تكلفة تحويل الى غاز طبيعى بتبقى حوالى 5000 لو كاش اما لو قسط بيبقى حسب النظام و ممكن توصل لحوالى 6500 لو قسط ثابت و فيه نظام تانى هو انك لما تمون تدفع ضعف تمن الغاز اللى حطيته يعنى لو حاطط ب 5 جنيه تدفع 10 5 للغاز و 5 للقسط و فى الحالة دى تمنه بيوصل لاكتر من 7000 و المشكلة بالنسبة للملاكى انه بيقوللك لازم القسط يخلص مش فاكر فى سنتين او تلاتة و طبعا مع استهلاك الملاكى عمرك ما هتخلص القسط فى السنتين دول و بالتالى تقريبا اما بتكمل بنفس النظام و يزود الفايدة او تكمل كاش او حسب بقى ما هتتفق ساعتها

بالنسبة لمواصفاته التقنية
اولا هو بيحتوى على نسبة عالية من الكبريت اكتر من البنزين و ده عنصر بيقلل من عمر الموتور بس برضه بالنسبة للملاكى مش هتحس بالموضوع قوى اللى بيفرق معاهم التاكسيات نظرا للحركة المستمرة

ثانيا الغاز بطىء فى الاشتعال و ده بيخلى العربية تغيب فى الدوارة الصبح و لازم تكون البطارية و المارش و مجموعة الكهرباء كلها حالتها ممتازة و من الممكن التغلب على المشكلة دى بانك و انت بتركن بالليل تحول الى البنزين من زرار مخصوص هما بيحطوه فى العربية و تستنى لما العربية تحضر بنزين مش هتاخد منك اكتر من دقيقة و اما تنزل الصبح تدور و انت على البنزين هتدور على طول و تسخن بالبنزين و بعدين تقلب غاز و تعيش اليوم كله عادى

ثالثا نتيجة ان الغاز بطىء فى الاشتعال ده بيسبب ان سحب العربية بيقل و ليس السرعة القصوى و لكن التسارع بتاعها بيكون بطىء وطبعا دى مش مشكلة خالص بالنسبة لواحد مش غاوى شد و امركة و مجرد عربية بيقضى بيها مصلحته

رابعا سعر متر الغاز 45 قرش يعنى نص تمن لتر البنزين 80 و ربع تمن بنزين 90 يعنى توفير رهيب مع مراعاة ان متر الغاز هيعمل معاك 1.1 من المسافة اللى بيقطعها لتر البنزين يعنى مثلا عربيتى 125 بولندى بتعمل حوالى 10 كيلو فى لتر البنزين يبقى هتعمل 11 كيلو بمتر الغاز يعنى اروح من مصر لاسكندرية ب 9 جنيه بالغاز

خامسا لو انا معايا فلوس هركبه بغض النظر عن جميع المساوىء لان رخص التمن الرهيب هيضيع اى عيوب

سادسا لو اى حد عايز اى استفسارات عن الموضوع ده انا جارى يبقى مدير فرع شركة الغاز فى طنطا و ممكن اساله على اى حاجة تانية