الموضوع: ارجو المساعده - محتاج اغير شغلى ومش عارف اشتغل ايه

اولا تحياتى لحضرتك وحابب اوضح ان اللى حقوله ده رأيي الشخصى بناء على معطيات حضرتك كتبتها وممكن تكون مش كامله بالنسبالى

ثانيا حضرتك باللى كاتبه ده المفترض انك تكون صاحب الشركه مش موظف فى المكان لان شغلك من 12-16 ساعه ده معناه انك على الاقل شريك فى المكان فحضرتك عندك 36 سنه يعنى حضرتك مش كبير ومش صغير وبالتالى لو طموحك واصل لنهايه انك تكون صاحب شركه ابدأ من دلوقتى علشان عقبال متوصل لسن الاربعين تكون استقريت بشكل كامل ودى السكه الاصعب والاختيار الاكثر مجهود وضغط عليك ولكن بصراحه انا مش شايف حد متفانى فى شغله كما ذكرت ويضيع مجهوده فى مكان مش بتاعه ده غالبا صاحب الشركه بتاعتك مبيشتغلش 16 ساعه فحرام تضيع مجهودك ده كله فى مصلحه شخص تانى خاصه بدون تقدير مادى ومعنوى .
اما لو حضرتك حابب تكون شغال فى شركه وحابب مجهودك "اللى بحييك عليه وعلى ضميرك" يظل تحت اداره شخص مسؤل عن شركه ومش حابب تتحمل مخاطره بدء بيزنس خاص بيك وينقصك بس التقدير المادى فده من اسهل الامور بخبرتك وتفانيك حتلاقى شغل بمجرد متبدأ تدور على وظيفه تانيه خاصه لو علاقاتك مع الشركات المنافسه لشركتك الحاليه كويسه ولو مش فى مصر دول الخليج حتقدرك وحتلاقى مكان تكون مبسوط فيه جدا

ثالثا مشكلتك الوحيده التوقيت اللى انت عايز تاخد فيه القرار ده "خاصه مع وجود اسره" لان القرار اللى حتاخده دلوقتى ايا كان لازم تبقي عارف انك بعد الاربعين حيكون صعب جدا تغير استايل حياتك باى شكل وحتبحث عن الاستقرار حتى لو على حساب راحتك النفسيه فحتعيش فى ضغط جامد
فحاول تاخد قرار حكيم ومدروس يحققلك اللى انت حابب حياتك تستقر عليه وابدأ فيه فورا دون تردد لانك اتأخرت فى تقييم تقدير شركتك ليك كتير جدا .

تحياتى واتمنالك التوفيق فى اختيارك .