سوزوكى سياز vs نيو لوجان

**ginger** · 08-07-2015 04:15 AM

من فضلكم يا جماعه انا محتاره بين السوزوكى سياز و النيولوجان اوتوماتك هاى لاين

انا خايفه من اللوجان لان قريت عن مشاكل زى ان مفيش عزل فى ضفيرة الكهرباء , ان فيه تسريب هواء سخن من ناحية الدواسات و قطمة الدريكسيون , التكييف بعد فتره بيبقى سئ جدا , قصاد انها بقالها فى السوق فتره كبيره و قطع غيارها متوفره عن السياز , التوكيل الى حد ما افضل ,فيها options برضه كويسه جداز

بالنسبه للسياز : فيها كل حاجه , قصاد ان خامات التابلوه جوا معجبتنيش خالص , الموتور 1400 و ده مقلقنى جدا من ناحية التأثير على السحب و التكييف و ان كان الملاك بتوعها بيقولوا انه مش مأثر , العربيه كحجم كبيره على الموتور برضه , انها جديده و لسه متجربتش كفايه , بسمع شكاوى من توافر قطع غيار السوزوكى و التوكيل ....

و ممكن برضه يكون فيه انحياز شويه للوجان لان الشكل من جوا افضل و الخامات احسن بس ممكن اضغط على نفسى بعنى لو نصحتونى بالسياز

للعلم انا معايا فيرنا 2010 علشان كده انا بدور على سحب كويس و تكييف قوى

و ياريت الناس اللى ليها تجارب مع العربيتين او يعرفوا ملاك ليهم عن قرب يقدروا يساعدونى لانى محتاره جدا و مش عارفه اخد قرار

بالمناسبه انا شغلى بيعتمد على العربيه الى حد كبير بس داخل البلد و مش بسافر بيها
شكرا ليكم

**hugan** · 08-07-2015 04:21 AM

سياز افضل

**ENG.MaRk** · 08-07-2015 04:40 AM

سياز أفضل كقيمة مقابل سعر و كوسع و كماليات أحسن من اللوجان

**hesham fawzy h** · 08-07-2015 05:02 AM

هو لازم العربيتين دول ؟ مينفعش نضيف عربية كمان ؟

على فكرة السياز صاجها ضعيف جدا . و الطابلوة من جوة ضعيف زى ما قولتى

و اللوجان مش بحبها اصلا فمش هتكلم عليها :)

**ginger** · 08-07-2015 05:18 AM

المشاركة الأصلية كتبت بواسطة hesham fawzy h

هو لازم العربيتين دول ؟ مينفعش نضيف عربية كمان ؟

على فكرة السياز صاجها ضعيف جدا . و الطابلوة من جوة ضعيف زى ما قولتى

و اللوجان مش بحبها اصلا فمش هتكلم عليها :)

للاسف دول اللى قدامى و ينفع اجيبهم , لانى بدور على عربيه فيها airbags & abs و مفيش غير دول على اد امكانياتى ... هى اللوجان سيئه اوى كده؟؟؟

**ahmzd** · 08-07-2015 05:57 AM

ممكن السيتروين سي إليزيه، وممكن البونتو تاني فئة بحوالي 120، وممكن بروتون بيرسونا أو جين تو، وممكن الأوبترا الجديدة، وممكن الصني الجديدة ( بس خلّي الأوبترا والصني في آااااااااخر اختياراتك خالص ).. هذا رأيي، والله أعلم.

**ginger** · 08-07-2015 06:00 AM

هفكر فيهم و انزل اتفرج عليهم .. شكرا جدا لحضرتك

**Mohamed Awny91** · 08-07-2015 02:43 PM

سياز إن شاء الله

**mohamed hatem** · 08-07-2015 03:00 PM

بصي يا سيدتي .. مع احترامي للاقتراحات الاخيره ... لكن كلهم توكيلاتهم مش كويسه سواء عز العرب او فيات او منصور ده غير قطع الغيار برده
السياز عربيه كويسه بس عليها علامات استفهام كتير قوي
اللوجان عربيه كويسه على اد تمنها ... بس طبعا مش كل العيوب اللي ذكرتيها دي موجوده .... وانا برشحهالك .. عشان برده اللي انت قلتيه من حيث الانتشار و التوكيل و قطع الغيار ... وانت ركبتي فيرنا وعارفه يعني ايه انتشار عربيه في مصر