بداية كده ..العربية سوزوكي التو 2008 ..تلاتة سلندر ..800 سي سي
محتار حيرة السنين ..وقلت أدردش معاكو هنا شوية ..لإن أكيد ..في حد هيكون عنده الرأي السليم ..أو على أقل تقدير ..هاخد برأي الأغلبية

بدون الدخول في تفاصيل ..أنا العربية عندي بتدخل زيت على المياه ..يعني بلاقي في الريداتير طحينة ..أنا شاريها كده وربنا ما يسامح اللي باعها لي وهي كده ..وغيرتلها جوان وش سلندر ومسحت الوش ..ورجعت عملت طحينه تاني ..وغيرتلها جوان تاني وعملت طحينه برضه ..وبعدين حطيت ليها جوانين ونفس القصه السخيفه ..طحينه في الريداتير ..فخلاص ...أنا وصلت لمرحلة إن في مشكلة في وش السلندر نفسه ..أو ..و (أو) دي مهمة قوي لإن أنا عامل الموضوع ده بسبب (أو) دي ..(أو) ..في مشكلة في البلوك ..

دلوقتي وش السلندر إستعمال عامل في حدود 2800 جنيه كامل ..ينزل شويه في السعر ..وسعر المكنه كامله بالضفيره بالكنترول وأربعه سلندر مش تلاتة و 1100 سي سي مش 800 سي سي عامله 7000 جنيه

أنا بقول لو جبت وش سلندر إستعمال وركبته ولميت الموضوع في 2800 جنيه ..وخصوصا إن أنا يدوب هغير وش السلندر وهبيعها لإن هي كده خلاص جابت آخرها معايا ..هكون كده لميت الموضوع في مبلغ قريب ..وخصوصا إن الحاله المادية ما يعلم بيها إلا ربنا ..مش عايز أفصل فيها ...وربنا يغنينا بالحلال

بس المشكلة بقى لو طلع المشكلة من البلوك مش من الوش بس ..يبقى أنا ساعتها بقى لبست كده في 2800 جنيه ..وما أستفدش حاجه

الموتور اللي عندي ده مفيش ليه شورت بلوك إستعمال ..اللي موجود إستعمال الموتور كامل ..أو الوش كامل ..وكل حاجه ليها سعرها زي ما قلت ..

السؤال بقى بالله عليكم ..أي حد مكاني هيعمل إيه ؟؟

هيركب وش ويشوف كده الموضوع هيمشي إزاي ويلم الموضوع في 2800 جنيه ..وخصوصا إني كل ما أسال حد يقولي ..صعب قوي إن يكون المشكلة في البلوك ..بس اللي بيقول صعب قوي تبقى المشكلة في البلوك ما بيقولش ليه صعب

ولا أجيب مكنه كامله من أولها لأخرها ..مع إني مش حابب أصلا حوارات تسقيط المكن وبعدين تضبيط المكنه على العربية وبعدين تتابع بقى المكنه عشان تشوف كويسه ولا وحشه ..ده غير الجري في المرور عشان تثبتها ..يختيييييييي...موال ...


بصراحه مش عارف ..أنا عن نفسي عايز ألمها في فلوس قليلة ..وربنا عالم إني هستلف الفلوس دي أصلا ..بس في نفس الوقت (أو) اللي أنا قلتها فوق دي مخوفاني قوي ..إن يعني تطلع المشكلة في البلوك مش في الهيد بس ..

حد يقدر يفيدني ويدلي بدلوه في أمري ..لعل وعسى يهديني الله إلى الحل السليم