هل جواز الصالونات فاشل أم ناجح ؟

**misry** · 28-06-2015 04:59 PM

السلام عليكم ...

لو سمحتم يا شباب ويا شابات عاوز أعرف رأيكم , ايه الافضل

جواز الصالونات

وللا الجواز عن حب أو معرفة مسبقة

بالنسبة لي , اللي مأخرني لحد دلوقتي اني مش مقتنع بجواز الصالونات

هو صحيح اخواتي اتجوزوا بالطريقة دي وسعداء الحمد لله , بس انا مش حاسس انها الطريقة المثلى للجواز

لأنه في المعظم كله بيمثل على كله , انما لو تعرف البنت قبل كده - مثلا معاك في الشغل - هتبقى عارف

اخلاقها وطباعها بدون تزويق وهي برضه هتبقى عارفاك على حقيقتك

المشكلة بقى اني لو استنيت اني الاقي واحدة في الشغل أو اني أعجب بواحدة وبعدين اتقدملها هعنس وهاتجوز على الاربعين كده وللا حاجة

ايه رأيكم ... الافضل الصالونات وللا الحب

وايه اللي يخلي الصالونات ينجح لو اتحوجت ليه ..؟

شكرا جزيلا

**rotanamasoud** · 29-06-2015 01:03 AM

ده موضوع نسبى يعنى فى اتجوز صالونات ونجح وفشل وفى اتجوز حب ونجح وفشل
يعنى مش مقياس وكل نوع وله عيوبه ومميزاته
مميزات الصالون اختيار اسرى متوافق مستوى اجتماعى متقارب الخ وعيوبه كانك رايح تتفرج على شكل ومش عارف لسه من جوه الطباع والحب والمشاعر ايه
مميزات الحب (الحب حب) وعيوبه زى ما بيقولو مرايته عاميه ممكن غير متقاربين عائلات غير متقاربين مستوى اجتماعى الخ
وفى الاخر بيقولو اظفر بذات الدين

**Mostafa.Mahran** · 29-06-2015 03:36 AM

الصالونات بتختار انسب حاجة ليك و بتكتشف الطباع بعدين

الحب بتعرف الطباع و مش بتختار اى حاجة

**Dr. Assem** · 29-06-2015 04:21 AM

اوعي تتجوز لمجرد انك خايف تعجز. اولا لانك حتظلم نفسك و زوجتك بعد كده لو اخترت بتسرع. ثانيا لأن الراجل مايعيبوش سنه على عكس الست و ده على حسب نظرة مجتمعنا اللي رغم اعتراضي عليها لكن واقع ملموس

نصيبك حتلاقيه. و ممكن واحدة تكون عارفها من زمان ماتكونش على بالك كزوجة. او واحدة تشوفها النهاردة و ترتبط بيها لبقية حياتكم.

جواز الصالونات ممتاز اذا تم الاختيار على حسب معايير دينية و اجتماعية سليمة. اما لو كان صفقة او مجرد حاجة ناقصاني اكملها زي ما بكمل دراستي او اشتري شقة وعربية. فده طبعا نسبة فشله عالية. او علي الاقل مشاكله كتيرة

كتير من زملائي اللي شغالين في الخليج الاقيه بيكلمني و يقول لي اشوفله كام واحدة حلوين و ياسلام لو عرفت ابعتله صورهم او بروفال الفيس بوك بتاعهم. علشان لما ينزل مصر ينقي و يحجز و السنة اللي بعدها يشيل.

طبعا انا رافض المبدا ده تماما. لانها مش صفقة. و رغم عذري للمغترب لكن الغربة زي ماليها فوايد ليها تمن.

ربنا يوفقك في الزوجة الصالحة اللي هي خير متاع الدنيا. و ماتنساناش في تورتة الفرح بقى عن قريب ان شاء الله

**ayaamna** · 29-06-2015 12:50 PM

صلى استخاره وتوكل على الله
واختار الدين ها تكسب كتيييير

**memoo305** · 29-06-2015 01:34 PM

مش عارف اقولك ايه بس بص هقولك حاجة والله أعلم:
جواز الصالونات قد يكون الحل بس لازم تاخد في اعتبارك عامل مهم جدا الا وهو تعرف فلان اه عاشرته لا يبقى ماتعرفوش .ممكن تخش على موضوع معطياته ممتازة بس تكتشف ان الكل بيمثل علشان الليلة تتم .
يبقى لو كان الموضوع عن طريق حد ثقة جدا أو معرفة شحصية بية توكل على الله. لوكان عمياني ماتخشش عليه الا لو كنت ابن سوق اوي وتقدر تفهمها وهي طايرة وتقدر تقول لا في الوقت المناسب.(ان مش بخوفك بس بوعيك لوجه الله)
وربنا يوفقك في اختيار مناسب

**sherif222** · 30-06-2015 02:11 AM

جواز الصالونات افضل وخصوصا فى ايامنا هذه

**misry** · 30-06-2015 03:03 AM

المشاركة الأصلية كتبت بواسطة rotanamasoud

ده موضوع نسبى يعنى فى اتجوز صالونات ونجح وفشل وفى اتجوز حب ونجح وفشل
يعنى مش مقياس وكل نوع وله عيوبه ومميزاته
مميزات الصالون اختيار اسرى متوافق مستوى اجتماعى متقارب الخ وعيوبه كانك رايح تتفرج على شكل ومش عارف لسه من جوه الطباع والحب والمشاعر ايه
مميزات الحب (الحب حب) وعيوبه زى ما بيقولو مرايته عاميه ممكن غير متقاربين عائلات غير متقاربين مستوى اجتماعى الخ
وفى الاخر بيقولو اظفر بذات الدين

ياريتني الاقي ذات الدين ... الواحد بيشوف حاجات تشيب

البنات فاكرة انها كل ما تلبس ضيق وتحط مكياج هتتجوز بسرعة !!!

**misry** · 30-06-2015 03:07 AM

المشاركة الأصلية كتبت بواسطة Mostafa.Mahran

الصالونات بتختار انسب حاجة ليك و بتكتشف الطباع بعدين

الحب بتعرف الطباع و مش بتختار اى حاجة

يعني انهو الاحسن في رأيك

وللا الاتنين وحشين ونفضل عازبين احسن

**misry** · 30-06-2015 03:17 AM

المشاركة الأصلية كتبت بواسطة Dr. Assem

اوعي تتجوز لمجرد انك خايف تعجز. اولا لانك حتظلم نفسك و زوجتك بعد كده لو اخترت بتسرع. ثانيا لأن الراجل مايعيبوش سنه على عكس الست و ده على حسب نظرة مجتمعنا اللي رغم اعتراضي عليها لكن واقع ملموس

نصيبك حتلاقيه. و ممكن واحدة تكون عارفها من زمان ماتكونش على بالك كزوجة. او واحدة تشوفها النهاردة و ترتبط بيها لبقية حياتكم.

جواز الصالونات ممتاز اذا تم الاختيار على حسب معايير دينية و اجتماعية سليمة. اما لو كان صفقة او مجرد حاجة ناقصاني اكملها زي ما بكمل دراستي او اشتري شقة وعربية. فده طبعا نسبة فشله عالية. او علي الاقل مشاكله كتيرة

كتير من زملائي اللي شغالين في الخليج الاقيه بيكلمني و يقول لي اشوفله كام واحدة حلوين و ياسلام لو عرفت ابعتله صورهم او بروفال الفيس بوك بتاعهم. علشان لما ينزل مصر ينقي و يحجز و السنة اللي بعدها يشيل.

طبعا انا رافض المبدا ده تماما. لانها مش صفقة. و رغم عذري للمغترب لكن الغربة زي ماليها فوايد ليها تمن.

ربنا يوفقك في الزوجة الصالحة اللي هي خير متاع الدنيا. و ماتنساناش في تورتة الفرح بقى عن قريب ان شاء الله

موضوع السن مشكلة بالنسبة للراجل كمان , لو عديت التلاتين اختياراتك بتبقى محدودة برضه وصعب تلاقي الصفات اللي انت عاوزها , مش كده بس اهل العروسة هيقولوا طالما عديت التلاتين يبقى معاك فلوس وانك اتأخرت علشان بتحوش فطلباتهم بيبقى مبالغ فيها.

ربنا يتقبل دعاؤك والاقي الزوجة الصالحة

ولو لقيتها اكيد هعزمك على التورتة والاكل كمان

الموضوع: هل جواز الصالونات فاشل أم ناجح ؟

LinkBack

أدوات الموضوع

عرض

-

-

-

-

-

المواضيع المتشابهه

جواز الصالونات و الخداع

الوسيط في جواز الصالونات

الحُب الحلال و جواز الصالونات وجهان لعملة واحده ;))

الكلمات الدلالية لهذا الموضوع

المفضلات

المفضلات

ضوابط المشاركة