الموضوع: اشتريت فيات بونتو 2003 وعاوز معلومات مهمة

المشاركة الأصلية كتبت بواسطة kokooooo2008

السلام عليكم
من شهر بالظبط اشتريت فيات بونتو 2003 هاتشباك وفتحة سقف
بصراحة كان نفسى اجيب الكلاسيك كان عاجبنى شكلها من قدام اكتر من ال 2003
بس الحمد لله فيما رزق - كانت دى من نصيبى
العربية ماشية 255 الف كيلو بس حالتها زيرووووو واول توكيل من الأصلى وصاحبتها الاصلية بنت والتوكيل اللى بعدها راجل كبير - فالحمد لله العربية لا مطحونة ولا حاجة اخرها كانت بتمشى.
اشتريتها وانا مش بعرف اسوق اصلا واخدت واحد صاحبى ساقها معايا من القاهرة وجيت بيها المحلة الكبرى
العربية مش منتشرة خالص فى المحلة وناس كتيرة حذرتنى من قطع غيارها اللى مش موجودة - بس انا بصراحة كانت عاجبانى ومكنتش عاوز اركب دايو ولا فيرنا نهائى وفى نفس الوقت عربية اوروبى وشبابى
الحمد لله اتعلمت على العربية فى يوم - تانى يوم كنت طالع بيها اسبوع بالظبط وسافرت بيها - وحتى الان من ساعة ما جيبتها سافرة بيها 5 مرات هو سفر مش كبير - مسافات من 40-50 كيلو على قدى فالأول
العربية حلو جدااااااا وكل الكلام والمميزات اللى كنت بسمعه عنها لقيته.
نيجى بقى لشويه الاستفسارات واللى مش لاقى حد يجاوبنى عليها هنا وخايف الصنايعية يفتولى فيها.
قولت اظبط بقى العفشة واتطمن على الماكينة طالما اتعلمت - روحت لعفشجى الأول قاللى فيبرة الدريكسيون وجلب مقصات ومساعدين - روحت لواحد تانى قاللى لا هى فيبرة دريكسيون بس وجلب مقصات المساعدين كويسين - ألف بقى على جلب المقصات فى المحلة مش لاقى - روحت لواحد اسمه أورجينال فى طنطا قالولى انه بيشتغل فى البونتو مش لاقى - روحت لواح اسمه علاء فهيم فى المنصورة بتاع بونتو برده - مش لاقى

وأخيرا قابلت واحد عند اورجينال تانى مرة لما روحت قاللى العربية دى ملهاش جلب مقصات - بتشترى المقص على بعضه - والمقص التركى ب 280 جنيه الايطالى ب 450 جنيه - طبعا الكلام ده انا معرفش صحيح ولا ايه - وخدوا بالكوا يا جماعة انا اول مرة اركب واول مرة اسوق وماليش خبرة فالعربيات خاااااااااااااالص

روحت بقى للميكانيكى - غيرلى فلتر الزيت والزيت وياريت تعرفونى احسن زيت للعربية دى ايه - وحطلى مياه فى الريداتير عادية - سمعت انه بيتحط مياه خضراء وهى احسن وتبخيرها اقل وبتحافظ على الريداتير - الكلام ده برده معرفش صح ولا ايه؟؟
وغيرلى سير الكاتينة - وقاللى بيتغير كل 30 الف كيلو ؟؟؟؟؟؟؟؟؟؟؟

العربية تمام ما شاء الله والحمد لله مرتاح جدااااااااا وحاسس انى مقتنع باختيارى وموفق فيه جداااااااا - بس مشكلتى فى قطع الغيار مش عارف اجيبها منين - وطبعا علشان شغلى مكسل اروح القاهرة
وكمان فى حاجة ناس كتيرة لاحظتها معايا لما ركبوا العربية - الدبرياج تقيل - وده فى الاول كان بيخلى العربية تقف منى كتير - وكنت شايفها عالية - كلت بيها كام مطب فى الاول وحاليا لما بركب 2 او 3 ورا ساعات بحك فى المطبات - مش عارف المطبات اللى فيها مشكلة ولا انا اللى فيا المشكلة؟؟
وعلى فكرة هى بالكاوتش العادى بتاعها - عاوز اعرف برده لو هركب جنوط احسن مقاس ليها كام وانضف نوع ايه واجيبه منيييييييييييييييييييين؟؟

نيجى بقى لحاجة اسمها جلب المساعدين - فى واحد صاحبى قاللى ركب جلب فى المساعدين علشان ترفع العربية شويه علشان المطبات - وفنفس الوقت حد تانى قاللى ان الجلب مع الحمولة التقيلة غلط عالمساعدين؟؟؟ اصدق مين واعمل ايه؟؟؟؟؟

كان فى نقط زيت بسيطة بتنزل من قدام الميكانيكى قاللى دى حاجة اسمها بيبه الفتيس عاوزة تتغير؟؟
أنا عاوز اعرف الميكانيكى بيفتى ولا ايه - البونتو مش كتير اللى بيشتغلوا فيه اصلا - وانا مش عاوز اهين العربية.

آسف جدااااااا على التطويل - بس انا جديد بقى ومحتاج كم كبير جدااااااا من المعلومات....

بص انا كنت هكتب لك تقريبا كل اللي كتبه /المهندس / ابو يحيي ... تابع معاه لانه فاهم في العربية دي تحديدا كويسة ولو محتاج حد متخصص في الفيات الحديث قولي وانا ابعت لواحد متخصص في الفيات الحديث بس


بالتوفيق ان شاء الله