اسمه ولا حتي اسم العضو صاحب الموضوع بس أتمني الأعضاء المحترمين يقدروا يفيدوك

المشاركة الأصلية كتبت بواسطة eng.mark

المشاكل ماحصلتش للانسيجنيا بسبب ال92 ديه أول نقطة أحب أوضحها ثانياً اللي بيفرق مع اختلاف نوع البنزين هو ارتفاع صوت الموتور نسبياً و تأثر السحب قليلاً لكن فروقات ملحوظة ثالثاً اعمل موضوع جديد اسأل فيه عن عيوب الانسيجنيا لأني مش لاقي الموضوع في قسم أوبل و مش فاكر اسمه ولا حتي اسم العضو صاحب الموضوع بس أتمني الأعضاء المحترمين يقدروا يفيدوك

أيوة تمام انا كنت قرأت مشاركة الاخ الزميل اللى صادف مشكلة الانسيجنيا و مكنش السبب البنزين بس كانت عيوب تصنيع و سأحاول البحث عن المشاركة و متستعجلش و يا ريت زى متفكر فى العربية فكر فى صيانة ما بعد البيع

المشاركة الأصلية كتبت بواسطة ali ashraf

أيوة تمام انا كنت قرأت مشاركة الاخ الزميل اللى صادف مشكلة الانسيجنيا و مكنش السبب البنزين بس كانت عيوب تصنيع و سأحاول البحث عن المشاركة و متستعجلش و يا ريت زى متفكر فى العربية فكر فى صيانة ما بعد البيع

انا راجعت المنتدى ووجدت مشاركتين عن عيوب الانسيجينا و معرفتش انزل اللينك علشان كده هنزلهم كوبى بست
المشاركة الاولى بتاريخ 7 ابريل 2014 تحت عنوان "حماية المستهلك تحقق مع منصور فى عيب اوبل انسيجينا" كاتب الموضوع باسم horas 3000 و ندخل على المشاركة المنقولة,,,,,قرر جهاز حماية المستهلك فتح التحقيق مع وكيل السيارة "أوبل" بعد شكاوى وصلت من مواطنين اشتروا السيارة الجديدة من ماركة "انسيجنيا" ، ثم فوجئوا بتكرار الأعطال خلال الأشهر الأولى من شرائها رغم إجراء الصيانة اللازمة بمعرفة الوكيل ، ثم أخبرت الشركة أحد أصحاب الشكاوى بأنها ستقوم بتغيير موتور السيارة بالكامل ، وهو ما رفضه باعتبار أنه دفع ربع مليون جنيه ثمنا لسيارة حديثة ، فإذا كان موتورها فاسدا فإن هناك مشكلات جوهرية بالسيارة لا يمكنه أن يشعر بالراحة والأمان في ركوبها ، وكان المواطن سامي عبد الغني قد تقدم بنص شكواه التي قدمها للوكيل وسلم نسختها لجهاز حماية البيئة وجاء فيها : السادة شركة اوبل العالمية- تحية طيبة انا العميل \ سامي عبد الغني محمود .. . 2014اشتريت سيارة اوبل انسيجنيا منذ ثلاثة شهور موديل شاسيه رقم 1039429 موتور رقم 54 . اللون اسود السعة اللترية 1600 بقيمة ربع مليون جنيه مصري عند صعود السيارة مرتفع يعمل مانع الانزلاق وبعد استقرار السيارة يظل يعمل مما يعيق الحركة . بالاربع عجلات ذهبت للصيانة مرتين بنفس الخطأ و طلبوا عمل الصيانة الدورية قبل الموعد وتمت بالفعل فقاموا بتغيير بوجيه الاشتعال بحجة ان به رطوبة !!! السيارة لها ثلاث شهور فكيف يتم تغيير البوجيه؟؟؟؟ بعد اسبوعين من الصيانة الاولى حدثت نفس مشكلة مانع الانزلاق ..ذهبت للتوكيل وبعد الكشف طلبوا رفعها بالونش الى الفرع الرئيسي لشركة المنصور بطريق مصر الاسكندرية وهناك وبعد الكشف قرروا عرضها على المهندس الامريكي من جنرال موتورز الذي قرر بتغيير الموتور بالكامل فكيف اشتري سيارة جديدة ويتم بها استبدال الموتور؟؟ فرفضت تغيير الموتو وذهبت الى جهاز حماية المستهلك الذي قرر طلب الوكيل المنصور في جلسة تحقيق وفور علم المنصور بالشكوى سحب مني السيارة التي ارسلوها لي لحين تصليح السيارة السادة المحترمين .. انا لا اوافق على ذلك فليس من المنطق ان اشتري سيارة بربع مليون جنيه وبها موتور مستبدل

منقول
المصدر
حماية المستهلك تحقق مع وكيل سيارات "أوبل" بعد شكاوى - المصريون

المشاركة الثانية عنوانها " رسالة من الغول الالمانى بتاريخ 12 مايو 2015 (يعنى الشهر الجارى) و كاتبها تحت اسم Mr_revenger و ندخل على المشاركة المنقولة ,,,,,السلام عليكم أهل وسكان منتدى نايل موتورز عامة.....وحبايبى من رواد قسم الأوبل خاصة

بقالى فتره طويييييييله غايب ومنقطع عن المنتدى وافتقدت كل الناس المحترمه اللى اتعرفت عليها هنا واللى كانت سبب كبير فى تكوين قرارى لإنضمامى لعائله الأوبلاويه واللى تم بشرائى لأوبل إنسيجنيا توب لاين 2014

وبصفتى أحد ملاك هذه العربيه المثيره للجدل لأقصى الحدود ولمده لا تعتبر بالقليله...حابب أوصلكم رساله مهمه منها لكل متابعى ومحبى الاوبل والانسيجنيا تحديدا ....

********* ************* ***************

اضغط هنا لمشاهدة الصورة بالحجم الطبيعي.

جمهور الأوبل الحبيب
تحيه طيبه وبعد..

لا أخفيكم سرا كم من الحسره والحزن والنكد والصدمه أخفيهم داخل موتورى من رد فعل السوق المصرى وحالته قبل نزولى وتشريفى لأرض الوطن تزامنا مع اعلان وصولى ولأول مره لأنضم للأسطول الأوبلاوى بمصر....ومع بدايه انتشار اول عربيه من سلالتى تمشى فى شوارعكم وتبدأ عيونكم فى الانبهار لرؤيتى انطلق وسط باقى العربيات اللى اعتادتم عليها وعلى رؤيتها....!!!

خلونا نتفق فى البدايه ان كتر الكلام سواء بالايجاب او بالسلب وتعدد واختلاف وجهات النظر والاراء حول اى شيء...هو نجاح فعلى وحقيقى للشيء ده..لأن مفيش شيء فاشل حيكثر الكلام حواليه..

تانى نقطه...انا زيي زى أى عربيه على كوكب الارض اللى صنعها بشر مش إله ولا ملاك والبشر بيغلطوا يبقى بالتالى انا مش عربيه كامله لأن الكمال لله حال كل العربيات التانيه

تالت نقطه وأهم نقطه... عجيب أمركم أيها المصريون...
أى كلام يتقال بدون حتى التأكد كالبغبغانات ترددون.....وحتى بدون التفكير فى منطقيته من وقتكم لا تضيعون
أفلا تعقلون !!!! مهو يا انتوا اللى صح يا أنا اللى مجنون



ندخل فى المهم... بدايه نزولى السوق المصرى كان ديسمبر 2013 وبدأ الناس تتعافت على رؤيتى والاستفسار عن امكانياتى ومواصفاتى واسعارى...
وكان واجب التوضيح للناس المقبله على الشراء انهم يعرفوا الانسيجنيا تصنف فى اى فئه ومين هما منافسينها....
تصنف الانسيجنيا على انها Large Family Car .... ومعاها فى نفس الفئه بيجو 508....اسكودا سوبيرب....باسات....فولفو S60 وال BMW 320

من حيث السعر الانسيجنيا اقلهم سعرا واعلاهم مواصفات وتجهيزات

مع بدأ انتشار العربيه بدأ يظهر بعض المشاكل مع ملاك الدفعات الاولى وهى

1- مشكله الموتور

وهو انه مع استخدام بنزين 92 كانت العربيه بترجرج وتظهر علامه الصيانه فى التابلوه ولما كانت العربيه بتروح التوكيل كان بيتم تشخيص الحاله على انه بنزين مخلوط بمواد اخرى أدى لتكسير فى البوجيهات واللى كانت بتسبب عطل فى الموتور يستدعى تغييره...
تكررت الحاله مره و 2 و 3 وبدأ الملاك فى القلق والشكوى ...

بدأ التوكيل ياخد خطوات من ناحيته لحل المشكله بعمل Recall لتحديث السوفتوير وتركيب بوجيهات معدله champion وبالتالى بدأت نسبه المشاكل تقل تدريجى وأن لم تختفى...وبعد فتره تم تركيب بوجيهات اقوى واحسن من نوع NJK واللى قللت نسبه حدوث ال Engine failer بنسبه كبيره جدا وان لم يكن برده اقدر اقول قضت عليها تماما.....

ومن ناحيه اخرى بدأت جروبات الفيسبوك عملها بالضغط نوعا ما على التوكيل لحل المشكله بشكل اكبر...وبمنتهى الحياديه والواقعيه بدأ التوكيل بتعويض المتضررين بتغيير العربيات من ناحيه..او بتعويضهم ماديا باسترداد مبالغهم...او بتغيير الموتور....وده كان فى نفس الوقت بالظبط اللى كان ملاك المرسيدس والفولفو بيصوتوا ويلطموا لان كان عندهم نفس المشكله والتوكيل قالهم كان على عينى يا لمبى !!!

عدد كبير جدا من ملاك الغول 2014 وانا اولهم ماشيين ببنزين 92 بس من بنزينات مضمونه والعربيه فى منتهى القوه والاحترام ومفيش ادنى مشكله الحمدلله

تم تدارك الموقف تماما فى موديلات 2015 بتعديل فى ال Hardware & Software للموتور الجديد بتقليل نسبه انضغاطه لتصبح 9:5:1 بدلا من 10:5:1 وبالتالى بقت تمشى ببنزين 92 دون ذره قلق ولم تسجل اى حاله حتى الان فيها مشكله

2- مشكله صفاره التيل الخلفى

عدد كبير من الملاك كان بيشتكى من صوت صفاره مزعج فى التيل الخلفى وبعد مراجعه التوكيل تم اكتشاف السبب وهو سوسته فى التيل الخلفى بتؤدى للصفاره وتم تغيير التيل لكل الملاك على حساب الضمان وتم القضاء نهائى على المشكله دى..

3- مشكله الطنابير

اشتكى عدد مش قليل من الملاك من وجود ريجه بالطنابير واللى سببها رداءة التيل الامامى وعلى الرغم من ان الطنابير قطعه استهلاكيه لا يشملها الضمان..تم تغيير كل الطنابير اللى فيها مشكله لكل الملاك وفيه ناس اتغيرتلهم مرتين كمان على حساب الضمان مع تأكيد من مهندسى التوكيل انه قريبا جدا حيتم حل المشكله دى بشكل جذرى

4- مشكله ظهور بعض الاصوات الخفيفه فى الجانب الايمن الخلفى

كانت حالات فرديه من الملاك بوجود صوت دبدبه بسيط اوى فى العربيه من ورا وبعد صولات وجولات تم حل المشكله دى نهائى...

ال 4 مشاكل دول هما اللى الناس كانت بتنام وتصحى تحكى وتتحاكى فيها وبدأوا فى حملات تقطيع وتشويه سمعه العربيه وكعاده المصريين اللى بيحبوا الزيطه كله بدأ يردد ان الانسيجنيا عربيه فاشله وبتجيب مواتير وفيها العبر...عشان تتباع بسعر بخس ويركبوا عربيه مكنوش يحلموا بيها بالسعر ده
** عربيه خدت Car of the year 2009 فى اوروبا متفوقه على عربيات عتيده ...هنا فى مصر يقولك عربيه فاشله !!!
**عربيه دخلت منافسات ومقارنات عديده مع البى ام والمرسيدس وتفوقت فى بعض الاحيان وفى بعض النقاط ويقولك عربيه فاشله !!!
**عربيه حزمه المواصفات والامكانيات والرفاهيات اللى فيها عشان تركبها فى اى موديل تانى مش اقل من 450000 متوفره ومتاحه فى عربيه 100*100 تقفيل المانى ويقولك عربيه فاشله !!
**عربيه عامله اكبر نسبه مبيعات فى فئتها فى فتره محدوده جدا مقارنتا باسماء عريقه بقالها 3 و 4 سنين قبلها ويقولك عربيه فاشله !!

اقولك....كلمه فاشله بتضايقك !! طب افتخر انك راكب عربيه فاشله بالشكل ده

بعض الحقائق المهمه جدا !!

من خلال تقييمى للعربيه والتوكيل على مدار السنه وربع اللى تعاملت مع العربيه والتوكيل
استلام مارس 2014....22000 كم

توكيل منصور تطور جدا وتحسن فى اسلوب معاملته عن ذى قبل..انا بتكلم عن تجربتى الشخصيه معاهم...ناس فى منتهى الاحترام والاحترافيه واخص بالذكر كبير مهندسى الفرع الرئيسى مهندس حازم فكرى المحترم والخدوم لطوب الارض وفريقه المعاون...احمد شحاته...عمرو الشيمى
وفرع رابعه العدويه اللى بدأ يظهر على التراك بوجود مهندس سعد

وضح جليا دور جروبات الفيس بوك القوى والمؤثر جدا فى تحديد كيفيه سياسه التوكيل فى التعامل مع الملاك...لان زى مكان فيه جروبات ساعدت على انتشار العربيه وخدمه وافاده المقبلين على الشراء..وتقديم معلومات بشكل امين وواضح....كان فيه جروبات تانيه كل هدفها ودورها هو الهجوم الكاسح والتقطيع فى التوكيل والعربيه عمال على بطال لاسباب مغرضه وتفرغوا فقط للمصالح الشخصيه

قدرنا كجروب لملاك الاوبل اننا نعقد اجتماع مع السيد لطفى منصور احد ملاك التوكيل والمهندس احمد طه ممثل جى ام فى مصر...والسيد الفرماوى مدير خدمه العملاء بمنصور وكبير مهندسى الفرع الرئيسى حازم فكرى ليتواصلوا معانا ويشوفوا طلباتنا ويقدموا الدعم للملاك ودى خطوه تحسب لهم وكان ليهم السبق فيها عن اى توكيل تانى...

خلاصه الرساله عشان انا رغيت كتير وطولت عليكم....
انا كعربيه كان عندى مشاكل..اه عندى...
المشاكل لقت رد فعل من التوكيل...اه لقت..
المشاكل اتحلت...بنسبه كبيره جدا اتحلت...

بعيد عن المشاكل بقى...بص على كم المنتقدين والمهاجمين على طول الخط للانسيجينا وانت تعرف قيمتك فين وقد ايه العربيه حققت نجاح.....

الانسيجينا عربيه تجبرك على احترامها بمجرد تجربتها ولو لمره واحده فقط


إمضاء
الغول الألمانى



اضغط هنا لمشاهدة الصورة بالحجم الطبيعي.أنتهى النقل و راى الشخصى انا مقدرش اقيم عربية المانية ذات تكنولوجيا متقدمة لأنى غير متخصص فى السيارات .....ولكن.....أقدر اقول وده راى و انطباعى الشخصى انا لا يمكن اكون مرتاح لشراء العربية دى بعد كل الكلام المكتوب ده, احتمال نقص تدريب فى الصيانة احتمال البنزين كل ده على راسى و عينى بس غير مقبول بالمرة شراء عربية على الزيرو بمبلغ كبير و بعدين اجرى وراء كل هذه المشاكل ......ربنل عرفوه بالعقل

ردود مشكورة ليكو كلوكو والله
بس طلعتونی من موضوعی الاساسی
انا محتار برده من الاخر اجيب ايه؟
انسيجنا ولا ای نوع سی مرسيدس

المشاركة الأصلية كتبت بواسطة sherif 007

ردود مشكورة ليكو كلوكو والله
بس طلعتونی من موضوعی الاساسی
انا محتار برده من الاخر اجيب ايه؟
انسيجنا ولا ای نوع سی مرسيدس

هات مرسيدس C class لأن واضح إن حضرتك مصمم علي الانسيجنيا بالرغم من إن أكتر من شخص نصحك بالابتعاد عنها أو اتفرج علي ال508 و هتعجبك جداً أنا متأكد أو اشتري الانسيجنيا لو عجباك لربما المشاكل اللي فيها تكون فردية ... القرار قرار حضرتك و لكن أنا بأطلب منك تفكر و تحسبها كويس علشان ماتندمش أو تتضايق إنك دفعت المبلغ ده كله في عربية فيها مشاكل ... ربنا يوفقك لما فيه الخير إن شاء الله :)

المشاركة الأصلية كتبت بواسطة eng.mark

هات مرسيدس c class لأن واضح إن حضرتك مصمم علي الانسيجنيا بالرغم من إن أكتر من شخص نصحك بالابتعاد عنها أو اتفرج علي ال508 و هتعجبك جداً أنا متأكد أو اشتري الانسيجنيا لو عجباك لربما المشاكل اللي فيها تكون فردية ... القرار قرار حضرتك و لكن أنا بأطلب منك تفكر و تحسبها كويس علشان ماتندمش أو تتضايق إنك دفعت المبلغ ده كله في عربية فيها مشاكل ... ربنا يوفقك لما فيه الخير إن شاء الله :)

شكرا لمداخلاتك الجميلة و الحقيقة انى استفدت منها جدا ...انا فى نفس مشكلة الاخ كاتب الموضوع ....البيجو 508 عجبانى جدا و لكن موضوع البنزين 92 و 95 عامل لى شوية قلق و سعر ال95 فى مصر مش مضمون يعنى الله اعلم ممكن يوصل لكام ..... و فى نفس الوقت انا اكره الذهاب للصيانة عموما و عاوز عربية مفيهاش مشاكل و اعتمادية و ده اللى خلانى افكر فى الكورولا و برضه قلقت لما شفت البرشور العربى بتاع البيجو 508 و مكتوب فيع بالعربى نوع الوقود 92 اوكتان و فى البرشور الاصلى بتاع الشركة الام مكتوب اوكتان 95 .....يعنى التوكيل بيزور بقصد خداع العميل المصرى و ده ميطمنش على اسلوب التفكير بصورة عامة......المهم طيب لو انا عاوز اجيب سيارة تعتمد على بنزين 92 ترشح حضرتك ايه .....؟ و سؤال اخير حضرتك لما بتتكلم عن بنزين 92 ....هل هو البنزين فى مصر ام فى المانيا و سبب سؤالى ان البنزين الالمانى اكيد ذو جودة اعلى مقارنة بمستوى جودة البنزين المصرى و اللى احنا بنلاحظه حتى من محطة بنزين عن اخرى فى نفس المدينة .....و تقبل خالص تحياتى و تقديرى