بسم الله الرحمن الرحيم

الحمد لله ، وما شاء الله ولا قوة إلا بالله
اشتريت رينو لوجان هاي لاين 2016
اشتريتها من محمد زكي فرع ميدان المروحة في طريق القطامية
ولا أنصح أي أحد إنهم يشتروا من عندهم ،، معاملتهم سيئة للغاية وفي منتهى قلة الذوق ،، وبعد ما تشتري لو طلبت منهم كوباية مياة ،، مايعرفوكش

انطباعي عن السيارة :
** العيوب :
- أهم وأخطر عيب حتى الآن إن مافيش لوك داخلي للسيارة ،، وده خطير جداً بالنسبة للأطفال ،، بمعنى أنك لو قافل اللوك العام للسيارة ( وهو زر في منتصف التابلوه ) فإن السيارة تُغلق خارجياً فقط لكن أي واحد لو قاعد جوّة السيارة وفتح الباب .. هايتفتح معاه عادي ،، وده عيب خطير من وجهة نظري ،، أتمنى لكون له حل وأنا ماعرفوش حتى الآن .
- مرآة الصالون صغيرة جداً ،، ولا تعطي رؤية جيدة .
- الباور تقيل جداً ( مقارنة بالأوبترا اللي كانت معايا ) ..
- بالرغم إنها 110 حصان والموتور 16 صباب إلا إنك تصل إلى سرعة 110 فقط حينما تكون على أر بي إم 3 وهو مستوى متأخر ،، لإن في الأوبترا مثلاً عند أر بي إم 3 تكون على سرعة 130 وليس 110 كم/ساعة
- غطا تانك البنزين يُفتح من الخارج ،، وده عيب خطير ورخم ،، وممكن أي عيل في الشارع يفتح أو يكسره ،، في حين إن الأوبترا مثلاً كان بيتفتح من زر تحت مقعد السائق ، كما أنك مضطر تشيل المفتاح من الكونتاكت وتعطيه لعامل البنزينة عشان يموّنلك السيارة ،، وطبعاً هايرجعلك المفتاح مشحم وريحته بنزين
- إيريال راديو السيارة طويييييل جداً عامل زي بتاع التوكتوك ،، ولو قارنته بالأوبترا ( من غير إريال أساساً ) لإن أوبترا الإيريال بتاعها مدمج في الزجاج وهو عامل غاية في الجمال والروعة ،، وغاية في السوء والتأخر من رينو الحقيقة ،، كما إنك معرض إن الإريال يتسرق .
- مافيهاش جهاز إنذار ، والحقيقة مش فاهم إيه وجهة نظرهم في كده ،، ده بـ 100 جنيه يا جدعان

** نيجي بقى للمزايا :
- السعر منافس جداً ،، وهي من وجهة نظري الشخصية أفضل من النيو أوبترا ،، ومن النيسان صني ،، اللي في نفس سعرها .
- الشنطة بتاعتها بحر ،، ممكن تحط فيها أوضة نوم .... ( لطفل صغير :) )
- العفشة بتاعتها جميلة ما شاء الله .
- عالية عن الأرض .
- لسه ما جربتش التكييف كتير ،، لكني جرّبته حاجة بسيطة ،، شكله كويس إن شاء الله .
- الفرامل ما شاء الله كويسة جداً ،، أحسن من الأوبترا 100 مرة .
- العامل المهم اللي رجّح كفّتها بالنسبالي عن النيسان صني مثلاً بالرغم إن البعض يظن أنه عامل هامشي ،، هو وجود USB لكن بالنسبة لي هو شيء مهم جداً
- النافيجيشن ممتع جداً الحقيقة .
- شاشة المعلومات بتقدملك شوية حاجات جميلة زي درجة الحرارة الخارجية ،، ومعدل استهلالكك ومشيت أد إيه ،، بدل ما تقعد تحسبها إنت ،، وتعمل لنفسك شييت إكسيل خاص بكده :)
- فيها كروز كونترول ،، ومحدد سرعة ،، ودول لسه ماستخدمتهمش ،، لكنهم مفيدين طبعاً خاصةً في السفر إن شاء الله
- صوت الكاسيت بصفة عامة معقول ،، وزر التحكم في الفوليووم من الطارة جميل ومريح .
- لسه ماجربتش حوار البلوتوث ،، ويا ريت حد يفهّمني فيه أكتر
- الباركينج سينسور جميل ،، ومفيد جداً الحقيقة .
- لسه ماجربتش إني أسوقها مانيوال ،، باسوقها أوتوماتيك فقط حتى الان ،، وحاسس إني مش هاحتاج المانيوال ده أصلاً ،، إلا إذا حد قاللي فايدته اللي أنا مش عارفها لغاية دلوقتي .
- السيارة عريضة ( أعرض من الأوبترا والإلنترا والصني ) .
- المرايات الجانبية رؤيتها ممتازة .

دي ملاحظات استخدامي لأسبوعين لها
اتمنى أكون افادتكم ،، وإدعوا لي ربنا يبارك لي فيها ، ويكفيني شرّها

.......
** ملحوظة : الفرق بين البيسك والهاي لاين في سيارات مثل كيا وهيونداي ولانسر وفولكس ،، إلخ بيكون كبير جدا ،، يعني ممكن تلاقي الفرق بين أول فئة والهاي لاين حوالي 50 ألف جنيه .
أما في اللوجان حوالي 15 ألف جنيه ،، يعني من الاخر ،، فرصة تجيب الهاي لاين :) :)