الموضوع: تجربة قيادة سيات توليدو 2015 تقرير كامل بالمواصفات

المشاركة الأصلية كتبت بواسطة drahmedmd

سعر السيارة كام حاليا ياشباب وهل فيها مثبت سرعة وبلوتوث؟

سعرها وكيل 170 الف ومش موجوده ومش عارفين التسليم بيبقي اميته اصلا عشان وضع السوق حاليا مش مستقر نهائي وازمه الدولار وكده
في المعارض ب 190 الف

مثبت السرعه والبلوتوث موجود في الفئه التالته موديل 2014 و 2015

2016 مفيش فيها بلوتوث : وبيركب وحده خارجيه في التوكيل وغاليه علي الفاضي لانك مش بتستخدم الزرارا اللي في الطاره

ولا مثبت : وبيركب في التوكيل تقريبا ب 5000 جنيه ولسه محدش راح ركبه عشان سعره غالي بس فيه محاولات من الناس بتركيبه بره

ولا فوج لايت : وده فيه ناس ركبته بره التوكيل واتكلف 3500 بالمفتاح الاصلي بالضفاير بكل حاجه

الفوانيس عاديه مش ليد ... الليد ده موجود في الليون بس وشكله خرافي طبعا

عموما العربيه بنت ناس جدا ركوبتها حلوه وجرايه بعد ال 80 بطريقه رهيبه
ثباتها ممتاز
وسع الصالون والشنطه رائع الشنطه بتفتح زي الاسكودا ال a4 فواسعه جدا
ماتورها هو هو ماتور الاسكودا ال a7
فتيس ستبترونيك محترم فولكس استخدمته قبل كده كتير في الجيتات والاودي موديلات 2007 وطالع
التقفيل تشيكي وخامته كويسه
العربيه من مجموعه فولكس فشبه عربيات كتير اوي في فولكس وقطع غيارها الداخليه موجوده
الكاسيت تاتش وفيه كل اوبشن العربيه وغالي جدا تقريبا ب 18000 جنيه .. ايوه الرقم مظبوط
تعتبر احسن عربيه بالفلوس دي دلوقتي في السوق
معايا بقالها 6 شهور لونها ازرق بيبسي وما شاء الله ملفته جدا ومميزه للي طول عمره بيركب الماني

تقريبا دي كل المعلومات ولو عايز تسال علي حاجه تحت امرك

المشاركة الأصلية كتبت بواسطة s o p h o s

كانت ب 140 اصبحت ب 170
الناس الهاوية الي بتدور علي عربيات كويسة زي دي
للاسف بييشتروا حاجات تانية اقل علشان متغير السعر

العربيات كلها زادت للاسف
انا كنت حاجزها ب 140
استلمتها ب 148 في شهر يناير ونظرا لارتفاع سعر الدولار وانخفاض قيمه الجنيه وجشع التجار والتوكيلات وصلت الاسعار لكده

لو جيت بصيت لكل الموديلات في نفس الفئه السعريه كلها زادات
ده الشارك كانت بتزيد بمعدل كل ست ساعات يا راجل

التوليدو عربيه محترمه جدا وتستاهل فلوسها وافضل ما في السوق دلوقتي