الموضوع: البورسلين الصيني

مش هيبقى في سجاد خالص إلا في الشتاء غالبا علشان كده بفكر في البورسلين

المشاركة الأصلية كتبت بواسطة salamonti

أنا جايب الصيني في البيت عندي وحلو بسم الله ما شاء الله
طبعا لفيت واتفرجت ومسكت خامات كتير..
مع احترامي لجميع الآراء السابقة لكن لو في البيت يبقا انت أولى بفرق السعر إلا اذا الميزانية مفتوحة معاك..
أما لو مكتب أو شركة أو محل هنا الصيني ماينفعكش نهائي..

الصيني فيه درجتين عشان تبقا عارف..
اسأل ع الدرجة الدبل جليز double glaze
دي بيبقا فوقها طبقة شفافة زي الإزاز كدة بتديله لمعة إضافية + حماية ضد الخدوش وخلافه..
وده هاتلاقيه أغلى حاجة في الصيني عموما..

سيبك من كلام الناس بتاع أصله بيخرج من مكانه وأصله بيشرخ وأصله ماعرفش إيه..
الرك ع الصنايعي
لو جايب بورسلين من المريخ والمونة تحته مطبلة يبقا هايشرخ ويخرج من مكانه..
ولو جايب بورسلين من الصومال وجبت صنايعي نضيف يركبه هايبقا زي الفل..

الإشاعات دي طلعها الصنايعية عشان يطلعوا ان العيب مش منهم..
بعد مايركب تطلع بلاطة مطبلة وتتكسر فتيجي تكلم الراجل يقوم يرمي اللوم ع البلاطة ويقولك يا بيه اصله صيني !!

أنا بقا كنت واقف على إيد الصنايعي وهو بيركب..
البلاطة اللي مش واخدة مونة كفاية أو مطبلة كنت اقوله ارفعها وركبها تاني..
وكنت اطبل بإيدي على كل بلاطة بيركبها لو سمعت تحتها صوت رنة تبقا واخدة هوا..

ملكش خلق تقف مع الصنايعية يبقا اعمله لزق وانجز وريح بالك..
حتى تكلفة اللزق أرخص بس لازم يكون عندك أرضية مستوية تلزق عليها..

عايز تفاصيل أكتر عن اللزق روح كيماويات البناء الحديث هاتلاقي الراجل عمللك بريزنتيشن عنه وماتشتريش لزق الا من عندهم عشان ده احسن نوع :)

وتاني بقولك لو جبت أغلى بلاطة واللي ركبها مش تمام يبقا برضه هاتنكسر.. الرك ع التركيب وبس..

الناس اللي حضرتك ذكرتهم دول بينصحو علي حد علمهم وتجاربهم الشخصية. مش هياخدو عمولة لو اشتري اسباني ولا هيخسرو لو اشتري صيني.

فكان ممكن تقول رايك وتجربتك من غير ماتجيب سيرة حد قال نصيحة خالصة لوجه الله.

هو ازاي اصلا البلاطه تطبل طول ما تحتها كونه كويس
أيا كان نوعها اللي اعرفه مدام تحتها مونه كويس عمرها ما تطبل
ياريت اللي جرب الصيني يقولي فعلا ايه عيوبه
لأني شوفته في معرض راكب وطبعا هلك مافيش بعد كده و لسه بيلمع و شكله كويس جدا
فغالبا في البيت هيبقى الموضوع مختلف محدش هيمشي عليه بالجزمه ولا هيبقى في تراب زي المحلات والاستهلاك ليه هيبقى أقل

المشاركة الأصلية كتبت بواسطة medosalah

رايي وعن تجربه

الافضل تركب سيراميك عادي .خاصه كليوباترا.. لو غاوي فشخره يبقي تركب رخام مش بورسلين

عندنا شقتين .. ركبنا بورسلين في الشقه الاولي من 8 سنين وكان كليوباترا .. بعديها بسنه كل البورسلين طبل وبلاطات كتيييييييييييييييييير اتكسرت .. بالضافه ان اي خدش بيبان في البلاطه وبعد فتره لما النور او الشمس تدخل الشقه تلاقي البلاطات شكلها يكسف من كتر الخرابيش

اتعلمنا الدرس وعملنا سيراميك بيج فاتح . ساده . من كليوباترا شيك جدا فيالشقه التانيه واهه بقالوا 8 سنين .. الحمد لله زي الفل .. تجر عليه عفش . توقع عليه حلل ومواعين تقيله .. والحمد لله لا بيتخربش ولا بيتاثر .. شيك جدا وعملي لاقصي درجه تتخيلها

والله يا باشا مش فشخره ولا حاجه
بس باردوا البورسلين بيدي المكان شكل ثاني خالص غير السيراميك
وعموما هبدا أدور على سيراميك قطع ليزر يكون شكله كويس متهيئلي هيبقى احسن