انا عارف ان عنوان الموضوع غريب بس بجد انا عاوز اعرف رائيكوا فى اللى الموضوع ده علشان خلاص هاتجنن الحكايه باختصار


كنت راجع من الشغل عند كليه الشرطه اللى موجوده على الدائرى و انا كنت على الطريق الداخلى اللى موازى للطريق الدائرى و بصراحه الطريق ده بيبقى كويس يعنى بتجرى براحته و انا اخرى عليه 100 مش اكتر و فجاه الطريق وقف

وانا ملاحظ كده قومت ممور العربيه و و سايبها ماشيه بسرعتها لانى كنت حاسب العربيه هاتقف امتى و كانت الحاره بتاعتى فاضيه خلو بالكو من كلمه فاضيف دى

و فجاه عربيه باسات 2008 جت من الشمال لليمن فى الحاره بتاعتى و انا ايدى على الزماره و برضو مافيش فايده قولت مابدهاش شديت الهاند و الحمد لله العربيه و قفت

فوجئت بسواق العربيه الباسات بيبصلى باشمئزاز كده لما جيت جنبه دار الحوار الاتى

ملحوظه : اللى سايق الباسات صاحبها مش السواق باين عليه

انا : يعنى انت شايفنى جاى مسرع و بزمرلك و برضو دخلت

هو : ماهو الطريق واقف انت مش بتقف ليه

انا : ياباشا انا مظبط نفسى انى عارف اقف لكن انت لخبطتنى

هو : بس يا حمار

انا : الله يسامحك

هو : طبعا هايسامحنى امال هيسامحك انت

انا : قفلت قزاز عربيتى و مشيت ( حسيت ان ده انسب رد على واحد زى ده )

و بجد سبحان من صبرنى و خلانى مشيت مع العلم انى من النوع اللى بيتنرفز بسرعه

اطرف حاجه فى الموضوع ده بقى
كان معايا واحد صحبى خم نوم و كان نايم فى العربيه و صحى على الصوت كل اللى عمله قام و قال للراجل خلاص حصل خير و قام نايم تانى