الموضوع: بعمل غلط ؟

مرحلة من العمر .. بتحس فيها بالضعف .. نفسك تغير كل حاجة .. اللي كان صعب من شهور بقي سهل أوي النهردة
أنا من الناس اللي بتابع باستمرار صحتها .. عديت على الدكتور وعملي كل الفحوصات والتحاليل اللازمة .. وقالي كل حاجة سليمة
قلتله أنا تعبان ومنهك جدًا قالي يبقى احتمال محتاج تقعد مع دكتور نفساني .. فعلًا روحت لدكتور النهردة بعد التراويح
وسألني عن وضعي وحياتي وعمري وقالي يعني الإنسان الطبيعي بيمر بمراحل كدا فدا محتاج دعم أسري وجو صداقات مش أدوية وعلاج

المهم أنا من فترة حوالي شهرين أو أكتر شوية عايش لوحدي .. وزوجتي عند أهلها .. وعلاقاتي بتنتهي عند الشغل ..
ومش ناوي أعمل صداقات أو أجدد علاقاتي بالناس اللي أعرفهم
عايش مابين السعودية و سويسرا غالبية وقتي في السعودية بسبب إرتباطي بالشغل و زيورخ عشان والدتي عايشة هناك
علاقتي بوالدي في غاية السوء ..... أنا مش هقدر أصلحها وعندي تصور إني وصلت لأفضل وضع بالنسبة لعلاقتي بيه ..
يعني هوا دا أحسن حال ممكن تكون عليه العلاقة مابينا

رمضان قلب عليا مواجع كتير .. وأنا بفطر ولا بتسحر .. مش حاسس بطعم الأكل .. لما بصلي التراويح بصليها بحزن والوقت دا بنهار فيه تمامًا لما بقيت نفسي أصلي لوحدي

أنا مش عارف إيه سر الحالة دي بحس إن ربنا بيعاقبني على حاجة أنا مش عارفها .. بحاول أقرأ قرآن وأتصدق وأصلي بأفضل ماعندي .. بس مش عارف إيه الغلط في حياتي
فيه حاجة أنا بعملها غلط .. المشكلة إني مش عارفها .. إمبارح قعد أراجع قوائم الناس اللي اداينت منهم ( لإني مريت بضائقة مالية لفترة )
لقيت ديوني كلها مسددة واللي توفى رديت لولاده الدين كامل

كلمت أخويا عشان أعرف منه إذا كنت غلطان في حق والدي من وجهة نظره قالي تصرفي كان صحيح ( مش هينفع أقول تفاصيل )
كلمت والدتي عشان أعرف إن كانت زعلانة أو فيه أي حاجة من ناحيتي أو هيا مش مبسوطة
قالتلي إنها عمرها مابتنام وهيا زعلانة من حد فينا وطلبت مني أزورها في العيد وأحوالها مبسوطة وسعيدة ومش ناقصها غير لمتنا في العيد

هل حد مر بمرحلة زي دي وهل دا يدل على غضب ربنا مني .. ازاي اطلع من الحالة اللي أنا مش عارف سببها

مرة كان عندي اجتماع وكنت مجتمع فيه مع ناس خسرتنا وتكلمت مع المسؤول عن الخسائر دي قدام الموظفين بحدة شوية وخرجت
فبعد ماخرجت كنت بهزر مع موظف من الموظفين فبهزار ..( قالي إنتا عندك قدرة على اغتيال الناس معنويًا )
توقفت عند جملته كتير .. رغم إنها كانت هزار بس حسيت إنه قاصدها .. ياترى أنا كدا فعلًا .. هل ربنا بيغتالني معنويًا
كل كلمة بقيت بفسرها إنها ممكن تكون رسالة من ربنا