المشاركة الأصلية كتبت بواسطة zing0
بص يا ريس علشان أنا من ساعة مجبت العربية بنت اللاذينا دى و أكتر حاجة لاقيتها بتبوظ كتير فيها هيا الأبلاتين و الكربراتير.
أولاً الأبلاتين مفيش عليه لوم لما يلدع, اللعبة كلها فى الكندنسر اللى قيمته صغيرة و مرطب و مضروب.
و ظيفى الكوندنسر يخزن شحنة الكهربا الزياده من الموبينه و يرجع يفرغها للأبلاتين أثناء دوران الإسبراتير.
و طبعاً من أكتر الحاجات اللى تحافظ على طقم الكهربا (الأبلاتين و الكندنسر و البوجيهات كمان) إنك تكون ضابط الكهربا عالشعرة.
و معظم الناس اللى الأبلاتين بيلدع معاها و هيا على الطريق, بيكون معاها حتة صنفرة ناعمة أوى (320 بتاعة الدوكو مثلاً)
تفك كوز الإسبراتير و بمفك تبعد طرفين الأبلاتين و هو راكب مكانه, و تحط السنفرة بين طرفين الأبلاتين و تصنفرة علشان تضيع الحته اللى لدعت. و تنضف الطرفين بمنديل جاف (علشان تشيل أى زيوت أو نواتج الصنفرة) و تقفل و تجرب, الوضع ده لو الكندنسر سليم بس كسل يشتغل للحظة و شيط الأبلاتين.
الحل الأمثل بقى و ده اللى فكرت فيه, نجيب كوندنسر بقيمة أعلى, و ده عند أى محل قطع غيار إلكترونيات, بس مش هتلاقيه بنفس الشكل طبعاً, المهم يأدى الغرض. بيكون إسمه مكثف .
الكوندنسر اللى بيتباع فى السوق تقريباً ربع مايكرو فاراد, ممكن نجيب واحد ميكرو فاراد, و أنسى إن الأبلاتين يلدع تانى.
الفكرة دى عملتها شركة زمان اسمها ماس فى مصر, بس الشركة قفلت لإن الجهاز مكانش بيعطل خالص تقريباً و بالتالى مفيش صيانه و مكسب مستمر, و باعت كل اللى فى المخازن لواحد اسمة محمد موسى فى الهرم كان بيبع الجهاز على النت, بس لما سألته قالى خلص.
و فى بدل الكلام ده كله حل تانى, تركب أسبراتير الكترونى بمشط, و لا أبلاتين و لا كوندنسر, بس ممكن تحتاج تغير الموبينه لألكترونى و طفم بوجيهات بمقاومة, بس الفرق فى السحب إوعى وشك.
==============================================
بالنسبة لتغيير الأبلاتين و إتجاه الشاكوش, أنا مبدئياً كنت بأفك الأبلاتين و أركب الجديد و أضبط الخلوص عالفيللر (0.40) و هو الإسبراتير راكب مكانه علشان موضوع الشاكوش(مره عملتها معايا يوم الوقفة و طبعاً أربع أيام عيد عطلانه) , و بعد كده الحمد لله عرفت إزاى تقسيم كهربة العربية من الأول (من الكتالوج) فبقت العملية أسهل حتى لو نسيت إتجاه الشاكوش ممكن تقسم من الأول .
اللى بيتم : الميكانيكى بيبص على إتجاه الشاكوش (النحاسه اللى فوق الإسبراتير تحت الكوز على طول) بيشوف متجهه فين بالضبط, و ممكن يعمل علامة علشان مينساش, و بعدين يفك الإسبراتير كله و يغير و يضبط الخلوص و يشحم و .... و يرجع يسقط الإسبراتير مكانه و يكون الشاكوش فى نفس الإتجاه بالضبط.
حاول يا أستاذ أبو يحيى تتعلم فيها و تجرب, اللادا (و الفيات القديم و إخواتها) من أبسط العربيات على وجه البسيطة, يعنى لو مفهمتهاش مش هتقدر تفهم أى عربية تانية.
أعانك الله و أى خدمه
اللهم علمنا ما ينفعنا و انفعنا بما علمتنا و زدنا علما
المفضلات