اخذ نصيحة للشراء لمبلغ 55000

**theman** · 17-08-2015 10:55 AM

لو سمحتوا كنت بفكر اشتري دايو لانوس او شيفروليه لانوس الناس قالتلي سيبك من الاثنين دي عربية موتورها ضعيف ومش بتاعة سفر وموتورها مبيتعمرش بعد فترة تفكوا وترميه في الزبالة وتجيب غيره وانا مشاويري مسافات طويلة ومحتاج عربية قوية وقطع غيارها معقولة وسهلة الصيانة واستهلاك البنزين معقول مخسرش فيها كتير لو فكرت ابيعها والمبلغ المتاح للشراء 55000 ارجو الرد من خبراء المنتدي

**hesham fawzy h** · 17-08-2015 12:31 PM

الموتور كويس
هو ضعيف شوية مع التكيف بس كويس
و فى ناس بتغيرو او بيرزع منهم .. بس دة على حسب الاستخدام
انا اعرف واحد الموتور بتاعة معدى ال 300 الف كم

**hesham fawzy h** · 17-08-2015 12:32 PM

لانوس او فيرنا

مفيش تانى

**theman** · 17-08-2015 12:53 PM

طيب انا قدامي بالسعر ده فيرنا ـ و شيفروليه لانوس ـ ودايو لانوس ـ ونوبيرا2 ـ واوبل كورسا سيدان ـ ورينو لوجان موديل 2010 الشكل القديم انهي عربية افضل من حيث توافر قطع الغيار وتكون سعرها معقول ـ سهولة الصيانة خارج التوكيل ـ استهلاك بنزين معقول ـ قوية واعتمادية في المشاوير الطويلة ارجو الافادة من الخبراء اللي جربوا كل العربيات دي

**hesham fawzy h** · 17-08-2015 03:33 PM

المشاركة الأصلية كتبت بواسطة theman

طيب انا قدامي بالسعر ده فيرنا ـ و شيفروليه لانوس ـ ودايو لانوس ـ ونوبيرا2 ـ واوبل كورسا سيدان ـ ورينو لوجان موديل 2010 الشكل القديم انهي عربية افضل من حيث توافر قطع الغيار وتكون سعرها معقول ـ سهولة الصيانة خارج التوكيل ـ استهلاك بنزين معقول ـ قوية واعتمادية في المشاوير الطويلة ارجو الافادة من الخبراء اللي جربوا كل العربيات دي

كل الى بتقول علية متوافر فى اللانوس و الفيرنا فقط

اللوجان مش اى حد يشتغل فيها غير ان قطع غيارها غالية

نوبيرا عفشتها بتتهلك بسرعة و مش موفرة فى البنزين

كورسا سيدان قطع غيار غالية .. بس هى عربية الصراحة .. افضل ما فيهم .. عربية عايزة صرف

**mhopa2440** · 19-08-2015 01:25 PM

مع احترام للرأي اللي فات

ابعد عن الفيرنا دي عربية سيئة من حيث الثبات والأمان ودي اهم من البنزين والعفشة وقطع الغيار وكل الحاجات دي

فعلا النوبيرا تحفة بس استهلاك البنزين زيادة شوية داخل البلد

واللاونس رائعة ف حدود السعر دا

بس ممك تفكر ف الكيا شوما دي الأفضل من رأئي موتور فتيس عفشة استهلاك بنزين قطع غيار ثبات ووسع داخل كله تمام

**mhopa2440** · 19-08-2015 01:27 PM

لو تقدر تركب عربية معاقين اشتري كيا سبكترا وينج (تحفة بجد) او النترا افانتي 2002 2003

**theman** · 26-08-2015 08:13 PM

المشاركة الأصلية كتبت بواسطة mhopa2440

لو تقدر تركب عربية معاقين اشتري كيا سبكترا وينج (تحفة بجد) او النترا افانتي 2002 2003

لو قدام حضرتك الينترا 2002 او 2003 بالسعر اللي انا حاطه قولي انا دورت عليها لقيتها ب 70 و80 و90 وشغل استهبال انا لو معايا 90 هركب بيها سيراتو او جيتا مش الينترا 2002