هو حضرتك بتؤمنى بالابراج ؟
عرض للطباعة
الحق أخلص الحكايه قبل ما الدكتوره تمنعنى من دخول التوبيك....!!!
العريس أحاول معاه يمين ..شمال...بيرد بكلمات بالقطاره...
حسيت انه متضايق من قعدتنا مع بعض وانه كان فاكر انى هسيبه يقعد مع العروسه ..ويتعرفوا على بعض زى ما بيقولوا...
هااااااااااا...دا مين ده؟.......إنسى يا رأفت....
طبعا شاف العروسه وسلمت عليه كمان بس لحد هنا ورجعت مكانها تانى ..خلاص على كده....
بص يا أستاذ رأفت....العروسه ظروفها كذا كذا...وهى دلوقتى فى الدبلوم (مش قلتلكم طفله ).
يعنى قدامها سنه ونص...طبعا حضرتك عندك خلفيه انها يتيمه واحنا هنساعدها فى جهازها بس على قدنا وحضرتك محدش هيقولك جبت ايه او مجبتش أيه أهو كله فى بيتك بس لا يكلف الله نفسا إلا وسعها ولازم يبقى عندك خلفيه عن ظروف العروسه!!
بعد رغى كتير وهو باصص وبيعلقش...
- شوف يا أشرف (لاحظوا إنى كنت بقولله يا أستاذ رأفت ومرفعتش التكليف بينا ) موضوع الفلوس ده ميهمنيش فى حاجه...انا عايزها بشنطه هدومها...
- يا سيدى بارك الله فيك وربنا يتمملك بخير...
صاحبنا بدء يتكلم أخيرا...وياريته ما اتكلم...كلامه كله تفاخر وهجص ومعر وياريت بغناه او بأفعاله ...لأ بأموال وأفعال عمه الشريك الرئيسى فى محل الجزاره بتاع مصر الجديده واللى بسلامته بيشتغل فيه...كلامه كله مركبات نقص وجهل وكل كلامه عن التور اللى قطع صوابعه وهو بيدبحه والعجل اللى رفسه فى بطنه و هكذا...
مما زاد إنطباعى عنه تصرف إعتبرته منتهى الجليطه...
طبعا إحنا قاعدين فى الصاله والصاله دى عباره عن منطقه التقاء ابواب الغرف المقفوله على الحريم او غرف نوم لا يجب فتح ابوابها فى حضور اغراب بمعنى اننا فى مكعب من الاسمنت لا يوجد منفذ للهواء الا باب الشقه ..الاستاذ أخرج علبه السجائر الحمراء المشهوره واخرج احداها واشعلها وسألنى وهو بيولع ..إنت بتدخن؟
- لا والله ..ربنا يعافيك منها ...
- انا بشربها وانا عندى 12 سنه..
- ياراجل حد يعمل كده برضه!!!!
- مهو الواحد هيموت هيموت يبقى السجاير لا بتقدم ولا تأخر العمر ! (يا عينى على المنطق !!)
بالنسبه لموضوع الدبلوم ده مش فارق معايا ..انا شقتى جاهزه ومفيش داعى للتأخير...!
- بس حرام البنت بعد تعبها فى التعليم يروح عليها فرصه انها يبقى معاها مؤهل وبعدين فلانه مجتهده وممكن تجيب مجموع كويس فى الدبلوم وتدخل الجامعه...
لاقيته بيتعفرت من موضوع التعليم ده وعرفت من الكلام انه خرج من المدرسه من رابعه ابتدائى او حاجه زى كده..
طب مش إشكال ممكن تكمل وهى فى بيتك لو حصل نصيب إن شاء الله.
- ربنا يسهل...هى العروسه مش هتييجى تقعد معانا ولا أيه؟
خلاصه الحوار اللى حصل بعد كده .....
العريس مشى وهو مش طايقنى خصوصا انى قلتله هنسأل عليكم ونتصل بحضرتك.
العروسه وجدتها زعلانين انى رفضت يتعرفوا على بعض كويس وتقريبا نادمانيين انهم اختارونى احضر أصلا...
بالسؤال عن العريس طلع خطب كذا مره وفشكل لاسباب خايبه زى العروسه ردت على والدته بطريقه معجبتهاش..!!!!
الناس كلها زعلت منى ...وكملوا مع نفسهم بمزاجهم وفى الاخر محصلش نصيب...!!!!!!!!
فعلا .... امشي في جنازات ولا تمشي في جوازة واحدة
ما شاء الله عليك
اتكلمت في الأصول المفروضة
وبما يرضي الله
أما هو ... نيته باين فيها المياصة وعدم الجدية :ma(30):
الحمد لله ... ربنا رحمها وقدر لها الخير
هو فى الاول و فى الاخر نصيب..موضوع انك تقعد او متقعدش معاهم دة ملوش دعوة بالحصل..دى قسمة ونصيب!
عموما حضرتك عملت المفروض يتعمل..و جزاك الله خير
اما العريس..فلا تعليق
تحياتي للأستاذ اشرف فتحي , تصرفك يدل علي تحمل المسؤوليه و معني انك خايف او مرتبك فليس عيب بل يدل علي تقديرك للموقف و حجم القرار المطلوب منك , تحياتي مره تانيه لحضرتك
بالقرب من مسكني يوجد مدرسه للتعليم الابتدائي , و الدتي قادمه من الخارج في يوم من الأيام ( فقالت لي ان في بنت في هذه المدرسه في الصف الثالث او الرابع الابتدائي اهلها بيبحثوا عنها و لا يوجد لها اي اثر رغم تأكيدات المعلمين علي تواجدهم في اليوم الدراسي و انهم من الطالبات الملتزمات , طيب راحت فين و مضي علي ميعاد الانصراف الرسمي للمدرسه اكثر من 3 ساعات !!! . و بدت في الأفق الحقيقه المرعبه و هي ان تكون الطالبه اتخطفت.... بعض تمشيط المنطقه بالكامل بواسطه اهلها و السؤال لدي الأقارب و انه لم تحدث اي حوادث لها امام المدرسه , يعني زي ما بيقولوا ( فص ملح وداب ) . طبعاحاله اهلها لا توصف و خاصه الأم ), طبعا والدتي تحكي لي هذا الموقف بتأثر شديد و يكاد الدمع ينزل من عينها لأن هي معلمه و بتحب الأطفال جدا و ليها علاقات اجتماعيه جيده بالمعلمين بهذه المدرسه و بالأطفال , و بتقول لي يابني ان الأم اهون عليها تدفن ابنها بالتراب امام عينها و تتطمن عليه عن ما يبقي بعيد عنها و لا تعرف عنه اي شيء عن مكانه او حاله هو عايش و لا ميت و لا بيتعذب و لا ولا ولا ,,.
طبعا تاني يوم والدتي قالت لي بفرحه ان البنت دي رجعت امبارح باليل , و المدرسين و ابو البنت و امها قعدوا يشكروا فيا و يقولوا لي اشكري لنا الباشا قوي علي اللي عمله و مش هننسي الجميل ده طول عمرنا , باشا مين يا جماعه ؟ الباشا قريب حضرتك ؟!!!! احكيلي يا بنتي ايه اللي حصل بالضبط فردت عليها قائله( انا خرجت من المدرسه لقيت في واحده ست راكبه تاكسي و نزلت منه و نادت عليا بأسمي و قالت لي انا صاحبه ماما و قالتلي اعدي عليك اخدك من المدرسه فركبت معاها و كان معاها ايس كريم و بسكوت حلو قوي اول مره اذوقه , و لما التاكسي مشي قلتلها يا طنط مش ده طريق البيت قامت مزعقه فيا هي و السواق و قالوا لي اخرسي و قامت خبططني جامد علي دراعي يا طنط و عيط من الوجع ( طبعا والدتي تحكي بتأثر بالغ و بتحاول تتذكر تفاصيل روايه البنت بدقه) , و لما قعدت اعيط لقيت الست دي قامت واخده مني السلسله و الحلق الذهب بتوعي و بعديها بشويه التاكسي وقف و فتحت الباب و نزلتني بالعافيه و انا اعيط لاني نزلت بعيد قوي عن البيت و نزلتني في طريق فيه عربيات بتمشي بسرعه قوي و مش عارفه اروح فين , فعديت الطريق و فضلت ماشيه و لقيت راجل عسكري ماسك تليفون في ايده و لما لقاني بعيط و مش عارفه اروح قالي في ايه انت منين و ايه اللي جابك هنا ؟ فقلت له اني من المنوفيه لقيته اتكلم في التليفون بتاعه بسرعه وواحد رد عليه و قاله خلي بالك منها و بعدين لقيت عربيه بيضا جت بعد شويه و فيها راجل بيقولي اركبي فانا ما ارضيتش اركب و عيط فالراجل طبطب عليا و قالي ما تخفيش انا هروحك فركبت معاه ووداني عند واحد عسكري قاعد في مكتب كبير و كلهم عمالين يقلوله يا باشا , العسكري ده جابلي اكل و قعدت اتكلم معاه يا طنط و انا خايفه يقتلني لان كان معاه عساكر في جنبها مسدس بس هو قالي متخافيش و طبطب عليا و باسني و قالي احكيلي ايه اللي حصل فحكيتله و بعدها نمت علي الكنبه و صحيت لقيت نفسي راكبه عربيه و العسكري ده هو اللي بيسوق فقلتله انت هتقتلني يا عمو فضحك و قالي بابا اتصل بيا و انا رايح اوديكي عنده فلما العربيه قربت من البيت قلتله وقف يا عمو هنا بتنا اهه و وقف و نزلني ) الي هنا ووالدتي تحكي لي و انا و هي في حاله ذهول من اللي بنسمعه , فقامت تتصل بقريبنا الوحيد اللي ما زال بالخدمه بس ده في محافظه تانيه تبعد اكثر من 35 كيلو معقول يكون هو ؟؟ فكلمته و قال انا كنت عندكوا امبارح و كان فيه بنت مخطوفه من عندكم و لقيتها عندي ( طبعا سعادته هو بتكلم عادي جدا و كأنه ولا عمل حاجه و انه ما كلفش خاطره و نوه لنا قبل ما ييجي ) طبعا والدتي انفتحت فيه زي المدفع الرشاش و تلومه تاره و تؤنبه انه كان من الممكن اي احد من اهلها يتعرضوا له و هما مش عارفينه و يعمل لنفسه مشاكل كبيره ) , المهم الموضوع عدي لكن لما تيجي تتأمل الوضع و ان كل عوامل الهلاك كانت متوفره للبنت دي انتوا عارفين هي كانت فين ؟ اللي بيسافر علي الطريق الزراعي قادم باتجاه القاهره هيعدي علي بنها طبعا و المسافه من بنها و المنوفيه ( تحديدا مكان اقامه البنت ) تقريبا حوالي 35 كيلو او اكتر , ثانيا توافر جميع اصناف الترويع و الارهاب النفسي و المفاجاه و انها اخذت علي حين غره ده ممكن يعملها صدمه او انهيار عصبي , ثالثا المكان اللي التاكسي ( التاكسي حسب وصف البنت من القاهره ) نزلها فيه كان علي الطريق السريع و في هناك مفارق و هي كان من الممكن تمشي في اي اتجاه تاني او تعدي الطريق و هي بحاله الرعب دي و تموت تحت اي عربيه . لكن في حي قيوم هدي البنت اللي ممكن ما تكملش 9سنين و خلاها تمشي حوالي 200 متر في الاتجاه الصحيح (و كان ممكن اي حد لانها غريبه عن المكان يخطفها تاني )لغايه لما لقت قائد مرور المحافظه و هو يعتبر المنقذ الحقيقي لها مش قريبنا الباشا لانه ببساطه كان واقف في لجنه يعني مش واقف طبيعي يعني مشدود و القدر لعب دوره لانه يعرف بالصدفه ان قريبنا ده ليه معارف في نفس محافظه البنت . سبحان الله ارحم الراحمين