أقولك يا نادر باشا ليه ماينفعش ، أولاً الفتحة إلي في الصندوق دي مش هتخليه free-air ، لأن free-air لزم يكون كله مفتوح على الهوا من فوق و من تحت ، انما إلي حضرتك عايز تعمله دة إسمه ported design مش free-air design ، و الفتحة دي اسمها port أو منفذ ، لأنها عبر عن منفذ يخرج منه الهواء المضغوط من السماعة إلى الهواء الخارجي المفتوح ، و ال-port دة ليه شروط في الطول و القطر حسب مقاس السماعة و قوتها و كمان التردد المطلوب يطلع جامد (في حالتنا دي احنا عايزين تردد منخفض يعني Bass في حدود ٥٠ هيرتز ).
دي أول قصة فنية في الموضوع بتاعك ، تاني قصة بقى في حجم الصندوق نفسه ، الحجم الداخلي للصندوق بيخليه يعمل رنين أو Resonance عند تردد معين و كل ما حجم الصندوق صغر كل ما التردد بتاع ال-self resonance دة بيقل و العكس (يعني لو حضرتك خبطت على صندوق صغير صوته هيكون مكتوم لأن التردد بتاعه منخفض و لو خبطت على صندوق كبير هيكون صوته أرفع و أعلى عشان التردد بيعلى و بيبعد عن البيز كل ما الصندوق بيكبر ) ، و المفروض التصميم الصح للصندوق إن التردد بتاع ال-resonance بتاع الصندوق يكون نفس التردد بتاع elresonance بتاع الرق بتاع السماعة إلي هتركب فيه ، هنا بقى المشكلة ..
المشكلة إن السماعات العادية بيكون تردد الرنين بتاعها أعلى من 80 هيرتز و بتوصل لحد 150 هيرتز انما الصبووفر تردد الرنين بتاعها من 30 إلى 80 هيرتز (مع انها بتطلع بيز بس مش نفس بتاع الصبووفر ديماً بيكون أرفع أو أكثر حدة أو إلي احنا بنقول عليه بيدب أو بيرزع )، الخلاصة إن عشان تعمل صندوق يعمل رنين مع سمعة عادية لزم يكون كبير جداً مقارنةً بالصندوق إلي ينفع مع صبووفر ، يعني ابعاده هتكون في حدود متر x متر x متر ، عشان تسمع منه بيز ليه معنى أو بمعنى أصح عشان يعمل توضيح و تكبير للبيز ، و دة لكل سماعة على حدة
و لو اتعمل غير كدة هتكون النتيجة إن الصندوق بيشتغل على صوت و السماعة على صوت تاني ، يعني الصندوق بيكبر تردد مش طلع من السماعة أصلاً و السماعة بتطلع صوت الصندوق مش حاسس بيه و بيكتمه ، بالضبط ذي الصناديق إلي بيعملوها في العتبة بيتحط فيها كاسيت عربية مع سماعتين بيضاوي ، الصوت بيكون مشوه بالعكس د صوت المغني أو ال-Vocals بتكون واضحة أكتر من البيز مع إن لو طلعت نفس السماعة برى بيكون البيز أوضح (جرب كدة و هتشوف و تتأكد من كلامي )
أنا أسف طولت في كلامي بس أنا كان هدفي أوضح ليه الموضوع ماينفعش بتفصيل على قد ما أقدر عشان الناس كلها تستفيد
تحياتي
المفضلات