الموضوع: مشكلة أسرية

المشاركة الأصلية كتبت بواسطة ramymechanics

كدة يا أبو آسر تاخد قصتى وتعملها بإسمك

انا عندى نفس المشكلة بنفس تفاصيلك بس مع اختلافات: أولا انا ولادى الصغيرين الاتنين بيروحوا نيرسيرى نضيفة تصدق المشكلة فى ايه ؟؟ المشكلة فى الخمس او ست ساعات بتوع بالليل اللى بنقعدهم معاهم البيت و قبل ما حد يتهمنى بأننا مزودينها او مننفعش نبقى أبهات أحب اقولكم .. ان التليفزيون اتكسر مرتين .. الريسيفر اتغير 3 مرات .. مرة ابنى اما كان عنده سنتين (أيوة سنتين) جاب كرسى و طلع عالبوفيه و خد مفتاح العربية و مفتاح البيت و فتح باب الشقة بالمفتاح (وهو عنده سنتين ) و نزل و لولا سمعت صوته بعيد نزلت اجرى وراه عالسلم بقوله رايح فين بيقوللى "بيب بابا" .. ضيف على كدة الاتنين الصغيرين بردو الاخرانى مكانش مخطط ليه بس الحمد لله طبعا على نعمته الاتنين بينهم سنة و عندى بنت فى ابتدائى لازم اذاكر لها المنهاج العجيبة بتاعة اليومين دول ... مشكلتى بقا اكبر من مشكلتك فى ايه .. انا شغلى بيخلينى نص السنة مسافر و مراتى شايلة كل دة لوحدها و رغم ربنا انعم عليها بوافر من الصبر والهدوء لكن بتنفجر ساعات و انا عاذرها لأنى لو قعدت معاهم ساعتين بتجنن و مؤخرا انفجرت انفجار كبير شوية بردو من التعب و اللى بيعملوه والمشكلة انها رافضة تماما حد غريب ييجى يقعد معاها يساعدها رغم انى عرضت دة كتير وانا كمان بصراحة مش مستسيغ الموضوع
يا جماعة قبل ما تطلقوا الاتهام بأنه مش عارف يربى ولاده لازم تعرفوا ان فى اطفال غير اطفالكم .. فى اطفال مأساوية غير اختلاف ظروف من واحد لواحد مع العلم انى ميسور الحمد لله ومش بدلع عيالى دلع مرق يعنى بنتى مثلا 9 سنين و رافض اجيبلها موبايل دلوقتى .. لكن انا عاوزكم تتخيلوا مراتى مثلا قاعدة بتذاكر لبنتى و واحد بيفتح دواليب المطبخ و التانى عمال بيعيط و يصرخ بدون اى هدف ولا سبب و اما يزهقوا و نقفل ابواب المطبخ والحاجات المؤذية يضربوا بعض او ينط عالمكتب بتاع اخته وهى بتذاكر و يقطع كتبها
بالمناسبة ابنى اللى مكملش 3 سنين مرة قفل اللوك بتاع البلكونة على مامته وهى جوة و مشى مرضيش يفتح و اضطرينا نجيب سلم و انط من برة العمارة عشان افتحلها و اكسر الازاز لان مفتاح الشقة كان راكب من جوة و مفيش حد تانى فالبيت
بالمناسبة احنا جربنا كل اساليب الثواب و العقاب اللى الاخووة الافاضل اقترحوها من حبس و تفاهم و ضرب و ترغيب و ترهيب و الضرب دة بنلجأ له نادرا و 90% بيبقى انا مش مامتهم يعنى مفيش سبب يضطرهم يعاندوا معاها او يستقصدوها

عشان كده بقول ...علينا بالدعاء