مشكلة أسرية

**MaZaGAngeE** · 21-06-2015 11:27 PM

ايه المشكله?
ده الطبيعي من صبيان في سن كلها طاقة و حركة و انت بتقول مقفول عليهم…
الصبيان طبيعتها الشقاوة و التخريب…
انت نسيت كنا ازاي واحنا في سنهم ?

**بحار** · 21-06-2015 11:54 PM

اعتقد دى اصعب مراحل التربيه على الاب والام سن تحت 12 ربنا معاك ..
والمشكلة لما اللى بيربى يكون خلقه ضيق واعصابه بتتعب من الضغط ..
حاول يكون فى وقت لهم بره البيت كل يوم لو حتى اتنين منهم .. واشد وارخى وفوت مرة وحاسب التانيه ..
وربنا يكرمك فيهم دول نعمه مايحسهاش غير المحروم منها ..

**ahmedfor3** · 22-06-2015 12:13 AM

على فكره المرحله دى مش صعبه ولا حاجه سهل جدا العقاب لكن عندما يبلغ سن المراهقه هيبقى اصعب شئ العقاب
كل ما الطفل بيكبر مشاكله بتكتر وطلابته بتكتر وعمره ما هيحس بائهله مهما يعمله افضل الحلول تربيهم تربيه دينيه
علشان يعرف قيمة الابوين ونصيحه بلا ش تدليل ذياده عن اللزوم خلى كل شئ بالمعقول وربنا يعينك عيلهم

**Bassem Youssef** · 22-06-2015 12:19 AM

الاجيال الجديده دي اجيال بشعه

انا بشوف عيال بتعمل عمايل سوده في اهاليهم

و عيال تحس انهم متربيين علي الرصيف

مع ان اهاليهم ناس محترمين و مربينهم كويس

المجتمع اللي احنا فيه مجتمع قذر

هي دي المشكله

في حلول ممكن تجربها

1) اسحب منهم الايباد و الموبايلات
2) افصل النت عنهم لو بيستخدموه
3) اخفي اللعب بتاعتهم

ممكن توديهم علي جدتهم

و تقضي سهره رومانسيه مع زوجتك

او تخرجوا مع بعض و تتعشوا في مطعم

**أبو آسر** · 22-06-2015 12:23 AM

النيرسيري في دماغنا من فترة فعلا بس المشكلة ان الحضانات هنا يا اما رخيصة وزبالة يا اما كويسة وغالية بتعدي الف جنيه شهريا بس هحاول اضغط نفسي لانه فعلا لازم يروح حضانة يفرغ طاقته هناك ويريح امه الكام ساعة دول
وانا شخصيا ببقى شديد معاهم واحيانا بضرب وبحاول اخليهم يخافوا مني علشان يبقى في رادع ليهم لان امهم مهما زعقت واتكلمت مش بيخافوا منها وفي نفس الوقت بحاول احببهم فيا وافسحهم والعب معاهم واحضنهم لاني عاذرهم برده خاصة بعد الاخير من ساعة ما جه وهو واخد كل الاهتمام والدلع والحنان
موضوع الشغالة فعلا بنجيبها كل فترة تعمل الشقة كلها واتفقت مع زوجتي تيجي مرة كل اسبوع ونبهت عليها متعملش اي شغل نضافة في البيت خالص وتتفرغ للاولاد ولنفسها اهو يخف عنها الحمل شوية
برده كل فترة بنروح نادي مثلا او ملاهي واخد الكبار العبهم واسيبها هي مع الصغير واحيانا بنزور اهلها عندهم بيت كبير بحديقة ومقفول بيلعبوا ويجروا طول اليوم وهي تقعد مع اهلها مش شايلة همهم تقريبا وبرده لسة رايحيين مصيف قعدنا ٣ ايام غيرنا جو وكانت ايام جميلة بس المشكلة كل الحاجات دي بتتنسي بسرعة وجو الكآبة بيرجع علطول
موضوع التربية المغلقة انا مضطر لاني مش هقدر اخليهم يحتكوا باطفال في الشارع او مستويات متدنية يبقى كده انا بحكم على كل اللي ببنيه بالفشل والهدم وهما مش مغلقين ٢٤ ساعة لانهم بيتمرنوا سباحة يومين اسبوعيا وكاراتيه يومين تانيين ويوم بيبقوا مع قرايبهم يعني ٥ ايام في الاسبوع بيحتكوا باطفال زيهم وايام الدراسة نفس الكلام ٥ ايام اسبوعيا بيقضوا نص اليوم مع اصدقائهم في المدرسة فمش شايف انه في عزلة او اقفال ومش الحل اني اخليهم يحتكوا باولاد الشوارع علشان لما يكبروا مينصدموش ! ده مبدأ غلط تماما
موضوع القراءة كنا بنقرأ فعلا من زمان لكن المشكلة في التطبيق لان مهما الانسان قرأ بيواجه واقع ممكن ميعرفش يطبق عليه اللي قرأه وموضوع الكورسات هحاول اشوف ولو حاجة على يوتيوب لان صعب نحضر كورسات في مراكز وكده لان الوقت طبعا معدوم خاصة البيبي الصغير مش مخلينا عارفين نتنفس ولا نروح اي مكان
شكرا لكم جميعا ومتبخلوش علي بباقي نصائحكم وياريت نركز على مشكلة والدتهم اكتر اللي بقت عصبية جدا ونفسيتها تعبت وبالتالي بيأثر على الاولاد وخايف ده يكون ليه اثر سلبي على سلوكهم وتربيتهم خاصة ان جو المشاحنات بدأ يزيد بينا وبقينا على اعصابنا من اقل حاجة بسبب الضغوط بتاعة الاولاد والعمل وضغوط الحياة بشكل عام

**yuong313** · 22-06-2015 10:19 AM

ابو اسر مشكلتك هي نفس مشكلتي تماما بفارق ان اولادي الثلاث الذكور في نفس المرحلة العمرية
الكبير 5 سنين الاوسط 3 سنين الصغير سنة
من الاخر البيت مورستان عياط وصريخ مهما حاولت من ثواب وعقاب مش حيجيب نتيجة لان المرحلة السنية اللي بيمروا بيها هي بتاعة قمة الشقاوة والحركة والنشاط
رأي الشخص حاول تشغلهم بموهبتهم كل واحد عنده موهبة في شيء افتحله الباب لها يخرج طاقته فيها
اللي بيحب الرياضة خليه يخرج طاقته فيها لان الشقاوة طاقة زيادة فاذ استنفذوها لن تجد مشاكل

وبالنسبة للزوجة مفيش حل غير الصبر ثم الصبر ومرحلة وحتعدي وربنا مايحرمك منهم

**ahmedwagdy03** · 22-06-2015 11:15 AM

ليه مسميها مشكلة أسرية . هى مش مشكلة و لا حاجة

ده شيىء طبيعى جدا فى السن ده .أوعى تفتكر الولد حيفضل فى نظرك طول عمره حمادة الصغير اللى بتشيله و ترفعه فى الهوا يضحكلك أو اللى أقصى أمنياته تجيبله عربية لعبة أو حاجة حلوة . الأطفال مخهم بيكبر مع الوقت و تفكيرهم يختلف و مع التكنولوجيا المتطورة شخصيتهم بتتغير .

أنا مريت بالمرحلة دى مع إبنى و مازلت أعانى مرحلة البلوغ و التمرد فى سن ال12 دلوقتى .بس نصيحة ليك حاول تبقى متفتح معاه و بلاش كبت و رقابة صارمة لإنها بتولد الفضول و اللى إنت بتمنعه منه دلوقتى حيروحله من وراك . عامله كواحد كبير فاهم يقدر يتحمل مسئولية بس لما يبدأ صوته يعلى أو يتجرأ على أمه أو إخواته إعمل زي و إديله بالجزمة .

عادى جدا و مطحتش فى بالك

**mikho83** · 22-06-2015 11:38 AM

مشكلتنا في تربية أولادنا إننا بنعاملهم بعقولنا احنا، ومش بنحاول ننزل لعقولهم عشان ناثر عليهم. حاول تتدرب على موضوع انك تمسك نفسك وزوجتك بردوا واعتبروا تربية ليكم زي تربية أولادكم بالظبط، لو نجحتوا مع نفسكم أكيد هاتنجحوا مع أولادكم

**friendship7897** · 22-06-2015 01:30 PM

المشاركة الأصلية كتبت بواسطة أبو آسر

السلام عليكم
بدون مقدمات

عليكم السلام ورحمة الله وبركاته أبو آسر
وبدون مقدمات

1) المشكلة الأساسية هي مشكل الأب والأم مش الأولاد . لأن الأب أو الأم العصبي في تصرفاته يعلم أولاده العصبية بعكس الأب والأم الهادئيين فأن أطفالهم بيتعلم منهم السلوك الهادي والمرن لأن الطفل بيتعلم ويقلد اللي حوله .

2) لازم كل أب وأم يعرف أولاً إن ربنا أكرمه بنعمه محروم منها ناس كتير ، فلو أتعاملوا مع الأولاد أنهم نعمة هيقبلوا منهم أي تصرف .

3) جزء النظام الزائد مع وجود الأطفال في البيت هيزيد توتر الأم – لازم تخفف ترتيب الأشياء وتنسيقها بالمسطرة ( كما وصفت ) ، ولكنها طبعاً عليها متابعة نظافة المنزل بدقة علشان الميكروبات وليس نظامه .

4) لازم نطلق بعض الحرية للأولاد ليعرفوا أنهم ممكن الاعتماد عليهم ( طبعاً الكبار منهم ) ويتم توزيع بعض المسئوليات عليهم حسب كل واحد وإهتمامه ونشيد بهذا الإهتمام مع عدم المقارنة – يعنى واحد بيحب ينزل الشارع يكون هو المسئول عن شراء أي شئ ولو حتى تمنع نفسك من شراءه عند شراء مستلزمات البيت ، وهو نفسه يعرف أنكم من غير نزول أبنك فلان ليشتري هذه الطلبات ( ولو علبة ملح ) مش عارفين كنتوا هتعيشوا إزاي !! ، والثاني مثلا تكليفه بترتيب مكتب أو تطبيق بعض الغسيل ، وطبعاً تشيد بأحلى تطبيق غسيل ومش عارفة من غيرك كنت هعمل أيه ؟، ومن غير ما نغيظ دا بشغلة الآخر .

5) وأنتوا بتحضروا الأكل تكلف الإثنين مع بعض تجنباً للشجار ( فلان هات المعالق وأنت يا علان ضع العيش على السفرة ) ، وطبعاً برفوا لكل منهما بعد كل حاجة تافهة بيعملوها – على سبيل المثال - أنا أبني المسؤول عن توضيب طبق الفول كل يوم جمعة ، وكل سحور الأن ( عنده 9 سنوات ) ، ولو تشوفه وهو بيجهز الفول تقول عليه أكبر شيف ، ويقول لي أخرجي يا ماما علشان الخلطة السرية بتاعتي ( ويكون هيحط بعض قطرات الخل هههه – هذه بنسبة له خلطته السرية ) وطبعاً في الأول بعد مساعدتي بكمية الملح والزيت أو ما شابه ودلوقتي – الحمد لله أعتمد عليه فعلاً في تجهيزه ، وحاجات تانية كتير ( بسم الله ما شاء الله ).

6) في الآخر – على الأم الإنفراد بنفسها قليلا يومياً ولو نصف ساعة خلال النهار – وكل اللي في البيت يعرفوا هذا الموعد وأولهم أطفالك طبعاً ، وتستغل هي أي وقت يكون فيها البيبي نايم – في النصف الساعة دي تعمل أي حاجة هي نفسها فيها – طبعاً غير الإلتزامات – يعنى مش نشر غسيل مؤجل ولا صلاة فريضة ولا ترتيب حاجة في البيت – لأ والف لأ – حاجة تخصها هي – تقرأ مجلة – تعمل هواية ليها زي تطريز أو رسم أو سماع أغنية أو ترديد دعاء أو لعبة موبايل أو تصفح النت أو حتى تقعد مع نفسها بس ، والعيال يكونوا متأكدين إن هنا حدود ماما هتعاقبهم لو تعدوها .

ربنا يكرمكم ويخلي لكم أولادكم .