الموضوع: بالعقل والعاطفة هي رينو لوجان 2015 اوتوماتيك الجدجيدة

كنت صدعتكم من حوالي سنة هنا لما كنت بدور علي رينو ميجان مستعملة وكنت بسال علي العيوب والمميزات وكانت ابتدت تنتشر الاخبار ان النيو لوجان الاوتوماتيك نازلة غي شهر مارس في معرض اوتوماك..المهم عشان مطولش عليكم خدت قراري وحجمها توكيل واستلمت في الدفعة الاولي اللي اتباعت بالسعر الرسمي المعلن فئة تانية اوتوماتيك ازرق ميتاليك واستلمت يوم 17/4/2015 يعني بقالها معايا 3 شهور ونص تقريبا مشيت فيهم 4300 كم
مبدئياً زي ما كل الناس عارفة مفيش عربية مفيهاش عيوب وبرضو مفيش عربية كلها عيوب الفرق انك تعقل الامور وتتغير في حدود امكانياتك وبعدها تتفاعل وتسبب الامور علي الله وتفكر غير انك تنبسط باللي دفعته ده رايي المتواضع
اول ما استلمت العربية كان صوتها عالي بشكل ملفت وكانت استجابتها لدوستي علي البنزين بطيئة ومملة بزيادة والفرامل كانت واطية جدا وكنت بشغل التكييف نهائي وتابعت تعليمات التليين اللي في مواضيع المنتدي هنا بحذافيرها لحد اول 1500 كم بعدها رحت عملت صيانة ال 1000 في التوكيل.
النتيجة بعد الصيانة كانت جميلة اوي وصوت العربية هدي عن الاول كتير وهدي اكتر بعد ما مشيت 1000 كم كمان علي الزيت الجديد وبقت الاستجابة للضغط علي دواسة البنزين جميلة والعربية بقت بتجري صحيح لما تكون بتجري والسكة تقف فجأة فؤادي وتيجي تدوس تاني عشان ترجع تجري استجابتها بتبقي بطيئة وتبقي بطة بلدي في اللقطة دي بس عادي يعني مش big deal العربية سرعتها بتفرق من التالت اللي انا بشوف انه روحها فعلاً.. الفرامل بقيت بريح رجلي بس بيديني الاي انا عايزه منها ولو دوست جامد اللي معايا بيترجوا ويحسوا ان في حاجة في السكة واللي نايم بيصحي.. ده فيما يتعلق بالصوت العالي والفرامل.. الدركسيون ممكن يكون اتقل من عربيات كتير زي الكوري والياباني والأوروبي الفئة الاعلي لانه مش بيلاقي وبصراحة بحس معاه بامان اكتر انا كان معايا لانوس مش باور ولما سوقتها بعد ما سوقت اللوجان بقيت خايف وانا ماشي لانها اخف بكتير من اللوجان الاي فيها باور وسبحان الله دركسيون اللانوس كان قارفني يعني من الاخر موضوع الدركسيون موضوع تعود
للناس اللي بتسال علي نتشات الفتيس فالحمد لله وما شاء الله ولا حول ولا قوة الا بالله مفيش حاجة من دي انا حاسسها ممكن بس لو فرملت فجاة بقوة فبتحس احساس خفيف بتسقيط النقلات واعتقد ده وضع طبيعي.
العربية انا بشتكي منها في حاجتين بس:
الاولي: الصاج بتاع الكابوت ضعيف جداً ولانه بيفتح ويقول هيدروليك الناس قالولي متهبدوش ريحه علي المفصلة واديله انت التكة الأخيرة وياريتني ما سمعت الكلام.. الصاج عند المفصلة فيه قايم مدعم الي حد ما بيتلاقي مع بقيت الكابوت في خط الخط دى اضعف ما يكون وللاسف هو ده مكان حطة الايد الطبيعي لقفل الكابوت فاللي حصل ان بقي في كذا تعريج بسيط في الكابوت في الحتة دي لحد ما اتعلمت وبقيت اهبده عادي وجدت بالي ان معظم العربيات اللوجان والسانديرو والستيب واي فيهم نفس الحكاية فمن دلوقتي خلي بالك من الحتة دي اوي ومتخليش اللي بيمسح لك العربية يسند او يتعافى عليها.
الحاجة التانية: هي ان لما بشغل التكييف الهواية اللي قدام تحت الازاز واللي المفروض بتشتغل بس لما تبقي عايز تشيل شبورة من علي الازاز اللي قدام مع ظبط المؤشر بتاع الازاز اللي قدام علي الفكرة...ده بالنهار مش بيضايق بس بليل بيخلي الازاز من جوه ساقع ومن بره بيبقي سخن فبيخلي الازاز يعمل شبورة بس من بره وفي نص الازاز وفي احيان كتير بتضايق لانها بتعوق الرؤية وبضطر اشغل المساحات عشان اشيلها مقرفة يعني شوية سامحوني في التعبير.
غير كده العربية كوسع وعلو واوبشنز ومساحة شنطة وشكل جميلة جدا في كل حاجة لما تحطها في تصنيفها الصحيح ك city car امكانياتها هايلة جدا في الحتة دي واحسن من عربيات كتير اغلي ومليانة مشاكل كلنا سمعنا عنها
انا بحمد ربنا جدا الحمد لله انه هداني في الاختيار للعربية دي يبقي ان ربنا يبارك فيها يوديني خيرها و يكفيني شرها وشر الناس المؤدية اللي شرطتها بموس او بمفتاح علي الكابوت والسقف والشنطة والباب اللي ورا بس كلها الحمد لله حاجات في بنتي ومراتي واهلي كلهم والتنمية الا علي حقد وتمني زوال النعمة من الاخرين وده اللي مودينا في داهية
ارجو اني اكون اردت كل واحد بيسال وعايز يعرف ايه ظروف العربية..التوكل علي الله وان شاء الله خير متقلقش