ارجو المساعده بخصوص كوبلن السياره

**solm2020** · 22-07-2015 04:22 AM

السلام عليكم كل سنه وانتم طيبين يا جماعه

انا عربيتي شيفروليه اسبارك موديل ٢٠١١ كنت عملت حادثه خفيفه كده وطلعت بالعربيه فوق الرصيف من ناحيه السواق يعني العجله الاماميه شمال ناحيه السواق والمقص اتكسر ساعتها والعربيه خالي ساعتها هو اللي صلحهالي في ورشه كويسه اوي وعلي ما اتذكر غير شمعدان وقنطره وكوبلن ومقص واسكترا ....يعني تقريبا معظم العفشه الاماميه اتغيرت .... وكانت كل حاجه جايبها جديده ساعتها ما عدا الكوبلن جابو استيراد لانه مكانش ساعتها العربيه الكوبلن بتاعها موجود وحاجتها مش منتشره لانها كانت موديل السنه ما علينا اسف جدا علي التطويل ...فمن ساعه لما العربيه رجعتلي والكوبلن الشمال ده بيطقطق فانا قولت لخالي قالي مش مشكله بسيطه ابقي غير الكوبلن الخارجي لما تلاقيه ...بس جيت مشيت عليها فتره طويله وهو بيطقطق وبعدين جبتلها واحد تيواني من التوفيقية مش فاكر اسمه ايه وبعدين مفيش اربع ايام ولقيته بيطقطق روحت فكيته ورجعتو للراجل راح الراجل غيرهولي بواحد تاني وركبتو قعد معايا بتاع اسبوعين ولا حاجه وجه طقطق تاني فضلت الطقطقه تزيد لغايت موصلت لدرجه كبيره اكتر من اللي كان جايبو خالي استيراد بس تقريبا اللي كان فيها من الاول لما رجعت من الحادثه كان شكلو اصلي بس بايظ ما علينا روحت مغيرو من واحد تاني انا بثق في حاجته اوي وقالي عليا لو طقطق بس كان اغلي وقالي ده تايواني بس اضمنهولك وهاي كوبي من الاصلي روحت اخدته وحسيت فعلا بفرق وفضل زي الفل معايا لغايت ما قعد بتاع ٢٢ يوم ودلوقتي بدل يطقطق فانا سالت المكانيكي ليكون انا عندي حاجه من بعد الحادثه بتبوظلي الكبولن الشمال ده وبتخليه يطقطق علي طول فقالي مفيش حاجه اسمها كده وبعدين انتا عربيتك زي الفل ومفيش اي حاجه من العفشه عندك بايظه والشاسيه سليم وبعدين قالي الكوبلن يا اما يىكب او ميركبش لو الشاسيه فاتح بعد الشر وانتا عربيتك شاسيها ساليم والمقصات سليمه مفيش حاجه من اللي انتا بتقوله ده .....فانا يا جماعه بصراحه خفت لاكون انا اللي عندي المشكله في العربيه فارجو المساعده منكم ده ممكن يكون عيب عندي بيبوظ الكبالن ولا كل الكبالن اللي انا اشتريتها ديه مضروبه .....واسف بجد علي الاطاله وكل سنه وانتم طيبين وارجوكم تساعدوني بسرعه علشان لو كده احاول ارجعو للراجل مع العلم ان العربيه ماشيه ٢٥ الف كيلو بس وانا كش بعصر الدريكسيون في الملفات وجزاكم الله كل خير وبجد اسف طولت عليكو

**احمد التربانى** · 22-07-2015 06:09 AM

ياريت أقدر أساعدك،،
لكن للأسف مش عارف السبب من إيه
أظن الكبالن صناعة رديئة

**solm2020** · 22-07-2015 06:29 AM

المشاركة الأصلية كتبت بواسطة احمد التربانى

ياريت أقدر أساعدك،،
لكن للأسف مش عارف السبب من إيه
أظن الكبالن صناعة رديئة

شكرا ليك يا استاذ احمد بس معندكش فكره ان ممكن يكون عندي حاجه هي اللي بتؤدي الي تلف الكوبلن علشان مظلمش الراجل معايا واتهمه بان الكوبلن مضروب

**Abo_Mazen** · 22-07-2015 09:45 AM

بص ...حضرتك هتروح لبتاع زوايا ..بس يكون بتاع زويا من الناس النضيفه ..اللي هو بعد ما يضبط زوايا يطبعلك تقرير بالزوايا بتاعة العربية كاملة ...

اللي أنا متأكد منه بقى الف في المائة ..إنك هتلاقي العجلة الشمال اللي بيحصل فيها المشكلة دي مأخره ...خلي بالك ..في العربيات ذات الحوض الضيق ..زي مثلا الماروتي والماتير والسبارك والألتو ..العجلة لما بتأخر ده يخلي العربية تاكل كبالن بره وجوه ..وخصوصا خصوصا ..الجنب الشمال ده لإن الأكس فيه قصير ..

عشان ما أطولش عليك ..روح لبتاع زوايا نضيف ..روح عند fit&fix ..عندهم جهاز الزوايا هانتر الأمريكي ..ما تروحش لحد بتاع زوايا من اللي بيشتغلو بالخيط ...الخيط ده كان موضه قديمه وراحت لحالها ..وزي ما قلتلك ..أكيد ..هتلاقي العجلة الشمال دي مأخره ..جرب كده وتابعني بالأخبار

**solm2020** · 22-07-2015 02:34 PM

المشاركة الأصلية كتبت بواسطة abo_mazen

بص ...حضرتك هتروح لبتاع زوايا ..بس يكون بتاع زويا من الناس النضيفه ..اللي هو بعد ما يضبط زوايا يطبعلك تقرير بالزوايا بتاعة العربية كاملة ...

اللي أنا متأكد منه بقى الف في المائة ..إنك هتلاقي العجلة الشمال اللي بيحصل فيها المشكلة دي مأخره ...خلي بالك ..في العربيات ذات الحوض الضيق ..زي مثلا الماروتي والماتير والسبارك والألتو ..العجلة لما بتأخر ده يخلي العربية تاكل كبالن بره وجوه ..وخصوصا خصوصا ..الجنب الشمال ده لإن الأكس فيه قصير ..

عشان ما أطولش عليك ..روح لبتاع زوايا نضيف ..روح عند fit&fix ..عندهم جهاز الزوايا هانتر الأمريكي ..ما تروحش لحد بتاع زوايا من اللي بيشتغلو بالخيط ...الخيط ده كان موضه قديمه وراحت لحالها ..وزي ما قلتلك ..أكيد ..هتلاقي العجلة الشمال دي مأخره ..جرب كده وتابعني بالأخبار

شكرا ليك يا استاذ ابو مازن جدا علي المساعده انا فعلا اخر مره كنت بظبط زوايا قالي انها مرحله فعلا بس حاجه بسيطه وقالي متعملهاش علشان مفيش حد كويس يعملها واي حد هيعمهالك هيبوظهالك فهل كلامو صحيح ولا لا ولو كده اعملها فين وهل اعملها عند سمكري ولا عفشجي

**Abo_Mazen** · 22-07-2015 03:06 PM

المشاركة الأصلية كتبت بواسطة solm2020

شكرا ليك يا استاذ ابو مازن جدا علي المساعده انا فعلا اخر مره كنت بظبط زوايا قالي انها مرحله فعلا بس حاجه بسيطه وقالي متعملهاش علشان مفيش حد كويس يعملها واي حد هيعمهالك هيبوظهالك فهل كلامو صحيح ولا لا ولو كده اعملها فين وهل اعملها عند سمكري ولا عفشجي

مفيش حاجه إسمها مأخره حاجه بسيطه ..في حاجه إسمها هي مأخره كام درجه ..أو مأخره كام دقيقه ..ده لو التأخير بسيط على حد قول بتاع الزوايا ..

ثانيا ..هي بتتقدم بحاجه إسمها زرجينه ..والزرجينه دي في العربيات ذات الحوض الضيق برضه لو ما إتعملتش صح ..هتعملك مشكلة ..وإسألني أنا ..اللي عمل الزرجينه عندي ربنا ما يسامحه بقى ..عملها قامت مفرقعه ذنبة لحام عندي ..أنا طبعا لحمتها تاني ....وخصوصا إن العربيات برضه ذات الحوض الضيق دي ممكن ما تخزنش الزرجينه ..يعني بعد ما حداد العفشه يعمل الزرجينه ويشيلها ومع المشي تقوم مأخره تاني ..لإن أنا كان عندي التأخير تلات درجات ..الزرجينة المفروض قدمتها تلات درجات ورحت ضبطت زوايا على الأساس ده ..اللي إتخزن من الزرجينة درجه ونص ..وأنا بقول اللي إتخزن من الزرجينة يعني أقصد إن هي مع المشي قامت مأخره تاني درجة ونص ..وإتبقى درجه ونص تانيه المفروض إن هي تتقدمهم ..قمت عملت إختراع كده في الإستبليزر عندي ..هو مش إختراع قوي يعني ..حوار كده عرفت إن بتوع السوزوكي الفان بيعملوه ..وعملته وضبطت الشغل وكل تمام الحمدلله

**solm2020** · 24-07-2015 05:38 AM

المشاركة الأصلية كتبت بواسطة abo_mazen

مفيش حاجه إسمها مأخره حاجه بسيطه ..في حاجه إسمها هي مأخره كام درجه ..أو مأخره كام دقيقه ..ده لو التأخير بسيط على حد قول بتاع الزوايا ..

ثانيا ..هي بتتقدم بحاجه إسمها زرجينه ..والزرجينه دي في العربيات ذات الحوض الضيق برضه لو ما إتعملتش صح ..هتعملك مشكلة ..وإسألني أنا ..اللي عمل الزرجينه عندي ربنا ما يسامحه بقى ..عملها قامت مفرقعه ذنبة لحام عندي ..أنا طبعا لحمتها تاني ....وخصوصا إن العربيات برضه ذات الحوض الضيق دي ممكن ما تخزنش الزرجينه ..يعني بعد ما حداد العفشه يعمل الزرجينه ويشيلها ومع المشي تقوم مأخره تاني ..لإن أنا كان عندي التأخير تلات درجات ..الزرجينة المفروض قدمتها تلات درجات ورحت ضبطت زوايا على الأساس ده ..اللي إتخزن من الزرجينة درجه ونص ..وأنا بقول اللي إتخزن من الزرجينة يعني أقصد إن هي مع المشي قامت مأخره تاني درجة ونص ..وإتبقى درجه ونص تانيه المفروض إن هي تتقدمهم ..قمت عملت إختراع كده في الإستبليزر عندي ..هو مش إختراع قوي يعني ..حوار كده عرفت إن بتوع السوزوكي الفان بيعملوه ..وعملته وضبطت الشغل وكل تمام الحمدلله

شكرا يا فندم علي تعبك معايا بجد ...انا روحت عملتلها زرجينه وطلعت مرحله لورا درجه ونص والزرجينه اللي عملتها عملهالي بتاع الزوايا نفسه معاه زرجينه كده بكبس الهوا بيركبها ويفضل يضغط زي الكوريك كده تفضل تفتح سنه سنه فهو عاملي الزرجينه بزياده حاجه بسيطه علشان لما تيجي العجله تريح تاني ترجع لمكانها بعد كده راح قايس الزوايا لقاها مظبوطه وبعد كده روحت ركبت الكوبلن ورجعتلو تاني علشان طبعا الزوايا بعد تركيب الكوبلن خلفت تاني فهو قالي روح ركبو وتعلالي روحتلو ظبط الزوايا وقاس تاني المقاسات لقي الزرجينه تمام والزرجينه اللي كان عملها بزياده حاجه بسيطه العجله لمت ورجعت الشويه الزياده اللي كان عاملهم دول .....لكن بقي ليا سؤال يا استاذ ابو مازن عايز اطمن انها مترحلش تاني اعمل ايه كل شهر اكشف عليها عندو مقلا ولا ايه ولو لقدر الله رحلت تاني اعمل ايه علشان اسبتها ومترحلش تاني وحضرتك مقولتليش علي الحل اللي حضرتك عملتز في السوزوكي الفان او الحل عموما بتاع العربيات اللي حوضها ضيق زي عربيتي وشكرا لحضرتك جداااا واسف علي الاطاله ...

**Abo_Mazen** · 24-07-2015 12:58 PM

المشاركة الأصلية كتبت بواسطة solm2020

شكرا يا فندم علي تعبك معايا بجد ...انا روحت عملتلها زرجينه وطلعت مرحله لورا درجه ونص والزرجينه اللي عملتها عملهالي بتاع الزوايا نفسه معاه زرجينه كده بكبس الهوا بيركبها ويفضل يضغط زي الكوريك كده تفضل تفتح سنه سنه فهو عاملي الزرجينه بزياده حاجه بسيطه علشان لما تيجي العجله تريح تاني ترجع لمكانها بعد كده راح قايس الزوايا لقاها مظبوطه وبعد كده روحت ركبت الكوبلن ورجعتلو تاني علشان طبعا الزوايا بعد تركيب الكوبلن خلفت تاني فهو قالي روح ركبو وتعلالي روحتلو ظبط الزوايا وقاس تاني المقاسات لقي الزرجينه تمام والزرجينه اللي كان عملها بزياده حاجه بسيطه العجله لمت ورجعت الشويه الزياده اللي كان عاملهم دول .....لكن بقي ليا سؤال يا استاذ ابو مازن عايز اطمن انها مترحلش تاني اعمل ايه كل شهر اكشف عليها عندو مقلا ولا ايه ولو لقدر الله رحلت تاني اعمل ايه علشان اسبتها ومترحلش تاني وحضرتك مقولتليش علي الحل اللي حضرتك عملتز في السوزوكي الفان او الحل عموما بتاع العربيات اللي حوضها ضيق زي عربيتي وشكرا لحضرتك جداااا واسف علي الاطاله ...

كل عشر تلاف تروح تضبط زوايا وتبدل أماكن الكاوتش ..ولو فيه أي ترحيل في العجله هيبان ..

الحل اللي أنا عملته عندي ..وعربيتي مش سوزوكي فان على فكره..لكن اللي أنا عملته مقتبس من مالكي السوزوكي فان ..المهم ..الحل كان إني أرحل الورده اللي راكبه على الإستبلايزر لورا شويه ..وبالتالي المقص هيتقدم لقدام معاك ..بس عموما أي تأخير في العجله معاك ..هيبان في ضبط الزوايا

**solm2020** · 24-07-2015 08:08 PM

المشاركة الأصلية كتبت بواسطة abo_mazen

كل عشر تلاف تروح تضبط زوايا وتبدل أماكن الكاوتش ..ولو فيه أي ترحيل في العجله هيبان ..

الحل اللي أنا عملته عندي ..وعربيتي مش سوزوكي فان على فكره..لكن اللي أنا عملته مقتبس من مالكي السوزوكي فان ..المهم ..الحل كان إني أرحل الورده اللي راكبه على الإستبلايزر لورا شويه ..وبالتالي المقص هيتقدم لقدام معاك ..بس عموما أي تأخير في العجله معاك ..هيبان في ضبط الزوايا

شكرا علي اهتمامك بالموضوع من الاول وشكرا علي نصائحك ومتابعتك ليا اول باول وانا هعمل زي ما حضرتك قولتلي كل عشر الاف هتابع الموضوع بس ليه حضرتك بتقولي غير اماكن الكاوتش؟

**Abo_Mazen** · 24-07-2015 10:38 PM

المشاركة الأصلية كتبت بواسطة solm2020

شكرا علي اهتمامك بالموضوع من الاول وشكرا علي نصائحك ومتابعتك ليا اول باول وانا هعمل زي ما حضرتك قولتلي كل عشر الاف هتابع الموضوع بس ليه حضرتك بتقولي غير اماكن الكاوتش؟

ما هو بعد عشر تلاف بتجيب الكاوتش اللي قدام ورا واللي ورا قدام ..وبعدين ترصص وتضبط زوايا ..وبعد عشر تلاف تاني تقوم مبدل الكاوتش نظام عكس عكاس ...يعني اللي قدام شمال تيجي ورا يمين والعكس برضه ..وبعدين تقوم مرصص وضابط زوايا وبعد عشر تلاف تاني تقوم مبدل اليمين شمال والشمال يمين ..وتقوم برضه مرصص وضابط ..وبعد عشر تلاف تقوم رامي الكاوتش وتحط كاوتش جديد لإن كده عدى عليه أربعين الف كيلوا ..يبقل هتلاقي نفسك كده توماتيكي توماتيكي كل عشر تلاف بضبط زوايا وبترصص