تعبت من كتر اللف ومحتاج اركب عربية فى حدود 45000

**ممدوح سعيد** · 06-06-2015 12:20 AM

بسم الله الرحمن الرحيم

انا تعبت من كتر اللف ع شان اشترى عربية ميكونش فيها مشاكل
بقالى اكتر من شهر ونتاج اللف انى اتشوشت اكتر بكتيييييييييير

مش عارف ده اكيد غباء من الاخرين ههههههه

محتاج اركب عربية فى حدود 45000 ومفيش شلن هيخرج من خزنة الوزارة
والمطلوب عربية عالية عن الارض تكييف محترم وقطع غيار متوفرة ومش غالية اوى بس هى دى كل المشكلة

اولا تناقض رهيب بين تعليقات الاعضاء مابين واحد قرفان من عربيته مثلا سيينا وواحد تانى متحييز لموديل عربيته وليكن فليشيا وواحد تالت متحيز ضد نوع وخلاص وليكن اكسنت عشان معاه اوبل

وطبعا عمال ادور فى النت وانزل اشوف على ارض الواقع تحس بختلاف غريب وعربيات قليلة اوى الى تلاقى حالتها حلوة وصحابها ماسكين فى السعر ومغليين حبتين

تعبت من كتر اللف فقررت اسال اصحاب الخبرات من اصحاب العربيات الى باعوها فبيقت ادور على اعلانات قديمة واتصل على اساس تكون اتباعت واطلب النصيحة وفعلا نجحت الخطة واتشتت اكتر بكتيييير
وسبحان الله كان فى جملة مكررة فى اغلب المكلمات"مين الحمار الى قالك كدة" مثلا اسال واحد على عربيتة السيينا الى باعها اسمع قصيدة اخلع صيانة صعبة وقطع غيار نار ومش موجودة وتقيلة فى البيع وينصحنى بالاسكودا اكلم واحد باع عربيته الاسكودا يقولى بتسخن وواطية وبنت تيييييت وينصحنى بالاوبل
ادور على الاوبل اسمع الاتى الفكترا بنت تييت والكورسا كهربتها زفت وهتتعيك طيب والاسترا حلوة بس ابعد عن الاول عشان غالى جدااااااا فى قطع الغيار وطبعا الى راكبين الاوبل ليهم راى تانى مين الحمار الى قالك كدة واعكس كل الكلام الى فات
فخلاص مش عارف اشترى ايه
فيات سيينا ولاسكودا فليشيا ولا فابيا ولا هينونداى اكسنت ولا اشترى توكتوك

اسف على الاطالة بس فعلا انا متحيير

تم تعديل العنوان ليتناسب مع المحتوى
م.ع 7

**shake** · 06-06-2015 01:00 AM

45 الف تجيبلك لانوس مو 98 99 وسيبك من اللى انت كاتبه عربية عملية

**al_manara** · 06-06-2015 01:31 AM

الاهم من العربية عاوزين نعرف طريقة التفجير هنا هايكون شكلها ازاي

اي عربية حالتة كويسة جدا هاتتبسط منها .وكل عربية ليها ميزة وعيب .
شوف مميزاتها وعيوبها وشوف هاتناسبك ولا لا .

**W.eltayeb** · 06-06-2015 01:33 AM

(والمطلوب عربية عالية عن الارض تكييف محترم وقطع غيار متوفرة ومش غالية اوى بس هى دى كل المشكلة)

عن تجربة لانوس :)
- عالية عن الارض بس لما يكون ٤ كبار او العيله ف العربيه بتوطي عندي
- بخصوص التكيف ما شاء الله جمييييل
- قطع غيارها ممكن تلاقيها في السوبر ماركت

اذا في حل لرفع العربية في حالة لما تكون مليانه يبقي زي الفل :) بس اشطا يعني مش عملالي مشكله دام ان الواحد مركز مع المطبات الخازوقيية اللي ف مصر.

واستني بردوا رأي الناس الخبرة، انا حيالله مستخدم عادي يعني :)
واهم شئ الاستخارة، في آمان الله

**شاهين - بنز** · 06-06-2015 01:48 AM

صاحبي كان معاه أوبل كورسا ٢٠٠٥ كانت عربية محترمة جدا وسواقتها تحفة وباعها على ٤٣ ألف عشان يشتري زيرو
هي صيانتها ممكن تكون مكلفة شوية مقارنة باللانوس لكن هي كركوبة أنضف منها بمية مرررررة

**egyptiandiver** · 06-06-2015 03:55 AM

لانوس

**Kirolos Edward** · 06-06-2015 04:36 AM

حسب الحالة

**Amr_650** · 06-06-2015 09:26 AM

بص يا ريس .. انتا قلنا الاختيارات اللى مش هتطلع عنها و احنا نقولك الاحسن فيهم ..انا كان معايا الفكترا 98 .. زى الفل و جبارة بجد , بعتها عشان سافرت بس ..
و كان معايا البونتو ال 2001 ,, و كانت كويسة بس الايطالى ..
و كان معايا الابيزا .. كانت زى الفل بس مش اى حد بيفهم فيها و قطع غالية ..