الموضوع: صدمتى في التوكيل عند صيانة الألف

روحت أعمل صيانة الألف ل f3 مانيوال في القطامية أول حاجة سبت العربية و طلعت في الإستراحة اللي فوق وبعد حوالي ساعتين نزلت لقيت العربية لسو واقفة مكانها مفيش أي حاجة إتحركت لا هي ولا اللي واقفين أدامها المهم دي مش مشكلة
قولتلهم العربية بتحدف شمال
المهم المهندس بعد ما خلص العربية فضل يجربها جوا التوكيل على سرعة 30 مثلا ويسيب إيديه يوريني إنها خلاص ما بتحدفش وبعد ما أستلمت العربية ومروح لقيت العربية بطلت تحدف شمال إنما بقت بتحدف يمين
ده اللي يخصني لكن كل ده كلام فاضي بالنسبة للي ههحكيه دلوقتي
لقيت تحت عند الخزنة حوالي 12 أو 15 واحد معاهم العربية تاكسي وعمالين يشتموا ويسبوا قولت أشوف في إيه
سألتهم قالولي العربية 2015 دي ماتورها زبالة إحنا الموتور بيتخنق معانا وإحنا ماشيين ويفز مرة واحدة يعني لو في طريق وحد ورانا ممكن يلبس فينا وجينا التوكيل ميت مرة وكل مرة تعالوا الأسبوع اللي جاي لأ اللي بعده ويلعبوا شوية ويقولولنا تمام والمشكلة هي هي
و واحد منهم بيقولي من ساعة صيانة الألف وأنا كل إسبوع جاي هنا ودلوقتي عديت ال 15 ألف ومفيش حل وكله مسكنات وخلاص و واحد تاني قال أنا قولت أجيب زيرو علشان أشتري دماغي لكن كده حسبي الله ونعم الوكيل فيهم
واحد تاني قال ياريتني كنت جبت فيرنا و واحد تالت قال العربية حلوة لكن التوكيل زبالة ومش عارفين يحلوا حاجة و واحد رابع قال أنا جيت في معاد الصيانة وقالولي النهاردة هنعملك الصيانة بتاعتك العادية والعيب بتاع الموتور هنعملوهلك في يوم تاني و واحد خامس الموتور الجديد ده سكة إحنا لبسناه وصوته فيه خشونة وده فعلا أكد اللي أنا حاسس بيه الموتور محشرج فعلا مش صوت موتور عربية زيرو أبدا
المهم لما الناس دول خلاص إتخنقوا وكانوا ممكن فعلا يكسروا التوكيل والله ده كان أقل واجب دي ناس جايبين العربيات يكلوا منها عيش ويمكن قسط مش علشان يتزلوا اليوم بطوله في التوكيل من غير فايدة المهم جه موظف وخدهم واحد واحد على مكتبه وطلعهم واحد واحد يعني شربهم شاي بالياسمين و هدفه كان تفريق تجمعهم مش اكتر وأنا متأكد إني ممكن الصيانة الجاية أشوف حد منهم بردو جاي يتخانق لإن واضح إن دي مشكلة ملهاش حل عندهم

واضح إنك ما قريتش كلامي إلا أول كلمتين لإنك لو كنت قريته كنت فهمت إن المشكلة اللي حكيتها دي مش معايا إنما مع ناس قابلتهم معاك وهنروح بعيد ليه واضح إن واصل في التوكيل روح وإتفرج ولا بقولك أنا معاد الصيانة الجاي هصورلك اللي هشوفه فيديو لإني متأكد إني بردو هشوف حالات زي دي