الموضوع: انطباعاتى عن النيو لوجان من وجهة نظر الفلوانس

الحمد و الشكر لله استلمت امبارح نيولوجان ٢٠١٦ شامبين اول فئة مانيوال E1 للمدام
انا معايا فلوانس فيس ليفت و هيكون الحكم من وجهة النظر دى
انا كنت عايز budget car للمدام و الأولاد، سعر معقول اقل من ٩٠ الف و توكيل محترم اعرف اتعامل معاهم و اخد حقى و ده تلخيص النقط اللى كنت عايزها علماً ان عربية المدام القديمة كانت كليو ١٤٠٠
١- عايز قاعدة خلفية (كنبة) واسعة خاصة ان الأولاد كبروا و الكليو كانت من الأصل ضيقة...العربية دايماً بيسوقها سوائق فكلهم بيبقوا قاعدين ورا
٢- شنطة واسعة علشان حاجتهم و مشترواتهم
٣- عربية متكونش صغيرة علشان الأمان
٤- ٢ ايرباجز على الأقل
٥- تكييف جيد جداً
٦- سعر اقل من ١٠٠ الف

طبعاً مجبتش اتوماتيك علشان اقلل المشاكل و طبعاً الميزانية غير ان العربية دايماً بيسوقها سائق

انهاردة اخدتها لفه ( بعد اذنها طبعاً :) علشان احكم و اقيم
مبدئياً كل اللى كنت عايزه من العربيه لاقيته ما عدا ان صوت الكلاكس كان مسرسع و معجبنيش
- التكييف جيد جداً و افضل بمراحل من الكليو
- العفشة ممتازة
- العربية عالية
- الدريكسيون تقيل طبعاً و هو تقيل مقارنة بالعربيات المثيلة و تخيل مقارنة بالفلوانس اللى دريكسونها باور كهربا و لكن مش مزعج و ماضايقنيش و موجعليش ايدى....بالعكس مدى تحكم افضل للسيارة و تحس انها راكزة
- قاعدة السائق زى ما بحبها عالية و ممتازة و كاشفة الطريق
- زى باقى العربيات: الرؤية الخلفية صعبة جداً و الأعتماد الأساسى على مرايات الأجناب و طبعاً حساسات ركن هتكون مفيدة جداً فى هذه الحالة
- الكنبة الخلفية ممتازة و واسعة و قعدتها واقفة شوية بس انا بحب النوع ده
- شنطة بحر
- انا معايا الموتور ال ٩٠ حصان ٨ صباب و مشغل تكييف و اداء العربية سلس جداً و مفيش اى تأثير للتكييف على الموتور....
- كشافات الأضاءة جيده جداً و موضحة الطريق
- النظام السمعى على قده طبعاً و لكن ممكن نعمله upgrade بعد كده
- الفرامل كويسه و معنديش فيها اى مشاكل بالرغم انها مش ABS
- الحمد لله الفتيس المانيوال سلس و ناعم و النقلات بتعشق فى مكانها صح دون اصوات حشرجة او خلافه سواء فى النقلات لأعلى او لأسفل
- المارشارير مش محتاج ضغط لأسفل او شد لأعلى و انت بتحركه و دى حاجة كانت كويسه و مريحة جداً حرف L للخلف و بس
- الحمد لله الفتيس مكنش بيقرص و لا بيتحرك و انا سايق على اى نقله

انطباع عام ممتاز لعربية فى هذه الفئة السعرية و راضى عنها تماماً و كل اللى كنت طالبه منها لقيته الحمد لله
طبعاً بالنسبة لى دى عربية مدينة و سفر خفيف جداً
انصح اى حد بيها

تحياتى