بقالي فترة بادور على عربية جديدة اشتريها بعد ما بعت الآي تن اللي كانت معايا وكتر خيرها بس قررت ماركبش كوري تاني وعايز اركب حاجة ياباني (او من ريحة الياباني بالمقاييس الحالية مافيش ياباني 100% الا نادرا). المهم واحد صاحبي كان اشتري صني 2014 اول فئة اتوماتيك وكنت باركب معاه على طول بس كنت الصراحة مش مقتنع اوي بالعربية لحد ما طلعنا بيها مشوار طويل دمياط والصراحة كانت مريحة جدا ورائعة في السفر وعلى الطريق مطبات للصبح ولا الهوا والتكيف شغال تلاجة الله ينور. المهم يعني ابتديت اقتنع وقلت اطلع على اي معرض اتفرج على الفيس ليفت الجديدة وقد كان. رحت سمير ريان لقيتهم عارضين كل الفئات وشفت العربية على الطبيعة الصراحة يعني اتفاجئت الفيس ليفت الجديد عامل شغل حلو من برة. أول حاجتين قلت ابص عليهم عشان كانوا عاملين مشكلة في عربية صاحبي الكاوتش وتقل الباب في القفل. لقيتهم غيروا الكاوتش الماكسس وبقى بريدجستون والباب بقى افضل كتير من الاول ومش محتاج ترزعه عشان يتقفل. الصالون من جوة في السوبرصالون جميل جدا والفاميه الخلفي عامل شغل في الحر ده والقعدة عموما جميلة ومريحة. بصراحة العريية مقنعة جدا وزاد اقتناعي عن الاول. طبعا التخوف الوحيد من المشاكل اللي الاعضاء ذكروها زي الفرامل وخلافه بس كل ما افتكر الأي تن اقول عمر الصني ما هاتبقى اسوأ وكفاية في الأي تن كمبريسور التكيف وعلبة الدركسيون اللي باظوا والعربية لسة 60 الف كم.
المهم قلت برضه عشان ارضي غروري ابص عاللانسر الشارك. العربية حلوة بس تحس فيها انها قديمة ستايل قديم كده من عشر سنين فاتوا وطبعا ضيقة خصوصا في الخلف ومافيهاش ربع الكماليات اللي في الصني السوبر صالون واغلى بفارق يزيد عن 10 الاف جنيه. يعني مااعتفدش الفرق يستاهل الصراحة وغالبا هاكمل في سكة الصني.