الموضوع: Bmw x1 - 2016

المشاركة الأصلية كتبت بواسطة M.Hosni

بس هل الموتور ده هيكون مناسب للعربية ؟؟!!!! , و خصوصا أن أبعادها أصبحت أكبر شوية بسيطة عن الموديل الحالي

اه عادى هايكون مناسب لكذا سبب

الموتور دا صحيح 3 سلندر و 1500 لكن تربو وعزمه عالى 220 نيوتن وبيبدأ من 1250 Rpm ، ال 2000 سى سى القديم كان N/A مش تربو عزمه 200 نيوتن عند 3600 Rpm وأداء العربيه بيه مش وحش 0-100 في 10.4 ثانيه

الفتيس الجديد ال 8 سرعات هايفرق في الأداء عن ال 6 سرعات اللى كان بينزل مع ال 2000 سى سى القديمه

الوزن في الجديده بقى أقل بفضل الشاسيه الجديد

أخيرا الابعاد مازادتش بالعكس العربيه بقت أقصر حوالى 4 سم وقاعدة العجلات قصرت 9 سم ، وبقت أعرض ب 2 سم وسقفها أعلى حوالى 7 سم

المشاركة الأصلية كتبت بواسطة mohamed_hamdi

طبعا التطوير كموتور و ناقل حركة هايل جدا و متوقع لان كل الموديلات الجديدة من البي ام في نفس الاتجاه و ان كنت لا اعتقد ان البافارية ممكن تنزلها مصر بالموتور ال ١٥٠٠ سي سي حنى لا تؤثر على مبيعات الفئة التالتة المعدلة و فيها نفس الموتور ده رغم ان السعة اللترية و الاعفاءات الجمركية حتى ٢٠١٩ ممكن تخلي سعر ال x1 بالموتور ده تعمل مبيعات خرافية
النقطة التانية ان حسب كلام اخونا حسام تم تقليل قاعدة العجلات و الطول الاجمالي للعربية و بالتالي أكيد هتكون المساحة المتاحة للكنبة الخلفية و الشنطة كمان اقل من الموديل الحالي اللي هو ضيق أساسا

هو طبعا ناس كتير من اللى كانت بتفكر في الفئه التالته ممكن تحول عال x1 الجديده بعد التطوير دا ، بس كدا كدا التالته ليها عشاقها اللى مابيفكروش غير فيها ، والتوكيل بصراحه يبقى غبى لو مانزلهاش لانها هاتعمله مبيعات ممتازه لان فيها كل المميزات اللى اى حد ممكن يحتاجها

والعربيتين المفروض يبقوا بسعر واحد تقريبا لان التالته فيس ليفت بتبدأ من 30.200 يورو وال x1 الجديده بتبدأ من 29.950 يورو ، وحتى في باقى الفئات الفرق مابيزدش عن 100 - 500 يورو بالكتير

بالنسبه للأبعاد الخارجيه قصرت فعلا لكن المساحات الدخليه زادت في العرض ومساحة الراس حاجات بسيطه ، الشنطه كمان المفروض بقت أكبر