الموضوع: بعمل غلط ؟

المشاركة الأصلية كتبت بواسطة kaza

فية اباء زي العينة دي مثلا والدي لواء شرطة سابق وبرضة لية بلاوية بيعاملني اسوء معاملة بين اخواتي منذ نعومة اظافري ومش هاقول امثلة يكفي ذكرة لاختي الكبري ان تعاملني مثل ابن البواب غير محاولتة لحرماني من ميراثي من والدتي رحمها الله غير اتصالة باهل زوجتي ليقول لهم ابني حرامي قبل الزواج وبيسرق حاجات من البيت علشان يشوة صورتي مع االناس ... وعمري ما حسيت بوجودة ولم استعين بية في اي مشكلة ظلمني وحتي اخواتي المفضلين عليا ظلمهم وفرقنا من بعض بسبب عدم عدلة ومابيسعاش في لم اولادة ابدا وعمرة ما ساعدني بمليم ولا صرف عليا جنية وابسط كلماتة ان ابوة مات وهو عندة 10 سنين شوف حد غيري...اب قاسي ظالم ربنا ما يحكم بية علي حد ..وبرضة باعاملة كويس من يوم للتاني بازورة علما بان اخواتي اللي اداهم كل شيئ وحرمني سابوة لوحدة فقط طاعة لله ليس الا ....الدنيا مليانة مآسي ودوما قول الحمد لله والقناعة ومحاولاتك المتكررة للنهوض بعد وقوعك هما مفتاحك في الدنيا ...اوعي تستسلم او تضعف وكل يوم لازم تكون علي يقين ان المولي موجود ومطلع وبيغير الحال بقدرتة وان اللي انت فية النهاردة مش هيستمر ..هو مغير الاحوال والقادر المقتدر وادعية بالحنان المنان والحي القيوم صدقني هتلاقيةجنبك وحالك هيتصلح باذنة

ربنا يعوضك .. مش عارف أقولك إيه .. سامح وحاول بالإستمرار ببره بقدر المستطاع
.....
وأنا صغير كان بيعاملني بشدة بس كان أب بيعلمني كويس وحريص على صحتي وتربيتي
بس المشكلة حصلت لما كبرت وإشتغلت معاه .. إبتديت ألاحظ أخطاء وإبتديت أتكلم وأعترض وأتناقش
دي محرمات عنده .. بس أنا مكنتش أقدر أسكت
على فكرة هوا مش شرطة

المشاركة الأصلية كتبت بواسطة Imhotep

نصيحة لوجه الله عشان الموضوع ده على قدر من الخطورة
يوجد فرق كبير بين الاكتئاب كمرض عقلى بيأثر على كيمياء المخ و يسبب اضطرابات فى الشخصية. . . زى ال manic depressive disorder و غيره من ال major depressive disorders
و بين الاعراض الاكتئابية اللى كل انسان على وجه الارض بيعانى من احدها او بعضها لمدة قصيرة
الفرق شيئين مهمين. . . ان الاكتئاب كمرض يمتاز بأستمراره لسنوات عديدة و ليس مدة زمنية قصيرة حتى لو امتدت شهور. . . الفرق التانى المهم هم ان الاكتئاب مرض عضال غالبا ما ينتهى بالانتحار و العياذ بالله. . . عسيان كده مش من السهل نقول لحد انه عنده اكتئاب . . .
برجاء الرجوع لطبيب نفسى

كلام صحيح . يوجد توازن بين المواد الكيميائية في المخ (neurotransmitters) . لو زادت مادة منهم او قلت يحدث بعض الامراض النفسية كالاكتئاب او الجنون.... يمكن ان يصل المرض بصاحبه لمحاولات الانتحار.تشخيص المرض يكون بواسطة الطبيب . و مادمت زرت الطبيب و اقر انك سليم اذا انت سليم
الحالة المزاجية السيئة التي نطلق عليها اكتئاب ليست باكتئاب لكن حالة نفسية نتيجة ظروف الحياة المتقلبة و ليس مرضا و يزول بزوال اسبابه غالبا.
اياك و احذر ان تتناول اي دواء اكتئاب من نفسك . الطبيب في حالة المرض يقرر الجرعة المطلوبة مع المتابعة لان غالبا مفعول الدواء يبدأ بعد مدة من العلاج يومان الي 10 ايام احيانا.
هذه الادوية ايضا لها اعراض انسحابية withdrawal symptoms لو توقفت فجأة عن تناولها .
جعل الله لك من كل ضيق فرجا و من هم مخرجا. توجه لله بالدعاء و التضرع و ان شاء الله يزول الهم و تواصل حياتك بنجاج

الأعضاء والعضوات الأفاضل أنا بشكركم على تعاونكم وحرصكم على مساعدتي
وعايز أوضح إن أنا ردة فعلي على ذهاب زوجتي لبيت أهلها مكنش غريب لأسباب كتير
يمكن دا كان أهم الأسباب اللي خلت البعض يستنتج إن دا عرض من أعراض الإكتئاب ( اللامبالاة )
أو سبب من أسباب الحالة النفسية السيئة اللي أنا فيها
ولكن لو وضحت المسألة يمكن يزول شيء من اللبس

أنا لما تزوجت كنت في وضع مادي قوي لإني كنت وقتها بشتغل مع والدي وكان والدي هوا اللي إقترح عليها إني اتقدم لهاهيا مش مصرية بالمناسبة
.. إذًا هيا تزوجتني بوضع معين
بعد الزواج بسنة تقريبًا سبت الشغل مع والدي .. ومريت بمشاكل كبيرة وكنت بلا أي خبرة في الحياة
حصلي زي الإنهيار على المستوى المادي .. وزوجتي من عائلة ذات مستوى مادي غني ..
فهيا كانت معتادة على حياة وحياتنا فجأة تغيرت ( كانت حامل بإبني ) وقلتلها عن التغير اللي حصل وإننا هنمر بضائقة مالية لفترة
قالتلي أنا مش هينفع أتبهدل قلتلها مش هتوصل لكدا طبعًا .. قالت هتوصل لإيه ؟ قلتلها مش هنقدر نسافر زي الأول مش هنقدر نتسوق زي الأول
وأمور كتير ( ترفيهية ) ممكن تتلغي أو يتم تأجيلها .. قالتلي دي بهدلة بالنسبالي .. ومراعاة لإني تزوجتها بوضع مادي معين ولحملها قلتلها حقك .. مفيش حاجة هتتغير
وخدت قرار إني مش هحسسها بأي تغير .. والمبلغ اللي كنت شايله عشان أبدأ بيه شغل مع نفسي لقيته بيتصرف على مصاريفها
سفر لأهلها في المناسبات و بتحضر مناسبات لصديقاتها وبتعزم والدتها وإخواتها البنات وكل دا على حسابي ( فنادق 5 نجوم إقامة تصل لأسبوعين في فرنسا )
كنت بروح عشان خاطرها بس ببقى قرفان من نفسي لإني ورايا شغل والتكاليف كتير
و مكنش ينفع أقولها دا كتير عليا ومصاريفك وبس ومليش دعوة بأهلك لإن دا عندنا عيب والحجات دي مابتتحسبش أصلًا .. يعني محدش بيتكلم في التفاصيل دي
فإبتديت استلف ولو جيت أفكر بيني وبين نفسي أعترض على سفرها بسبب المولود الجديد كنت أسكت عشان متقولش عشان وضعك المادي بتتحجج
كانت تسيب إبني مع المربية وتروح تتفسح مع إخواتها ومامتها .. لما إبني جتله حمى عملت مشكلة وجبتهم وجيت بعدها بكام شهر مات
ودخلنا في حالة حزن شديدة ومن كتر ما تعبت وكانت هتموت من الألم عليه قلت قدر الله وماشاء فعل ومحملتهاش المسؤولية وحملتها لنفسي
قعدت سنة بعده في عزلة وبعدها إبتدت تتأفف من كل حاجة وتزعق وتتعصب من أقل حاجة وعايزة أسافر هموت من البلد دي .. سبتها براحتها ورجعت لزيارات أهلها
و كان وضعي المالي اتحسن بس مبقتش أروح معاها لإن شغلي كتر فبقيت تشك فيا وكل تصارفاتي تفسرها على إني بخونها
وتدقيق على لبسي وأكلت فين ومع مين وسعات تيجي معايا شغلي تتخانق مع الموظفات
وتصرفات غريبة مع قريباتي !
المهم
ربنا رزقنا بمولودة من حوالي 6 شهور ومنعتها من السفر عشان تهتم البنت .. عصبية وتوتر ومش طايقة نفسها .. قلت أستحمل عشان فترة الحمل والولادة
رغم إنها مابتعملش حاجة لإن عندنا شغالة
لكن من فترة والدي جه يعمل عمرة وروحت أعمل عمره وأسلم عليه وهيا جت معايا وبدل ماروح بعربيتي استأجرت عربية زي نوع عربيتي بس 2015
لإن المسافة طويلة وعربيتي هتحتاج صيانة وشغلانة
فوالدي بما إني سبته كان معتقد إن وضعي المادي مش كويس فلما ركب العربية قالي الظاهر إنك عايز تفرجني على إنك عندك فلوس عشان كدا جيت بالعربية مش طيران
راحت مراتي قالتله لاء عربيتنا ( خردة ) دي إيجار .. فوالدي بصلها وقالها ( خردة ؟! ) و قالي إيه الألفاظ دي ! ونزل من العربية ..
لو كان علق أو مكنش علق أنا أخدت قرار إني مش هكمل معاها بعد الموقف دا
لما رجعنا البيت قعدت حوالي شهر مش طايق نفسي وممكن أفقد أعصابي عليها فقلت أبعد لما أعصابي تهدى أحفظ لها ولنفسي
و قلتلها هسافر شغل قالتلي طيب مش هعقد لوحدي هروح لأهلي قلتلها طيب روحي
ومن ساعة مامشيت ماقلتلهاش تعالي أبعتلهم مصاريف وأكلمهم ومقلتلهاش تعالي
وهوا دا سبب طلبها الطلاق ... مش هطلقها .. بس أنا أعصابي معدتش تستحمل
بالإضافة لأمور تانية متعلقة بمشاعري الشخصية الخارجة عن إرادتي مش هقدر أوضحها
أفتكر مفيش إنسان طبيعي هيقدر يستحمل كل دا بنفسية مش بتتأثر..
أنا لو رجعتها دا مش هيكون حل لحالتي .. وأنا لو محتاج علاج وهوا دا الحل أنا هاخده عشان أرتاح بس يكون حل يريحني