الموضوع: مطلوب النصيحة ..هل ارجع مصر ؟

المشاركة الأصلية كتبت بواسطة maserati

السلام عليكم و رحمة الله و بركاته

أنا نزلت مصر أسبوعين الشهر اللى فات و عشان عملت فيهم الرقم القومى اللى انتهى و أنا بره و جددت الباسبور و عملت الباسبور المميكن الجديد. طبعا لفيت فى شوارع المحروسة أما قلت بس و شفت قرف لا أول و لا آخر له. منها على سبيل المثال أنهم لغوا الباسبور اللى كان معايا قبل ماستلم الجديد. فهمتهم أنه لو الباسبور الجديد طلع فيه غلطة و لا اتأخر و لا أى حاجة, مش هقدر أسافر. و هما و لا هما هنا, و أما عرفوا كده كمان فى قسم جوازات المنصورة, قاموا لما لغوا الباسبور القديم خدوه و خلوه عندهم مع أنه المفروض يدهونى.

و اللهى فضلت طول الأجازة مكشر و مهموم و ماحستش براحة الا و السواق منزلى فى المطار عشان أرجع هنا.

البلد كل حاجة فيها وحشة جدا. أنا فاهم أنك نازل عاوز تعمل مشروع. بس اللى ماشى فى البلد دى اليومين دول الحاجة اللى فيها نصب أو رشوة أو احتكار. بمعنى, أنك لو عاوز مثلا تفتح -على سبيل المثال- مكتبة أدام مصلحة حكومية مثلا. عشان أمورك تمشى و تشتغل, لازم بشكل أو بآخر تحتكر و تمنع أى حد يقف بمكنة تصوير فى المكان. يعنى الشغل بيكون بالشكل ده. لكن تفتح مشروع و خلاص كده. هتلاقى كل الجهات الحكومية بتقرف فيك.

بلاش ترجع دلوقتى و استخير ربنا. و لو مش عاجبك العيشة فى السعودية عشان تحكم الكفيل هناك, افتكر تحكم و قرف الحكومة هنا اللى أسوأ من تحكم الكفيل بملايين المرات.

أنا أصلا أما قريت العنوان أنك عاوز ترجع مصر اتخضيت و اللهى.




:_alshmokh08[1]::_alshmokh08[1]::_alshmokh08[1]:

لية بس اتخضيت :e_braces[1]:
فعلا فى روتين فى مصر يشل .. بس بردة احسن من انك يكون عندك حد عزيز تعبان فى مصر و مش عارف تشوفة علشان مستنى الكفيل يعملك خروج و عودة ... روتين السعودية اسوء كتير..

المشاركة الأصلية كتبت بواسطة mostafa bedo

بص حضرتك انا لحد دلوقتي رحت مع والدي تقريبا 7 دول واقدر اقلك مفيش دولة زي مصر والله يعني انا رحت فرنسا والمانيا وهولندا وبلجيكا وعلي النقيض رحت تشاد واثيوبيا والكاميرون و النيجر طبعا مصر ف المستوي تميل لاوروبا بنسبة 50% من واقع تجربة وطبعا مهما كان الانفلات الامني ف مصر مبتحسش بالامان غير فيها والله ودايما بتوحشك والكلام كتير والرزق علي ربنا لو انت ساكن ف مكان كويس ف مصر ارجع واشتغل وكون نفسك وتعالي مع اهلك وناسك ومهما حظ قلك مترجعش اكيد معظمهم مجربش الغربة
وربنا يوفقك لما فيه الخير وصلي استخارة وربنا معاك

اشكرك على كلامك .. و بمناسبة السفر .. انت كنت فى باريس من فترة بسيطة و شفت كميه شحاتين كتير و ناس حاجاتها اتسرقت ومش عارفة تتصرف .. فعلا مصر مش بالسوء دة

المشاركة الأصلية كتبت بواسطة abo_mazen

يعني هو حضرتك كل الساده الأفاضل اللي دخلوا ردوا على حضرتك مش قاعدين في مصر برضه ؟؟وعايشين فيها ..حضرتك عايز إيه تجربة أحسن من كده ..وبعدين هو أنا لما أقول لحضرتك الكهربا والمياه والمواصلات وفي زميل فاضل هنا أضاف من عنده حتى العربيه اللي هتركبها والطريق اللي هتمشي فيه ..كل ده هل ليه علاقة بالسياسة ..فين السياسه سيدي الفاضل في الموضوع؟؟ ..إحنا كل ده بنتكلم عن حال البلد ..هو حد فينا قال لحضرتك إنت إنتخبت مورسي ما تجيش ..أو واحد تاني قالك أنا إنتخبت السيسي تعالى ..الناس كلها بتتكلم عن حال إحنا عايشينه كل يوم ..وصابحين بايتين فيه ..في اللي شايف الإسود إسود ..وفي اللي شايف الأبيض أبيض ..وفي اللي شايف كل حاجه بالعكس ..الساده الأفاضل هنا طرحوا رأيهم ..حضرتك قلت علينا بنبتعد عن المصداقية عشان حضرتك شايف إن طرحنا لحال البلد جاي من تأثرنا بالسياسة ..طيب أقول لحضرتك على حاجه ..النور بيقطع ..البنزين غلي ..الأسعار نار ..الضرايب بتزيد ..الأمن منعدم..كل ده للأسف حال البلد ..ولإن الحال ده جاي نتيجية سياسة مش عاوز أقول رأيي فيها هنا ..وخلي بالك ..رأينا جاي نتيجية سياسة مش تأثر بالسياسة ..يعني نتيجة للسياسة بتاعة البلد كان اللي إحنا بنقول عليه ..فحضرتك ربطها بالسياسة ...عموما ..في حل أنا شايفه جميل قوي ..وفي ناس عملته ..حضرتك ممكن تنزل أجازة طويلة شوية ..ولتكن مثلا 6 أو 7 شهور ..وتحاول تشوف الدنيا هنا ماشيه إزاي ..يعني حاول تدخل في مصلحه كده صغيره ..حاول مثلا تعمل أي شغل هنا ..بس على شرط ..لو لقيت الكلام اللي إحنا قلناه على شاكلة الدنيا سواد ..لو لقيت الكلام ده حقيقي ..يبقى في هدوء كده تنسحب وترجع تاني ..بس ما تشتكيش ولا تحكي لحد عن تجربتك ..عشان محدش يقول إن إنتمائك السياسي مأثر عليك ..مش كده ولا إيه ؟؟؟؟

كل كلامي لحضرتك مش على محمل شخصي ..ياريت حضرتك ما تخدوش على محمل شخصي ..أنا معرفش حضرتك شخصيا ..ووجود حضرتك في مصر من عدمه مش فارق معايا ..أنا كل ما هنالك إني بقول رأيي

لا ابدا انا بشكرك على اهتمامك

المشاركة الأصلية كتبت بواسطة swimmer25

أولا أحييك على الأكورد
ثانيا
الرد يعتمد على

سنك؟
متجوز؟
عندك أسرة يعني أولاد؟
أسرتك معاك؟
والدك ووالدتك موجودين؟ إنت وحيد ولا معاهم ولد تاني مسؤول؟
مجال عملك في السعودية سهل إنك تلاقيه ولا هتتعب كتير عشان تلاقي ولو لقيت هيكون مرتب اقل؟

أنا وضعي قريب من وضعك بس قراري أصعب في التجهيز له !

السن38 ومعايا اسرتى
و والدتى موجودة بمصر وتعتبر وحيدة لانى اخواتى غيرمسئولين بالمرة
مجال عملى موجود فى مصر بس اكيد المرتب هيكون اقل

المشاركة الأصلية كتبت بواسطة afndina

طبعا مفيش وجه مقارنة بين الدول الاوروبية والغربية وبين مصر , اي عاقل حيقول كدا
معاك الامن في مصر سئ بالمقارنة اوروبا لكن اوروبا برضوا مش جنه
لسه قاري خبر من كام يوم ان فرنسا قفلت برج ايفل بسبب عدد السرقات اللي اتعرض ليها السياح وان الموضوع اصبح سئ جدا والشرطة مش عارفه تعمل حاجة .
ومره سمعت بودني طلقات نار اثناء مكلمتي لواحد علي النت وهو ساكن في احد احياء ايطاليا
فالدنيا ليست وردية ومثالية في الدول الاوربية والغربية ولما سألته قالي دا عادي في الشارع اللي ساكن فيه :)
دا غير حوادث قتل الشرطة الامريكية للسود اللي بقالها كام شهر وعامله قلق في امريكا وغيره كتير
لكن برضوا طبعا افضل من مص
ر
وارجع واقول اللي حيسافر الدول دي يبقي عارف كويس ان حيشتغل بجد مش حيأنتخ زي ما هو مقضيها في مصر كدا , وحيدفع ضرائب عالية علي الدخل , مش زي مصر اغلب الناس مبتدفعش ضرائب .

كل ميزه حتحصل عليها بره حيبقي ليها مقابل

فعلا انا كنت فى باريس من فترة بسيطة و السرقات كتيرة جدا والشحاتين كمان
(ودى صورة شحاتة نايمة فى اشهر شارع هناك الشنزليزية