الموضوع: طريقين و الاختيار محير والحل ؟ مسدس ؟

انا مريت بالمرحلة ديه حيث بلغت 40 عاما و لم اتزوج و انجب
ففكرت في حمل السلاح
و لكن وجدت تربية كلب مدرب
اعطاني احساس بالامان و الحب

a tool is only as good as the person using it

لو مش مدربه على استخدام السلاح يبقى خطر عليكى
لو مش مرخص هتبقى خيفه تشليه و هيتحول لعبء نفسي عليكى لو استخدمتيه حتى لو كان دفاع عن النفس هتبقى برده جريمة
قبل ماتشيلى سلاح لازم تبقى عارفه امته تستخدميه و امته مستخدمهوش
مثلا لو حد هجم عليكى جوه بيتك و اطلقتى عليه الرصاص و مات ده يبقى دفاع عن النفس
لكن لو جريته وراه لغاية مخرج من البيت و بعد كده اطلقتى عليه الرصاص و مات ديه اصبحت جريمة قتل

فى الاخر السلاح مهواش لعبه

السلاح مش سهل.
انا معايا اسلحة سواء مسدس او بندقية للصيد خرطوش ورصاص. والحمد لله اجيد اطلاق النار بشكل كبير ويصل لمرحلة القنص من مسافات طويلة لأهداف صغيرة جدا.
لكن للصيد فقط !!!!!!!!!
اعتقد رغم هذا اني سوف اتردد 1000 مرة اذا حاولت الاطلاق علي شخص في محاولة قتله او اصابته.
السلاح خطر لمن لم يتعود عليه وليس له قيمة في الدفاع عن النفس في حالتك. بل يعتبر نقمة وليس نعمة.
اعتقد الإطمئنان إن لم ياتي من داخلك لن يأتي حتى لو معاكي دبابة

احنا اتخلقنا بنحلم نستقل بقراراتنا ومجرد ما بنستقر بنﻻقى نفسنا بندوب زى الصابونة ..طيب اية الى بيخلى الدنيا ماشية واحنا بنتفرج على نفسنا بندوب؟ ان فية هدف عاوزين نوصلة فحياتنا..انتى عندك بنت محتاجالك ربنا انعم عليكى بيها تؤنسك..بنتك هيا هدفك ..تسقيها اﻹعتماد على النفس واﻹيمان بالله وتبدأى تعلميها الصﻻة.. وتهيأيها لحياة نجاح واستقرار.. أكيد بنتك هتنضر بشكل ما إذا حاد تفكير امها عن المسار.. طبعا احنا بشر مش آﻻت..والبشر ممكن يكتئب ويحس ان الدنيا دار شقاء بس اﻷمل فى الحياة الأحسن بيخفف عننا..اﻹطمئنان ان ربنا بيحمينا وبيحمى الى بنحبهم بيصبرنا.. واكيد فى ناس حوالينا ظروفهم اشد قسوة من ظروفنا..ممكن اتوكل على الله وحدة واطلع اكمل اركان دينى فى البلد الحرام وادعوا الله بما اريد ..الحياة فى بلد ﻻ يرفع فيها الأذان امر مثير للغثيان.. وبرغم من طبيعة المملكة المتحفظة جدا إﻻ أن فيها الخير الكثير لكل مسلم..فكيف اترك ذلك الخير واسعى لحياة شعوب الجاهلية حيث ﻻ ايمان وﻻ يقين وﻻ اعتراف بسيد المرسلين.. والحقيقة انها لمشكلة كبرى ان تفتقد بشرا انت بحاجة لدعائهم لك ولشفقة قلبهم عليك.. ولكنى اﻷمل يظل معقول فى الذرية الصالحة إن احسنا تربيتها.. واخيرا على قدر درجة توكلك على قدر حل مشاكلك.

السلاح الناري خطر و بيدي احساس فظيع بالثقه في النفس و ممكن لحظه عصبيه تحصل كارثه

اسمحيلى اتكلم بصراحة شوية و اربط شوية حاجات مع بعض عشان الصورة تبقى متكاملة
اولا من مواضيعك السابقة انا اتذكر بعض الاشياء اللى تخلينى اقول انك مريتى بظروف صعبة فى حياتك الشخصية مما ادى للاسف لفقدانك الثقة بالناس بل ربما بما هو ابعد من ذلك. . . اوصلك لمرحلة شك فى كل شئ. . . و لسه موصلتيش لمرحلة اليقين و ده جزء مسبب لك قلق وجدانى من نفس معذبة و هو ده السبب الحقيقى للخوف اللى جواكى من كل شئ و فقدانك للثقة فى كل شخص و كل شئ

ثانيا انتى تحديتى ظروفك و نجحتى فى عبور جزء سئ كبير منها و عبرتى لمراحل تانية و بداية تانية فى مكان اخر. . . اعتقد قرار العودة للسعودية او ايرلندا هيحسمه عامل مهم. . . هو . . . هل رجوعك السعودية هيقلل احساسك بالغربة بأعتبار انك فى بلدك و بالتالى ده ممكن يساعد فى استعادة احساسك بالامان. . . ام ان الذكريات السلبية سيكون لها الغلبة و بالتالى الرغبة فى الاستمرار فى الهروب منها سيرجح اختيارك لدولة اخرى مثل ايرلندا. . . ده سؤال انتى بس اللى تعرفى تدورى له على اجابة بداخلك و بناء عليها تختارى

ثالثا. . . الموضوع مش موضوع سلاح يا عزيزتى. . . مش ده اللى انتى حقيقى محتاجة له . . . انتى محتاجة لتدعيم ثقتك بنفسك و الناس . . . و من قبلهم ثقتك و ايمانك بالله عز و جل. . . و الايمان بالله سلاح قوى جدا من يمتلكه يملك القدرة على مواجهة اى شئ حتى الموت وقت الضرورة

رابعا و اخيرا ممكن حاجات بسيطة بديلة ممكن تساعدك بدل الاختيارات الخطيرة على صاحبها قبل الاخرين زى السلاح. . . يعنى مثلا ممكن سيلف ديفينس زى البيبر اسبراى او الاليكتريك. . . و ايضا اقتناء كلب معروف بولائه لصاحبه و استماتته فى الدفاع عنه . . . كلها اختيارات غير مميتة و تساعد على الوصول للاحساس المفقود بالامان

ربنا معاكى و يحافظ عليكى و يوفقك